Heptilik xewerler (2-noyabirdin 8-noyabirghiche)

Muxbirimiz eziz
2019.11.08
lagerdikilerning-Sersan-baliliri.jpg Qaghiliq nahiyilik qatnash saqchiliri tarqatqan, özlirining yolda ézip qalghan 3 balini a'ilisige tapshurup bergenlikini heqqidiki widéyoluq xewer.
Social Media

“Qizil töge” shirkitining diréktori abduweli abdusemet tutqun qilin'ghan

Uyghur diyaridiki hemmige melumluq “Qizil töge byo-téxnika shirkiti” ning bash diréktori abduweli abdusemetning 2018-yilidin buyan tutqunda ikenliki ashkarilandi. 

“Qizil töge” shirkiti asasliqi halal mehsulatlarni ishlepchiqirish we sétish bilen ronaq tapqan bolup, Uyghur diyarining herqaysi jaylirida yüz nechche top sétish orni we on mingdin köprek parche sétish nuqtisi achqan iken. 

Melum bolushiche, ilgiri abduwelining nöldin bashlap igilik tiklesh rohi hemde xeyri-saxawet ishlirigha köplep pul serp qilishi herqaysi axbarat wastiliride köplep teshwiq qilin'ghan iken.

Xitay hökümitining lagérlardiki saxta “Sehne oyunliri” ashkarilandi

Xelq'araning lagérlar heqqidiki bésimliri sewebidin xitay hökümiti özi bilen yéqin munasiwettiki bir qisim döletlerning diplomatliri we muxbirlirini lagér ziyaritige uyushturghan idi. Yéqinda xitayning bu ékiskursiye ömeklirige lagérlarda saxta “Sehne” teyyarlighan qilmishliri ashkara boldi. 

Ene shu xil saxtipezliklerni öz közi bilen körgen shahidlardin zumret dawut öz mehellisidiki ahale komitétining bu xil yalghanchiliqni qandaq teshkilligenlikini pash qildi. 

Melum bolushiche, chet'el ékiskursiyechiliri üchün saxta “Sehne” bolghan ürümchidiki “Köktérek” meschitining imami ömer rejeb 2017-yili qolgha élin'ghandin buyan mezkur meschit taqap qoyulghan iken. 

Uyghur diyari xitaydiki eng chong choshqa baqmichiliq rayonigha aylandurulmaqchi

Xitay axbaratlirining xewer qilishiche, yéqinda Uyghur diyarini xitay boyiche eng chong choshqa baqmichiliq rayonigha özgertish heqqide jiddiy muzakiriler bolghan. 

Ürümchide échilghan “Choshqa baqmichiliq igilikining tipini özgertip, uning derijisini téximu östürüsh” témisidiki mexsus yighinda Uyghur aptonom rayonluq hökümetning re'isi shöhret zakir buning “Zor ré'al ehmiyetke ige” ikenlikini tekitligen.

Xitay hökümiti Uyghur diyarida “Esebiylikke we térorluqqa qarshi turush” namida Uyghurlarning islam dini bilen baghlinishliq barliq pa'aliyetlirini chekligen hemde ularni choshqa göshi yéyishke mejburlawatqan idi. Emdilikte bundaq bir yighinning échilishi analizchilarning küchlük diqqitini qozghidi.

Amérika tashqiy ishlar ministirliqi Uyghurlar heqqide küchlük bayanat élan qildi

Amérika siyasyonliridin marko rubiyu yéqinda Uyghurlar uchrawatqan zulumgha qarita dunyani ornidin des turushqa chaqirghan idi. 1-Noyabir küni amérika tashqiy ishlar ministirliqi térorluq heqqidiki yilliq doklatni élan qilip, “Xitayning térorluqqa qarshi turush herkiti Uyghur millitini nishan qilghan” dep körsetti. 

Amérika tashqiy ishlar ministiri mayk pompéyomu buninggha ulapla bayanat élan qilip, xitayning Uyghur pa'aliyetchiler we lagér shahidlirining a'ilisige ziyankeshlik qilish qilmishini qattiq eyiblidi.

Tashqiy ishlar ministiri mayk pompéyoning bayanatida zumret dawut qatarliq shahidlarning uruq-tughqanlirining ölüp kétishige xitay hökümitining sewebchi boluwatqanliqi keskin tenqidlendi. Shundaqla u özining merhum dawut abduraxman hajimning wapatigha qayghurghanliqini alahide ipadilidi. 

Ézip qalghan balilarning lagér oqutquchilirining perzentliri ikenliki ashkarilandi

Ötken hepte qaghiliq nahiyelik qatnash saqchiliri bir widéyoluq uqturush tarqitip, özlirining yolda ézip qalghan üch balini a'ilisige tapshurup bergenlikini xewer qilghan idi. 

Muxbirimizning bu ehwalni éniqlashliri dawamida bu üch balining ata-anisining qaghiliqtiki bir lagérda oqutquchi ikenliki ashkarilandi. 

Lagérlar sewebidin ata-anilarning perzentliridin heptilep yaki aylap juda bolushi hazir da'imliq hadisige aylinip qalghan bolup, buning köpligen éghir ijtima'iy mesililerge seweb boluwatqanliqi kishilerni zor endishige salmaqta. 

“Washin'gton pochtisi” géziti Uyghurlarning yehudiylar duch kelgen qismetke eynen uchrawatqanliqini tekitlidi

Yéqinda “Washin'gton pochtisi” gézitide élan qilin'ghan “Xitayda her küni xrustal kéchisi yüz bériwatidu” namliq maqalida Uyghur diyaridiki siyasiy basturushning ehwali eyni waqittiki yehudiylar duch kelgen qismetning tekrarlinishi ikenliki yene bir qétim eskertildi. 

“Xrustal kéchisi” ibarisi eyni waqitta gérmaniyediki yehudiylar omumiyyüzlük hujumgha uchrighan hemde lagérlargha qamilishqa bashlighan künni ipadileydighan bolup, aptor Uyghurlarning hazir her küni mushu xildiki hujumgha uchrawatqanliqini alahide tekitlidi.

Aptor bu arqiliq hazir Uyghurlar duch kéliwatqan ijtima'iy paji'elerning qaysiy derijide jiddiy ikenlikini körsitip, hökümetlerni bu mesilide jiddiy tedbir élishqa chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.