Heptilik xewerler (10-noyabirdin 16-noyabirghiche)

Muxbirimiz jüme
2012.11.16

Ikki jumhuriyet xatirilendi

Dunyaning her qaysi jayliridiki Uyghurlar ötken hepte axiri 1933 we 1944-yilliri qurulghan sherqiy türkistan jumhuriyetlirini xatirilidi.

Xatirilesh pa'aliyetliri yighilish, nutuq sözlesh we sherqiy türkistan jumhuriyetlirining tarixini chüshendürüsh sheklide élip bérildi.

Qazaqistandiki murasimda sabiq milliy armiye jengchiliri yashlardin ümid kütüwatqanliqini bildürse, gollandiyidiki Uyghurlar weten azadliqi üchün qurban bolghan shéhitlerning rohigha atap du'a qilishti.

Shwétsiyidiki Uyghur pa'aliyetchiler “Jumhuriyet küni” ning kelgüsi ewladlarni terbiyileshte muhim rol oynaydighanliqini bildürdi.

“Jumhuriyet küni” amérika, yawropa elliri, türkiye, awstraliye we yaponiye qatarliq döletlerde tebriklen'gendin bashqa yene qazaqistan we qirghizistandiki Uyghur jama'etchiliki arisimu xatirilendi.

Rabiye qadir xanim amérikida kishilik hoquq mukapatigha érishti

Uyghur milliy herikiti rehbiri rabiye qadir xanim amérikidiki bir kishilik hoquq teshkilatining yilliq “Xelq'araliq erkinlik mukapati” gha érishti.

Mukapatni wirginiye shtati richmond shehirige jaylashqan “Birinchi erkinlik merkizi” tarqatqan bolup, mukapat rabiye qadir xanimning Uyghurlarning diniy étiqad erkinlikini ilgiri sürüshte qoshqan töhpilirige bérilgen.

“Xelq'araliq erkinlik mukapati” her yili 16-yanwar wirginiye shtatida xatirilinidighan “Diniy erkinlik küni” munasiwiti bilen yilda bir qétim tarqitilidu.

Osloda Uyghur meschiti quruldi

Norwégiye paytexti osloda yawropadiki tunji Uyghur meschiti quruldi. Norwégiyidiki Uyghurlar 10-noyabir bir yerge jem bolup, mezkur jamening échilish murasimini ötküzdi.

Semet abla ependi bu xeyrlik ishning wujudqa chiqishi üchün küch chiqarghan, yardemde bolghan kishilerge rehmet éytti.

Jamening telim-terbiye xadimi turghunjan qarim ziyaritimizni qobul qilip, jama'etni qolgha kelgen bu ewzellikning qedrini bilish hem buningdin ünümlük paydilinishqa chaqirdi.

D u q ijra'iye re'isi dolqun eysa amérikidiki pa'aliyetliri heqqide toxtaldi

Dunya Uyghur qurultiyi ijra'iye komitéti re'isi dolqun eysa 10 yilliq tirishchanliqtin kéyin 9-noyabir amérikigha keldi. U buning 1-qétim amérikigha kélishi.

Dolqun eysa 2002-yili xitay hökümiti teripidin térrorchi tizimlikige kirgüzülgendin kéyin, uning amérikigha kélishi qiyinchiliqqa yoluqqan.

U bu qétimliq amérika ziyariti heqqide toxtilip, buning dunya Uyghur qurultiyi we Uyghurlarning bundin kéyinki pa'aliyetliri üchün muhim ehmiyetke ige ikenlikini bildürdi we amérika hökümitige rehmet éytti.

Qazaqistan Uyghur yashliri toplighan i'ane insan hayatini qutuldurushqa qaritildi

Yéqinda almutadiki Uyghur yashliri, börek késilige duchar bolghan 14 yashliq eziz hashirofning hayatini saqlap qélish üchün mexsus konsért uyushturghan.

Ular konsérttin chüshken barliq pullarni eziz hashirofning anisigha yetküzgen. Bu saxawetchi yashlarning xeyrlik ishi yurt-jama'etchilikini tesirlendürgen.

Jem'iyet wekilliri we ziyaliylarning bildürüshiche, bu heriketler yashlarda insanperwerlik, milletperwerlik tuyghulirining shekillinishide muhim rol oynaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.