Heptilik xewerler (23-iyuldin 29-iyulghiche)

Muxbirimiz jüme
2011.07.29

“Erkinlik longqisi” putbol musabiqisi bashlandi

Uyghur tarixidiki tunji qétimliq “Erkinlik longqisi” ni talishish musabiqisi 27-iyul gollandiyining denhax shehiride ghelibilik bashlandi.

Yawropa tupraqlirida yashawatqan minggha yéqin Uyghur öz-ara quchaqlashti. Herqaysi komandilar alqish sadaliri ichide ay-yultuzluq kök bayraqni kötürüp  hayajan ilikide meydan'gha kirip keldi. Istiqlal marshi oquldi we weten ichi-sirtidiki shéhitlerning rohigha süküt bilen hörmet bildürüldi. Dunya Uyghur qurultiyi rehberliridin semet abla ependi Uyghurlarning meniwi anisi rabiye qadir xanimning salimini yetküzdi. Amérikida turup ziyaritimizni qobul qilghan rabiye qadir xanim “Putbolchi ballirimning urghan her bir topi xitaygha bir zerbe, Uyghur xelqimge bir ilham!” dédi.

Yéshil meydandiki ümidlik sada “Özimizning musteqil kespiy putbol komandisini qursaq”

Denhaxta ötküzüwatqan Uyghur yashlirining tunji nöwetlik “Erkinlik longqisi” ni talishish putbol musabiqisi bügün 3-künige künige qedem qoydi.

Musabiqe pilan boyiche intayin retlik, qiziqarliq we yuqiri keypiyatta dawamlashmaqta. Biz bu arida musabiqe meydanidiki ezimetler, meshqawul we heweskarlarni téléfon arqiliq ziyaret qilduq. Ular birdek “Bizningmu Uyghur topchilardin teshkillen'gen bir kespi komandimiz qurulghan bolsa...” dégen arzusini bayan qilishti.

1-Küni gollandiye bilen norwégiye, shwétsiye bilen bélgiye we amérika bilen gérmaniye komandiliri tutushti. Gollandiye Uyghur yashlar partiyisi komandisi 1 ge qarshi 2 netije bilen norwégiye Uyghur komandisini utqan. Shwétsiye Uyghur komandisi 1 ge qarshi 4 netije bilen bélgiye Uyghur komandisini, gérmaniye Uyghur komandisi 0 qarshi 1 netije bilen amérika Uyghur komandisini yenggen idi.

Uyghur yashlirining tunji nöwetlik “Erkinlik longqisi” ni talishish putbol musabiqisining ikkinchi küni

Uyghur yashlirining tunji nöwetlik “Erkinlik longqisi” ni talishish putbol musabiqisining ikkinchi küni gollandiye bilen gérmaniye, amérika bilen norwégiye, fransiye bilen bélgiye komandiliri tutushti. Gollandiye komandisi 2 ge qarshi 4 netije bilen gérmaniye komandisini yengdi. Amérika bilen norwégiye 1=1 tengliship qaldi. Fransiye bilen bélgiyimu 1=1 netije bilen tengliship axirlashti.

3-Küni gollandiye bilen amérika, gérmaniye bilen norwégiye, shwétsiye bilen fransiye Uyghur komandiliri musabiqilishidu.

Mezkur musabiqe dunyaning herqaysi jaylirida yashawatqan Uyghurlargha iptixarliq, ümid we ishench tuyghulirini ata qildi.

Gollandiyidiki xitay elchixanisi aldida namayish

Herqaysi döletlerdin “Erkinlik longqisi” ni talishish musabiqisige kelgen Uyghurlar 28-iyul gollandiyide turushluq xitay elchixanisi aldida namayish qilip xitayning “18-Iyul xoten weqesi” diki zorawanliqi we Uyghurlargha qaratqan basturush siyasitige qarshiliq bildürdi.

Namayishchilar bashtin axiri sho'ar towlap özining xitay diktatoriliqi we tajawuzchiliqigha bolghan naraziliqini ipadilidi. Dunya Uyghur qurultiyi yashlar komitétining bashliqi gheyur ependi we gollandiyidiki ammiwi teshkilatlarning yétekchisi sadiqjan seley ependiler namayish we pa'aliyet heqqidiki pikir qarashlirini bayan qildi.

18-Iyul xoten qirghinchiliqigha naraziliq bildürüsh yüzisidin gérmaniyide namayish ötküzüldi

26-Iyul gérmaniyidiki Uyghurlar 18-iyul yüz bergen xotendiki qanliq qirghinchiliqqa naraziliq bildürüsh yüzisidin myunxénda yene bir qétim namayish ötküzdi.

Namayishni d u q, yawropa sherqiy türkistan birliki teshkilati, xeter astidiki milletlerni qoghdash teshkilati we tibet teshkilati birlikte uyushturghan.

Bu xildiki namayishlar yene 7-ayning 24-küni türkiyining 3-chong shehiri izmirda, 7-ayning 27-küni ezerbeyjanning paytexti bakuda ötküzülgen. Izimizdiki bu namayishni “Kök böriler” yashlar teshkilati uyushturghan.

Bakudiki namayish xitayning bakuda turushluq elchixanisi aldida ötküzülgen bolup namayishqa ezerbeyjandiki bir nechche partiye teshkilat ezaliri qatnashqan.

Küresh ölmeydu!

25-Iyul merhum küresh küsen tughulghanliqning 52-yilliqi munasiwiti bilen shwétsiyide yashawatqan bir qisim yashlar özlükidin teshkillinip, shwétsiye Uyghur komitéti mes'ullirining hemrahliqida merhumning qebrisini yoqlidi.

Qebre yoqlash jeryanida merhumning rohigha atap qur'an qira'et qilindi we merhumning hayati tonushturuldi.

Merhum küresh küsen ependini qazaqistandiki waqitliridin tartip tonuydighan we pa'aliyetlirige ishtirak qilghan, hazir shwétsiyide yashawatqan yüsüp ependi merhumni eslep ötti.

Wakaletsiz milletler teshkilati xitayning xotendiki basturush herikitini eyiblidi

Wakaletsiz milletler teshkilati 25-iyul bayanat élan qilip, xitayning xoten weqesidiki basturush herikitini eyiblidi.

Bayanatta mundaq déyildi “Sherqi türkistanning xoten shehiride 18 ‏-iyuldiki qanliq weqede 20 kishining ölgenliki ilgiri sürülüwatidu, emma xitay terep weqe heqqidiki uchurlargha cheklime qoyup, weqeni öz muddi'asi boyiche tonushturushqa urunuwatidu.”

Bayanatta xotendiki weqe üstide musteqil tekshürüsh élip bérilishi kérekliki tekitlendi. Rabiye qadir xanim xoten weqeside qolgha élin'ghanlarning teqdiridin endishe qilmaqta.

Melum bolushiche, xotendiki weqe sheherdiki xitaylarning  tijaritige éghir tesir körsetken.

Pakistanning rawalpindi shehiridiki bir tijaretchiler uyushmisining re'islikige yene Uyghur saylandi

Muhajirettiki Uyghurlar özlirining ishchanliqi, intizamchanliqi we durusluqi bilen öz döletliridiki yerlik ahalilerning qizghin quchaq échishigha we izzet-hörmitige ériship kelmekte.

Ötken hepte pakistanning rawalpindi shehiridiki bir chong bazarda ötküzülgen tijaretchiler uyushmisining re'is saylimida ghenijan rozi isimlik bir Uyghur re'islikke saylan'ghan.

Ghenijan rozi, Uyghur élining bortala shehiridin, u 1982-yili 12 yash waqtida, ata-anisi bilen birlikte pakistan'gha köchmen bolup kélip yerleshken. U bu jeryanda rawalpindidiki tijaretchiler arisida hörmetke érishken.

Bir ay dawam qilghan saylam pa'aliyiti toghrisida ömer Uyghur wexpining mes'uli ekberjan bilidighanlirini bayan qildi we ghenijan rozini tebriklidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.