Heptilik xewerler (21-noyabirdin 27-noyabirghiche)

Muxbirimiz qutlan
2015-11-27
Share
erkin-asiya-radiosi.jpg Erkin asiya radi'osi Uyghur bölümi heptilik xewerliri
Photo: RFA

Uyghur közetküchiler xitay qoralliq küchlirining baydiki kömürkan hujumchilirigha otchachar ishletkenlikige qarshi inkas bildürdi

Xitayda chiqidighan "Azadliq armiye géziti" xitay qoralliq küchlirining baydiki kömürkan hujumchilirigha otchachar ishletkenliki heqqidiki xewerni ashkara qilghandin kéyin xelq'arada küchlük tesir peyda qildi.

Xewerde déyilishiche, xitay qoralliq küchliri gumandarlar yoshurun'ghan öngkürge aldi bilen yash aqquzush bombisi we silkitip hoshsizlandurush bombisi atqan. Bumu ünüm bermigende ular öngkürge qaritip otchachar ishletkenliki melum.

Amérikidiki Uyghur közetküchilerdin siyasiy analizchi ilshat hesen bilen adwokat nuri türkel bu heqte radi'omiz ziyaritini qobul qilip, küchlük inkas qayturdi.

Ular, xitay qoralliq küchlirining ayallar bilen balilarni öz ichige alghan Uyghur gumandarlargha qarita otchachar qoral ishletkenliki bügünki xelq'ara qanun we insaniyetning exlaqiy mizanlirini ayaq-asti qilghanliq, dep körsetti.

Gumidiki ré'alliq da'irilerning "Shinjangda mejburiy ma'arip pütünley heqsiz dewrige qedem qoydi" dégen bayanatini ret qilmaqta

Uyghur aptonom rayonluq ma'arip nazariti ötken hepte xitay hökümet taratqulirida bayanat bérip, "Shinjangda mejburiy ma'arip pütünley heqsiz dewrge qedem qoydi" dégen.

Bayanatta yézilardiki mejburiy ma'arip kapalet tüzülmisi bilen sheherlerdiki oqush parche xirajet pulini kechürüm qilish siyasitining pütün aptonom rayonni qaplash nishanigha yetkenliki xewer qilin'ghan.

Halbuki, guma nahiyesining muji bazirigha qarashliq yéngibagh bashlan'ghuch mektipidin igiligen uchurlar yuqiri hökümet teshwiqatini ret qilmaqta.

Igilinishiche, mezkur kenttiki mutleq köp qisim ata-anilar bir yilning 8 éyida yaqa yurtlarda medikarchiliq qilidiken. Ata-ana méhridin mehrum qalghan balilar toyunush we kiyim-kéchiki pütün bolushtek eng eqelliy halettin mustesna halda yashimaqtiken.

Yaponiyening xoso uniwérsitétida Uyghur medeniyiti we edebiyati boyiche ilmiy muhakime yighini ötküzülgen

Yéqinda yaponiyening xoso uniwérsitétida Uyghur medeniyiti we edebiyati boyiche ilmiy muhakime yighini ötküzülgen.

Mezkur ilmiy muhakime yighini Uyghur hazirqi zaman gungga shé'iriyitining asaschisi, sha'ir exmetjan osmanning yapon tiligha terjime qilin'ghan 2‏-shé'irlar toplimining neshr qilin'ghanliqi munasiwiti bilen uyushturulghan.

Yighinda Uyghur hazirqi zaman yéngi shé'iriyiti, tarim arxé'ologiyesi, Uyghur kinochiliqi, Uyghur élide yadro sinaqlirining tesiri qatarliq témilarda doklatlar bérilgen.

Yaponiyediki Uyghur tetqiqatchiliri sha'ir exmetjan osmanning yaponche neshr qilin'ghan 2-shé'irlar toplimi heqqide toxtilip, yaponiyelik oqurmenlerni eng jelp qilghan amil del exmetjan shé'irliridiki "Insaniyetke ortaq erkinlik chaqiriqi" dur, dep körsetti.

Uyghur élide tor saqchilirining agahlandurushini tapshuruwalghan yanfon ishletküchiler dekke-dükkide qalghan

Ötken hepte parizhda yüz bergen térrorluq hujumidin kéyin xitay tor saqchilirining Uyghur rayonidiki eqliy iqtidarliq yanfon we intérnét ishletküchilerge bolghan kontrolluqining hessilep kücheygenliki melum.

Uyghur rayonidin igiligen neq meydan uchurliridin melum bolushiche, xitay hökümiti ötken heptidin buyan Uyghur élining herqaysi jaylirida torgha ulinidighan yanfonlarni birmu-bir tintishqa bashlighan.

Tor saqchiliri intérnét süzgüchidin paydilinip gumanliq dep qarighan yanfon nomurlirini taqighan hemde téléfon igilirini saqchixana yaki köchme téléfon bash shirkitige bérip kimlik uchurlirini qayta tizimgha aldurushqa mejbur qilghan.

"2-Nöwetlik xelq'araliq Uyghurshunasliq yighini" da Uyghur tetqiqati boyiche muhim témilar muhakime qilin'ghan

Amérikidiki jorj washin'gton uniwérsitéti bilen biryussél we parizhdiki bir qanche uniwérsitétning hemkarliqida uyushturulghan "2-Nöwetlik xelq'araliq Uyghurshunasliq yighini" 17-noyabirdin 20-noyabirghiche biryussél hem parizhda ötküzülgen.

Mezkur muhakime yighinida amérika, awstraliye, rusiye, türkiye, qazaqistan we yawropa elliridin kelgen mutexessisler Uyghur tarixi, medeniyiti, til-edebiyati we siyasiy-ijtima'iy mesililiri boyiche maqaliler oqughan.

Yighin'gha qatnashqan tetqiqatchilar radi'omiz ziyaritini qobul qilip, bu qétimliq ilmiy muhakime yighinining Uyghurshunasliq boyiche yéngi we köp tereplimilik témilarni otturigha chiqarghanliqini ilgiri sürdi.

Uyghur déhqanlar "Dawalinish kartisi" ning doxturxanilarda ishlimeywatqanliqidin shikayet qildi

Uyghur élining déhqanchiliq we charwichiliq rayonlirida yolgha qoyuluwatqan dawalinish sughurtisi, yeni "Hemkarliship dawalinish kartisi" ning emili dawalinish jeryanida déhqan-charwichilargha heqiqiy menidiki sughurta yardimi élip kélelmigenliki ayan bolmaqta.

Melum bolushiche, da'iriler 2003-yilidin bashlap déhqan-charwichilar üchün "Hemkarliship dawalinish kartisi" tüzümini yolgha qoyghan.

Halbuki, mezkur siyaset yolgha qoyulup on nechche yildin ashqan bolsimu, lékin Uyghur élining herqaysi jayliridin kelgen inkaslardin qarighanda "Dawalinish kartisi" ning déhqan-charwichilargha héchqanche emeliy yardem élip kélelmigenliki melum bolmaqta.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet