Heptilik xewerler (18-iyundin 24-iyun'ghiche)

Muxbirimiz qutlan
2016-06-24
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Rabiye qadir xanim ramizan mezgilide Uyghur xelqi duch kéliwatqan siyasiy bésimlar bilen tebi'iy apetler heqqide chaqiriq élan qildi

Uyghur élida bu yilliq ramizanning türlük cheklimiler shundaqla yoshurun we tuyuqsiz tutqun qilish heriketliri ichide dawam qiliwatqanliqi melum bolmaqta.

Ramizan harpisida az dégende 5 neper tor bet sahesidiki Uyghur ziyaliysining tutqun qilinishi, gu'angjuda 10 neper Uyghur ottura mektep oqughuchisining tutup kétilishi xelq'ara jem'iyetning diqqitini qozghimaqta. Uning üstige ramizan kirgendin buyan Uyghur élida her xil tebi'iy apetler keyni-keynidin yüz bermekte.

Dunya Uyghur qurultiyining re'isi rabiye qadir xanim bu munasiwet bilen radiyomiz ziyaritini qobul qilip, pütün dunyadiki Uyghurlardin ramizanliq ehwal soridi. Uyghur xelqini ittipaqliq we mustehkem étiqad asasida köz aldidiki qiyinchiliqlarni yéngishke chaqirdi.

Ghuljidiki saqchi xadimliri kelkün apitige uchrighanlar üchün öz aldigha i'ane toplashning cheklen'genlikini bildürdi

Igilinishiche, 6-ayning 17-künidin buyan ili wadisida yaghqan qattiq yamghur sewebidin Uyghur élining shimalida körülgen tebi'iy apetning pewqul'adde éghir bolghanliqi mölcherlenmekte.

Kelkün apiti yüz bérip uzun ötmeyla ündidar qatarliq ijtima'iy taratqularda puqralarning kelkün apitige uchrighanlar üchün öz aldigha i'ane toplishining cheklen'genlik xewiri tarqalghan idi.

Ghuljidiki melum saqchixanining kéchilik nöwetchi xadimi radiyomiz ziyaritini qobul qilip, ghuljida kelkün apitining pewqul'adde éghirliqini, muqimsizliq weqeliri yüz bérishning aldini élish üchün, puqralarning öz aldigha i'ane toplash pa'aliyetlirini chekligenlikini bildürdi.

Xoten tewesidiki ashxanilarning ramizan mezgilide normal tijaret qilishqa mejbur qilin'ghanliqi ashkara boldi

Bu yilliq ramizan bashlan'ghandin buyan, xoten tewesidiki musulmanche ashxanilarning normal tijaret qilishqa buyrulghanliqi, ashxana xojayinlirining kündüzde herqandaq seweb bilen ashxanini taqap qoyushqa bolmaydighanliqi uqturulghan.

Xitay hökümiti bu yilliq ramizan harpisida "Shinjangning diniy erkinlik ehwali" namliq aqtashliq kitab élan qilip, Uyghur aptonom rayonidiki musulmanlarning diniy étiqad erkinlikige toluq kapaletlik qilin'ghanliqini jakarlighan idi.

Halbuki, radiyomizning xoten wilayitidin igiligen melumatliri xitay hökümitining atalmish aqtashliq kitabidiki bayanlirining chirayliq ibarilerge tolghan qeghez yüzidiki "Siyasiy teshwiqat" tin bashqa nerse emeslikini ashkara qilmaqta.

Gu'angju sheherlik 75-ottura mekteptiki 10 neper Uyghur oqughuchi tutup kétilgen

6-Ayning 9-küni da'irilerning gu'angju sheherlik 75-ottura mektepning "Shinjang sinipi" da oquydighan 10 neper Uyghur oqughuchini tutqun qilghanliqi ashkarilandi.

Adwokat tang ependining gu'angju sheherlik birinchi tutup turush ornidin élip chiqqan melumatigha qarighanda, tutqun qilin'ghan 10 neper Uyghur ottura mektep oqughuchisining hemmisi "Térror gumandarliri" süpitide tutup turulmaqtiken. Melum bolushiche, 10 neper tutqunning sekkizi oghul, ikkisi qiz oqughuchi iken. Halbuki, gu'angju sheherlik saqchixanilar bu heqte tepsiliy melumat bérishni ret qildi.

Dunya Uyghur qurultiyining bash katipi nurmuhemmet musabay bu heqte jiddiy inkas qayturup, gu'angju saqchi da'iriliri tutqun qilghan 10 neper Uyghur oqughuchining teqdiridin qattiq endishe qiliwatqanliqini bildürdi.

Uyghur kishilik hoquq qurulushi teshkilati "Dunya musapirlar küni" munasiwiti bilen taylandtiki Uyghur musapirlar heqqide bayanat élan qildi

20-Iyundiki "Dunya musapirlar küni" de washin'gtondiki Uyghur kishilik hoquq qurulushi teshkilati bayanat élan qilip, taylandta tutup turuluwatqan Uyghur musapirlarning xelq'ara kishilik hoquq qanuni boyiche üchinchi bir bixeter elge yerleshtürülüshini telep qildi.

Uyghur kishilik hoquq qurulushi teshkilati öz bayanatida taylandta turup turuluwatqan Uyghur musapirlar eger xitaygha qayturulsa, ularning türmige qamilish, ten jazasigha uchrashtek qismetlerge duch kélidighanliqini agahlandurghan.

Igilinishiche, hazir taylandta tutup turuluwatqan Uyghur musapirlar 70 tin köprek bolup, radiyomiz ularning ramizan harpisida achliq élan qilghanliqi toghriliq xewer bergen idi.

Qeshqer konasheher nahiyesining awat yézisidiki nurimanxan anining oghli saqchilar teripidin élip kétilgen

Aldinqi hepte qeshqer konasheher nahiyesining awat yézisida olturushluq 72 yashliq nurimanxan ana saqchi da'irilirining tinimsiz soraq-so'alliri we teqiblirige chidimay radiyomiz arqiliq öz derdini dunyagha anglatqan idi.

Bu xewer dunyagha ashkara bolghandin kéyin xelq'ara taratqularda ulap bésilip, küchlük inkas peyda qilghan idi. Halbuki, yerlik saqchi da'iriliri öch élish xaraktérlik tedbir qollinip, 22-iyun küni 72 yashliq nurimanxan anining chong oghli memet ezizni öz öyidin tutup ketken.

Nurimanxan ana bilen uning norwégiyede turushluq oghli turghunjan emet bu weqeni delilligen bolsimu, emma awat yézisidiki yerlik da'iriler bu heqte melumat bérishni ret qildi.

Toluq bet