Heptilik xewerler (24-séntebirdin 30-séntebirgiche)

Muxbirimiz qutlan
2016.09.30
erkin-asiya-radiosi-yengi.jpg Erkin asiya radi'osi Uyghur bölümi heptilik xewerliri
Photo: RFA

Gumadiki partlash weqesining gumandarliri heqqide bir qisim melumatlar ashkarilandi

10-Séntebir guma nahiyeside bomba partlash yüz bérip, nahiyelik saqchi idarisining mu'awin bashliqi ölgen bolsimu, lékin bügün'ge qeder xitay hökümet taratquliri héchqandaq xewer bermidi.

Radiyomizning igilishiche, nöwette saqchi da'irilirining weqege chétishliq gumandarlardin 10 kishige tutush buyruqi chiqarghanliqi melum. Bularning ichide köktérek yézisidin mexmut, memtimin we ablet qatarliq 4 neper gumandar bar iken.

Melum bolushiche xitay hökümiti gumandarlarni tutushqa yardemleshkenlerning aldigha 300-400 ming yüen, arqisigha 20-30 ming yüen söyünche béridighanliqini élan qilghan.

Qamalghinigha 2 yil tolghan bügünki künde ilham toxtining teqib astidiki hayati qaytidin diqqet qozghimaqta

Wijdan mehbusi ilham toxti 2014-yili 15-yanwar küni béyjingdiki öyidin tutulup kétilip, shu yili 23-séntebirde “Milliy qutratquluq we bölgünchilik” jinayiti bilen ürümchide ömürlük qamaqqa höküm qilin'ghan idi.

Ilham toxti qamalghinigha ikki yil tolghan bügünki künde u qolgha élinishning aldi keynidiki weqeler we uning nöwettiki teqib astidiki hayati qaytidin xelq'ara jama'etchilikning diqqitini qozghimaqta.

Radiyomiz bu munasiwet bilen uning eyni waqitta radiyomizgha qaldurghan awazliq bayanlirini anglighuchilar diqqitige sundi.

Xitay da'iriliri rabiyxan anining dunyagha ashkara qilghan shikayet we muraji'etliridin bi'aram bolushqa bashlighan

Bortalada olturushluq rabiyxan ana ikki heptidin buyan radiyomiz ziyaritini qobul qilip, özining norwégiyediki oghlini körüsh arzusining tosqunluqqa uchrighanliqini, pasportining saqchilar teripidin tartiwélin'ghanliqini bildürgen idi.

Melum bolushiche, xitay saqchi terep rabiyxan anining shikayetlirige deslep qulaq yopurghan bolsimu, lékin yéqindin buyan bi'aram bolushqa bashlighan.

Aldinqi küni bortala saqchi terep rabiyxan anigha chet'el axbaratining ziyaritini qobul qilmasliqni, egerde u pasport toghriliq erz-shikayettin waz kechse, uni hel qilishqa yardem qilidighanliqini bildürgen.

Uyghur akadémiyesi tesis qilghan “Tewpiq mukapati” bu yil üchinchi yiligha qedem qoydi

“Tewpiq mukapati” türkiyediki aliy mekteplerde bakalawrliq, magistirliq we doktorluq ilmiy unwani üchün oquwatqan Uyghur oqughuchilargha tesis qilin'ghan oqush mukapati bolup, uni tarqitish ishi bu yil üchinchi yiligha qedem qoydi.

Muhemmet'eli tewpiq 1930-yillardiki milliy qutulush inqilabi we uning netijiside meydan'gha kelgen milliy aqartish herikitide muhim rol oynighan Uyghur serxillirining biri. Uning namigha tesis qilin'ghan bu oqush mukapati istanbuldiki Uyghur akadémiyisi teripidin 2014-yilidin bashlap tarqitilishqa bashlighan.

Uyghur akadémiyesining mes'ulliridin doktor abdulhemit qaraxan bilen proféssor alimjan inayet bu heqte uchur bérip, bu yilliq “Tewpiq mukapati” ning türkiyede oquwatqan 10 neper munewwer Uyghur oqughuchigha bérilidighanliqini bildürdi.

Gherb dunyasidiki Uyghur jama'iti kéyinki ewladlarning ana til mesilisi üstide jiddiy oylanmaqta

Uyghurlarning gherb dunyasidiki muhajiret hayati 70 yilgha yéqinlashqan bügünki künde kéyinki ewladlarning ana til mesilisi pütkül jama'etchilikni jiddiy oylandurmaqtiken.

Yawropa elliri bilen türkiyede yashawatqan Uyghur jama'itining köp qismi muhajirettiki hayatta Uyghur ana tilini saqlap qélish-Uyghur milliy kimlikini saqlap qélishtiki eng muhim achquch dep qaraydiken.

Gherb elliridiki Uyghur serxilliri, jümlidin Uyghur jama'etchiliki arisida aktip rol oynawatqan her sahediki ziyaliylar muhajirettiki Uyghurlarning ana til mesilisi heqqide pikir bayan qilip, uning bir texirsiz mesile ikenlikini bildürdi.

Rusiyening Uyghur élidin sün'iy hemrah rakétasining parchiliri chüshidighan yer ijare élish pilani Uyghurlarning qarshiliqigha uchridi

Rusiye alem boshluqi idarisining yéqinda ashkarilishiche, rusiye Uyghur aptonom rayonidin rusiye sün'iy hemrah rakitalirining parchiliri chüshidighan yer ijare élishni pilanlimaqtiken.

Igilinishiche, rusiyening bu pilani bu yil 6-ayda putinning xitay ziyariti jeryanida ikki terepning alem boshluqini échish jehettiki hemkarliq kélishimi asasida otturigha qoyulghan iken.

Emma rusiyening bu pilani muhajirettiki Uyghur teshkilatliri we mutexessislirining qarshiliqigha uchridi. Qazaqistandiki Uyghur siyasiy pa'aliyetchi qehriman ghojamberdi bu heqte jiddiy inkas qayturup, bu pilan Uyghur élidiki xelqning hayati we bixeterlikige jiddiy tehdit peyda qilidu, dep körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.