Heptilik xewerler (13-apréldin 19-aprélghiche)

Muxbirimiz eziz
2019.04.19
hepte-2019-04-19.jpg “Wolkiswagin” aptomobil shirkitining ijra'iye bashliqi hérbért dayés BBC agéntliqi muxbirning so'allirigha jawab bermekte. 2019-Yili 15-aprél, shangxey.
Social Media

Ghulja bayliridin yaqup haji we selim haji qamaqqa höküm qilin'ghan

Yéqinda ghulja shehiridiki közge körün'gen Uyghur bayliridin yaqup haji we selim hajining 15 yilliq qamaqqa höküm qilin'ghanliqi heqqide uchurlar melum boldi.

Ehwaldin xewerdar kishilerning bildürishiche, yaqup haji we selim haji ilgiri ghulja shehirining su derwaza rayonidiki “Aq meschit” ni sélishqa birlikte töt milyon som (texminen 600 ming dollar) hediye qilghan iken. Bu qétim ularning qamaqqa höküm qilinishigha “Diniy esebiylik” amili bahane qilin'ghan.

Melum bolushiche, ghuljadiki tutqun qilin'ghan Uyghur baylirining köp qismi xeyr-saxawet ishliri bilen tonulghanlar bolup, ularning qilghanliri jem'iyetning parawanliqi we xelq ammisining xatirjemlikige munasiwetlik ishlar iken.

Xélil hashimgha bérilgen 19 yilliq qamaq 15 yil ilgiriki diniy terbiyege baghlan'ghan

Ghulja tewesidiki lagérlarning biride xitay tili oqutquchisi bolup ishlewatqan tijaretchi xélil hashimning 19 yilliq qamaqqa höküm qilin'ghanliqi heqqidiki uchurlar lagérlarning ichki qismidiki bezi qarangghu tereplerni ashkara qildi.

Melum bolushiche, yekke tijaret bilen shughullinip kelgen xélil hashim özining xitayche oqughanliqidek arqa körünüshi bilen deslep lagérlarning birige oqutquchiliqqa élip kétilgen.

Xélil hashim lagérdiki “Özini pash qilish” dolqunida buningdin 15 yil burun oghlini qur'an kursigha bergenlikini melum qilghan. Buning bilen uning oghli we ayalimu tutqun qilin'ghan.

Yazghuchi memtimin hoshurning tutqunda ikenliki algha sürülmekte

Uyghurlar diyaridiki zor tutqunda el söygen yazghuchi memtimin hoshurning tutqun qilin'ghanliqi heqqide her xil texminler otturigha chiqiwatqan idi. Muxbirimizning bu heqtiki ehwal igilishi jeryanida yerliktiki xadimlar memtimin hoshurning eserliridin “Mesile” chiqqanliqini bildürdi.

Bir qisim chet'el metbu'atlirimu memtimin hoshurning tutqun qilin'ghanliqi tilgha élinidu. Bu heqtiki ehwal éniqlash jeryanida héchqandaq orun yaki shexsmu bu ehwalni inkar qilmighan.

Melum bolushiche, memtimin hoshur 1990-yillardin kéyin Uyghur proza ijadiyitide yéngi burulush hasil qilghan bolup, özining köpligen nadir eserliri bilen “Uyghur hazirqi zaman edebiyatidiki bayraqdar ediblerning biri” dep tonulghan iken.

“Wolkiswagén” shirkitining lagérlar heqqidiki sözi bayqut chaqiriqigha seweb bolmaqta

Gérmaniyening “Wolkiswagén” aptomobil shirkiti yéqinda shangxeyde ötküzülgen aptomobil körgezmiside muxbirlarning so'allirigha jawab bérip, özlirining Uyghur diyaridiki lagérlar mesilisi we siyasiy basturushtin xewiri yoqluqini bildürgen.

Mezkur shirketning bu jawabi xelq'aragha melum bolghandin kéyin her sahe kishilirining zor tenqidige duch keldi. Shuning bilen birge ularning mehsulatlirini bayqut qilish chaqiriqliri otturigha chiqishqa bashlidi.

Melum bolushiche “Wolkiswagén” aptomobilliri 1990-yillardin tartip xitayda eng eng qarshi élin'ghan aptomobillarning biri bolup kelgen. Buningdin alte yil ilgiri bolsa ular ürümchide tarmaq zawut achqan iken.

Xitayning d u q gha astirittin qara qolini sunushi zor ghulghula qozghidi

Muhajirettiki Uyghurlarning eng chong ammiwi teshkilati bolghan d u q tor bétige xitay xakkérlirining hujum qilish weqesidin kéyin yéqinda xelq'ara maliye mulazimet shirkiti “Réfénitiw” ning d u q ni térrorluq qara tizimlikige kirgüzüp qoyghanliqi melum boldi.

Mushu sewebtin d u q we uning rehberlirining banka hésabatigha ewetilgen pullar mangmaydighan, ghayib bolup kétidighan yaki ret qilinidighan ehwal kélip chiqqan.

D u q ning rehberliri bu ishning otturigha chiqishida xitay hökümitining qoli bar, dep qaraydighanliqini bildürgen. Shuningdek ilgiri xitay hökümitining xelq'ara saqchi teshkilatidin paydilinip dolqun eysa heqqide tutush buyruqi chiqarghanliqini esletken.

Istanbulda “Milliy mepkure we teshkilatchiliq” témisida terbiyelesh kursi ötküzüldi

Muhajirettiki Uyghur yashlirini milliy mepkure we teshkilatchiliq bilimliri boyiche terbiyelesh meqsitide istanbuldiki Uyghur akadémiyesi türkiyening herqaysi jaylirida oquwatqan Uyghur yashliri üchün terbiyelesh kursi ötküzdi.

Ikki künlük bu kursta doktorluq we magistirliq unwanliri üchün oquwatqan 21 oqughuchi oxshimighan témilardiki léksiyelerge qatnashti hemde milliy mepkure, teshkilatchiliq témisi boyiche tégishlik melumatlargha ige boldi.

Melum bolushiche, muhajirettiki Uyghur dawasining kelgüsi tereqqiyati üchün bu xildiki kurslarni köplep échish zor ehmiyetke ige, dep qaralmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.