Heptilik xewerler (15-dékabirdin 21-dékabirghiche)

Muxbirimiz eziz
2018.12.21
hepte-20181221.jpg El söygen küldürge we itot cholpini, xitaydiki döletlik 1-derijilik artis adil mijit ependi Uyghur rayonining jenubidiki déhqanlar bilen. (Waqti we orni éniq emes)
Adil Mijit ependining qizi teminligen

Sotchi ghalib qurban weziyetke naraziliqini ipadiligenliki üchün tutqun qilin'ghan

Yéqinda ürümchi sheherlik sot mehkimisining mu'awin bashliqi ghalip qurbanning “Ikki yüzlimichilik” bilen eyiblinip tutqun qilin'ghanliqi aydinglashti.

Muxbirimizning ehwal igilishi jeryanida ürümchi sheherlik ottura sot mehkimisining yene bir xadimi ghalip qurbanning az dégende alte aydin béri tutqunda ikenlikini delillidi.

Melum bolushiche, ghalip qurban alaqidar yighinlarda we béyjingdiki yuquri derijilik emeldarlar bilen uchrashqanda “Terbiyelesh merkezliri” ning köplep qurulushi jem'iyet muqimliqigha éghir selbiy aqiwet élip kéliwatqanliqini köp qétim otturigha qoyghan iken.

Komédiye artisi adil méjitning tutqun qilin'ghanliqi algha sürülmekte

Yéqinda Uyghur xelqige bekmu tonushluq bolghan komédiye artisi adil méjitning tutqun qilin'ghanliqi heqqide ijtima'iy taratqularda köplep uchurlar tarqilishqa bashlidi. Bu heqte ehwal igilesh jeryanida Uyghur aptonom rayonluq medeniyet nazaritidiki bireylen adil méjitning qachan tutqun qilin'ghanliqi heqqidiki so'algha jawab bermigen bolsimu, uning tutqunda ikenlikini ret qilmidi.

Adil méjitning türkiyediki a'ile tawabi'atliri özlirining 2-noyabirdin bashlap uning bilen bolghan barliq alaqisining üzülüp qalghanliqini bildürdi.

Melum bolushiche, adil méjit birnechche yil ilgiri hej qilip kelgen bolup, bir qisim kishiler uning bu qétim tutqun qilinishining “Qanunsiz hej qilish” baghlinip qalghanliqini algha sürmekte.

Lagérgha qamalghan chet'el puqrasi gülbahar jélilowa öz kechmishlirini anglatti

Xitay hökümiti Uyghurlar diyarida zor küch bilen kéngeytiwatqan lagérlargha chet'el puqraliqidiki Uyghurlarningmu qamilishi hazirqi siyasiy basturushning qaysi derijige barghanliqini yenimu roshen körsetmekte.

Yéqinda xitaydiki lagérlardin qutulup chiqqan qazaqistan puqrasi gülbahar jélilowa radiyomizning ziyaritini qobul qilip, özining xitay lagérida qandaq rohiy we jismaniy qiynaqlargha duch kelgenlikini anglatti.

Melum bolushiche, xitay da'iriliri gülbahar jélilowani “Térorchilargha iqtisadiy yardem bergen” dep lagérgha qamighan hemde uni “Xitay puqrasi” dep élan qilghan.

Xotendiki yighiwélish lagérida ishlen'gen kiyimlerning amérikida sétilishi qattiq tenqidke uchridi

Yéqinda amérikidiki dangliq tenterbiye kiyimliri zawutliridin bolghan “Bajér” shirkitining xotendiki “Teyda kiyim-kéchek hessidarliq shirkiti” ishlepchiqarghan bir qisim mehsulatlarni import qilghanliqi melum boldi.

Xewerlerde körsitilishiche, “Teyda” shirkiti xotendiki lagérlargha qamalghan Uyghurlarni mejburiy emgekke sélish bedilige méngiwatqan bolup, “Bajér” shirkitining mushundaq bir shirkettin bir qisim mehsulatni sétiwélishi xelq'araning zor naraziliqini qozghidi. “Nyo-york waqti” gézitining alaqidar tepsiliy xewerliride “Yépiq terbiyelesh merkizi” diki tutqunlarning erzan emgek küchi süpitide emgekke séliniwatqanliqi ashkarilandi.

Melum bolushiche, bu heqtiki xewerler xelq'arada tarqalghandin kéyin “Bajér” shirkiti özlirining “Teyda” shirkiti bilen bolghan barliq toxtamlirini bikar qilghan.

Enqere uniwérsitétining oqughuchisi ömerjan nuri tutqun qilin'ghan

Yéqinda enqere uniwérsitétining til we tarix-jughrapiye fakultétida tarix penliri boyiche doktorluq ilmiy unwani üchün oquwatqan ömerjan nuri ependi 2017-yili 3-ayda xoten shehride tutqun qilin'ghanliqi ashkarilandi.

Ömerjan nurining hazir türkiyede oquwatqan qizi sübhidur bu heqte melumat bérip dadisini ilgirimu xitay saqchilirining köp qétim aware qilghanliqini bildürdi.

Melum bolushiche, ömerjan nuri Uyghur tarixi boyiche köpligen eserlerni yazghan hemde terjime qilghan bolup, analizchilar “Xitay hökümiti herwaqet Uyghur tarixchilirini teqip qilip kelmekte” dédi.

Uyghurlargha yardem chaqiriqliri dunyaning hemmila yéride kötürülmekte

Uyghur jem'iyitining türlük kirizislargha duch kéliwatqanliqi heqqidiki axbarat xewerliri hemde ammiwi muhakimilerning tesiride herqaysi hökümetler Uyghurlar uchrawatqan zulum heqqide arqimu arqidin inkas qayturushqa bashlidi.

Ötken hepte amérika kéngesh palata ezasi koriy gardnér amérika hökümitini derhal tedbir élip Uyghurlargha yardem bérishke chaqirdi. “Washin'gton pochtisi” gézitimu mexsus tehrirat maqalisi élan qilip amérika prézidénti donald trampni Uyghurlar heqqide ipade bildürüshke chaqirdi.

Shuning bilen tengla dégüdek hindonéziye tashqi ishlar ministirliqi xitayning hindonéziyede turushluq bash elchisini chaqirtip, Uyghurlarning weziyiti heqqidiki endishilirini otturigha qoyghan. Türkiyening eng chong ammiwi teshkilatliridin biri bolghan “Kadirlar uyushmisi” Uyghurlargha yardem qilishqa chaqirish meqsitide b d t ning enqerediki ishxanisigha xet tapshurdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.