Heptilik xewerler (22-séntebirdin 28-séntebirgiche)

Muxbirimiz jüme
2012-09-28
Share

D o q hey'iti gollandiyidiki teshkilat we partiyiler bilen uchrashti

Dunya Uyghur qurultiyi re'isi rabiye qadir xanim qatarliqlar gollandiyide achqan d o q ijra'iye komitéti yighini jeryanida gollandiye xristi'an démokratlar partiyisi rehberliri bilen uchrashqan we Uyghur weziyiti heqqide söhbet élip barghan.

Dunya Uyghur qurultiyi hey'iti 24-séntebir gollandiye xristi'an démokratlar partiyisi mu'awin bash sékrétari qatarliqlar bilen uchrashqanda xitay hökümiti Uyghurlargha qarita yürgüzüwatqan assimilyatsiye siyasiti, kishilik hoquq depsendichiliki we gollandiyidin panahliq tiligen Uyghurlarning qiyinchiliqliri qatarliqlar heqqide melumat bergen.

Shu küni chüshtin kéyin dunya Uyghur qurultiyi hey'iti merkizi gollandiyining denhak shehiride turushluq wakaletsiz milletler teshkilatini ziyaret qilghan.

Tewpiq fondi jem'iyiti" ning 18 ezasi tutqun qilin'ghan

Da'iriler "5-Iyul weqesi" yüz bérip, bir nechche ay ötkende ürümchide ijtima'iy asas tikligen "Tewpiq fondi jem'iyiti" ning 18 neper xadimni qolgha alghan.

Bulardin shinjang tébbiy uniwérsitéti 1-tarmaq doxturxanisi doxturi, "Tewpiq fondi jem'iyiti" ning qurghuchisi memetjan abduqadir, tébbiy uniwérsitéti aspiranti tursunjan ablimit, tébbiy uniwérsitéti toluq kurs oqughuchisi xalide qatarliqlarning kimliki éniqlandi.

Bularning ichide memetjan abduqadirgha 15 yilliq, tursunjan ablimitqa 9 yilliq xalide qatarliq oqughuchilargha 9 yilliqtin 7 yilliqqiche qama jazasi bérilgen.

Imin mömin 5-iyuldin kéyin iz-déreksiz ghayib bolghan

Aqsu uchturpanliq imin möminning 2009-yildiki "5-Iyul weqesi" din kéyin iz-déreksiz ghayib bolghanliqi ashkarilandi.

Eyni yili 28 yashqa kirgen imin mömin 6 yashliq bir oghul perzentning dadisi idi. Imin mömin yoqap ketkendin kéyin uning yashan'ghan dadisi derd-elemde hayatidin ayrilghan. Nöwette uning bir achisi we ayali ürümchide bir tereptin éghir jismaniy emgek bilen tirikchilik qilsa, yene bir tereptin uning iz-dérikini élish üchün hepileshmekte.

Bügün'ge qeder 5-iyuldin kéyin ghayib bolghan jem'iy 27 kishining kimliki toluq aydinglashqan idi.

Shwétsiye Uyghur ma'arip uyushmisi Uyghurlarni tonushturmaqta

Shwétsiye Uyghur ma'arip uyushmisi stokholimda ötküzüwatqan Uyghur medeniyet küni pa'aliyiti ünümlük dawam qilmaqta.

Uyushma bu yil 9-ayning 10-künidin bashlap her heptining shenbe, yekshenbe künliri stokholimning muhim kochilirida Uyghur medeniyitini tonushturushqa bashlighan idi.

Ziyaritimizni qobul qilghan uyushmining mu'awin re'isi exmetjan bu xil pa'aliyetler arqiliq Uyghurlarni tonushturushta yaxshi ünümge érishkenlikini bildürdi.

Shwétsiye Uyghur ma'arip uyushmisi Uyghur medeniyitini tonush turush pa'aliyitini 2007-yildin béri ötküzüp kéliwatqan idi.

Uyghur sodigerning paydisi béyjingning közini qizartti

Uyghur sodiger perhat namanop tépiwatqan paydigha béyjing da'irilirining közi qizardi.

Béyjingdiki Uyghur sodiger perhat namanop, 2002-yili ikki shériki bilen birlikte béyjingdiki bir éléktr saymanliri zawutining xizmet binasini 10 yilliq toxtam bilen höddige alghan.

Perhat namanop shérikliri bilen birliship, mezkur binani bézigen we bashqa shirketlerge ijarige bergen. Perhat namanopning ejri we salghan meblighi emdila méwe bérip, yiligha 6 milyon yüendin artuq payda tépishqa bashlighanda, bu paydigha béyjing da'irilirining közi qizarghan.

Nöwette béyjing da'iriliri zawut binasini perhat we shérikliridin tartiwélish üchün heriket qilmaqta. Perhat namanop bolsa, özining heqliq menpe'itini qoghdash üchün tirishchanliq körsetmekte.

Dunya qelemkeshler jem'iyiti Uyghur tilini qoghdash heqqide qarar aldi

Uyghur qelemkeshler shöbisi Uyghurlarning ana tilini ishlitish we ma'arip hoquqini qoghdash toghrisida qarar layihisi teyyarlap xelq'ara qelemkeshler jem'iyitige sun'ghan.

Mezkur layihe 8-séntebirdin 15-séntebirgiche koriyide chaqirilghan xelq'ara qelemkeshler jem'iyitining 78-nöwetlik qurultiyida maqullan'ghan.

Qararning maqullinishi, Uyghur ana tilini qoghdash herikitining xelq'aralishishidiki muhim qedemlerning bir iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet