Һәптилик хәвәрләр (15-июндин 21-июнғичә)

Мухбиримиз әзиз
2019-06-21
Елхәт
Пикир
Share
Принт
Әркин асия радиоси уйғур бөлүми һәптилик хәвәрлири
Әркин асия радиоси уйғур бөлүми һәптилик хәвәрлири
Photo: RFA

Қәшқәр хуаән саяһәт ширкитиниң муавин директори айтурсун ели лагерда җан үзгән

Йеқинда қәшқәр хуаән саяһәт ширкитиниң муавин директори айтурсун елиниң 2018-йили 6-айда лагерда өлгәнлики һәққидә көплигән учур тарқалған иди. Мухбиримизниң әһвал ениқлиши җәрянида бу хәвәрниң растлиқи дәлилләнди. 

Айтурсунниң җәсити аилисигә қайтурулғандин кейин униң аилисидикиләр пәқәт униң йүз қисминила көргән. Әмма мейитниң бәдән қисмини көрүшкә йол қоюлмиған. Шундақла барлиқ һазидарларни өйгә солап қойғандин кейин кадирлар вә сақчилар мейитни өзлирила йәрликкә қоювәткән. 

Айтурсунниң лагерға қамилип бәш күн ичидила сирлиқ һалда өлүп кетиши вә сақчиларниң мейитни әл-җамаәтниң көзидин йошурунчә йәрликкә қоюветиши бу һәқтики көплигән гуманларни пәйда қилмақта.

Профессор һәсәнҗан абдулла түркийәдин қайтип лагерға қамалған

Хитай даирилириниң тездин қайтип келиш һәққидики тәһдитлик буйруқлириға бойсунуп 2017-йили 4-айда истанбулдин юрти ғулҗиға қайтқан профессор һәсәнҗан абдулланиң лагерда икәнлики мәлум болди.

Һәсәнҗанниң түркийәдики аяли бу һәқтә мәлумат берип, униң 2015-йилидин буян түркийәдә иқамәт билән туруватқанлиқини, йолдишиниң 32 йил зираәт илми билән шуғулланғанлиқини, униң 2015-йили пенсийигә чиққанлиқини билдүргән. 

Мәлум болушичә, түркийә һөкүмити хитай даирилиригә бу һәқтә мәлумат йоллап, һәсәнҗанниң қоюп берилишини тәләп қилған болсиму һазирғичә һечқандақ бир илгириләш болмиған.

Хотән вә қәшқәрдә көп сандики мәсчит мунарлириниң чеқиветилгәнлики дәлилләнди

Хитай даирилири «диний әсәбийликкә қарши туруш» намида уйғур дияридики миңлиған мәсчитләрни чеқип ташлиған иди. Йеқинда чеқилмай қалған аз сандики мәсчитләрниң һуҗум нишани болуватқанлиқи мәлум болди. 

Ашкарилинишичә, хотән вә қәшқәр қатарлиқ җайлардики бир қисим мәсчитләрниң мунар беши вә униңдики һилал ай бәлгилири «әсәбийлик» кә бағлинип чеқиветилгән. 

Нөвәттә уйғур дияридики қоюқ диний түскә игә болған барлиқ шәкил вә бәлгә-нәқишләр хитай даирилириниң буйруқлири бойичә мәҗбурий йосунда йоқитилмақта икән.

«Дуня қачқунлар күни» дә тайландтики уйғурлар әсләнди

Һәр йили 20-июн күни «дуня қачқунлар күни» болуп, бу йилқи хатирә күндә тайланд түрмилиридә йетиватқан 52 нәпәр уйғур мәһбус йәнә бир қетим әсләнди.

Тайланд түрмилиридики уйғур мәһбуслар бу хатирә күндә радиомиз арқилиқ дуня җамаитигә өзлириниң мураҗиитини йоллиди. Бу мураҗиәтнамидә «әй дуня, бизни унтуп қалмаңлар! бизниң әркинликкә чиқишимиз үчүн ярдәм қилиңлар!» дәп хитаб қилинди. 

Йиллап мәһбуслуқта йетивериш җәрянида бир қисим уйғур тутқунлар қечип кетишкә урунуп баққан болсиму мувәппәқийәт қазиналмиған. Чәтәлләрдики һәрқайси уйғур тәшкилатлириму бу мунасивәт билән мәхсус баянат елан қилип, дуня җамаәтчиликини тайландтики уйғур тутқунлар мәсилисигә көңүл бөлүшкә чақирди.

Америка ташқи ишлар министирлиқи хитайни лагерлардики мәҗбури әмгәкни тохтишишқа чақирди

Йеқинда америка ташқи ишлар министирлиқи һәрқайси дөләтләрдики адәм содиси қилмишиниң өткән бир йиллиқ әһвали һәққидә доклат елан қилди һәмдә хитайни буниңдики «әһвали әң начар дөләт» тизимликигә киргүзди.

Доклатта хитайдики адәм содиси вәзийитиниң барғансери начарлап меңиватқанлиқи, болупму уйғур дияридики лагерларға қамалған тутқунларниң мәҗбурий әмгәккә селиниши тәпсилий баян қилинди. 

20-Июндики доклатни елан қилиш мурасимида америка ташқи ишлар министири майк помпейо хитайниң бир милйондин артуқ мусулманни тутқун қилип, уларниң бир қисмини мәҗбурий әмгәккә селиватқанлиқини билдүрди.

Германийәдә «явропа уйғур әркинлик лоңқисини талишиш путбол мусабиқиси» өткүзүлди

15-Вә 16-июн күнлири германийәниң мюнхен шәһиридә «явропа уйғур әркинлик лоңқисини талишиш мусабиқиси» ғәлибилик өткүзүлди. Мусабиқиниң ечилиш мурасимидики ай-юлтузлуқ көк байрақ вә уйғур миллий мәдәнийитини мәркәз қилған парат арқилиқ муһаҗирәттики уйғурларниң вәтән сөйгүси йәнә бир қетим җанлиқ намаян қилинди.

Мусабиқигә алтә дөләттин кәлгән йүздин артуқ команда әзаси қатнашти. Мусабиқидә шиветсийәдики уйғур командиси чемпийон болди. 

Мәлум болушичә, бу қетимқи путбол мусабиқисини орунлаштурушта алаһидә рол ойниған вә күч қошқан «явропа шәрқий түркистан бирлики» д у қ билән йеқиндин һәмкарлишип, бу мусабиқиниң ғәлибилик ечилиши вә йепилишини вуҗудқа кәлтүрди.

Толуқ бәт