Heptilik xewerler (2 - séntebirdin 7 - séntebirgiche)


2007-09-07
Share

D u q bayanat élan qilip, xitay da'irilirini tenqid qildi

Dunya Uyghur qurultiyining bayanatchisi dilshat réshit xitay jama'et xewpsizlik ministirliqining, kompartiyining 17 - nöwetlik qurultiyi mezgilide bixeterlikke kapaletlik qilish heqqidiki chaqiriqigha nisbeten naraziliq bayanati élan qilip, béyjing rehberlirining her da'im qurultay mezgilide bixeterlikni kücheytish heqqide chaqiriq chiqirishi, hökümetning puqralargha bolghan endishisining ipadisi ikenliki, xelqning naraziliqidin qorqqan xitay hökümitining , démokratik ellerde eqelliy hoquq hésablan'ghan kishilerning " namayish qilish " hoquqinimu depsende qiliwatqanliqini körsetti.

Dilshat réshit sözide yene, Uyghurlarning kishilik hoquqining eng qattiq depsende boluwatqanliqini tekitlep, Uyghur aptonom rayonida yürgüzülüwatqan bu xil tengsiz siyasettin xelq'ara kishilik hoquq teshkilatlirining toluq xewerdar ikenliki, shunga xitayning " olimpik" murasimigha sahibxanliq qilishqimu layiq emeslikining dunyaning hemmila yéride tilgha éliniwatqanliqini otturigha qoydi.

Dunya Uyghur qurultiyi yene ramizan munasiwiti bilen Uyghur muhajirlargha murajetname élan qilip, ramazanni yaxshi ötküzüsh bilen öz- ara ittipaqliq, özara yardem bérish we hemkarliqni kücheytishni telep qildi.

Uyghur sen'etchiliri skandanowiyidiki " xitay medeniyet heptiliki" pa'aliyitige qatnashti

Xitay hökümiti shwétsiye , norwégiye ,gérmaniye qatarliq döletlerde ötküzilidighan xitay medeniyet féstiwaligha mexsus Uyghur élining artislirinimu qatnashturdi.

Burunqi pa'aliyetliride Uyghur artislirini arilashturmighan xitay diplomatiye sahesining bu qétim birdinla ataqliq Uyghur artisliridin dilnar abdulla, aman'gül sidiq qatarliq 33 kishidin terkip tapqan bir ömekni Uyghurlarning siyasiy pa'aliyetliri ewji alghan yuqiridiki döletlerge ewetishi kishilerning diqqitini qozghidi.

4 - Séntebir küni bu artislar shwétsiyige yétip kélip pa'aliyitini resmiy bashlighan. Shwétsiyidiki Uyghurlar ularni qarshi alghan.

Jorj bush bilen xu jintaw uchrashti

Amérika prézidénti jorj bush bilen xitay dölet re'isi xu jintaw , 6- séntebir küni awstraliyining sidnéy shehiride ötküzülgen asiya - tinch okyan hemkarliq teshkilatigha eza dölet bashliqlirining , aliy derijilik yighinida ayrim uchriship, amérika-xitay munasiwetliridiki bir qatar qiyin mesililer heqqide pikir almashturdi. Inkaslargha qarighanda, söhbetning asasliq témisi, xitay-amérika pul mu'amile mesilisi, darfur mesilisi hem diniy étiqad erkinliki , teywen mesilisi qatarliq muhim nuqtilargha qaritilghan.

Söhbet jeryanida xitayning amérikigha kirgüziwatqan mallirining süpiti mesilisi hemde xelq pulining almashturush qimmiti qatarliqlarmu tilgha élin'ghan iken.

Xewerlerdin qarighanda, xu jintaw prézidént bushni a'ilisi bilen béyjing olimpik yighinigha teklip qilghan.

Amérika dalay lamagha eng aliy " sherep " médali bermekchi

Amérika dölet mejlisi yéqinda bir qarar layihisi maqullap, öktebir éyida dölet mejlisining merkiziy yighin zalida murasim ötküzüp, tibetning diniy dahiysi dalay lamani amérikining eng aliy " sherep " médali bilen mukapatlaydighanliqini élan qildi.

Xewerlerdin qarighanda, tibetni himaye qilish xelq'ara teshkilatimu 17 - öktebir küni, amérika dölet mejlisi binasi aldidiki meydanda murasim ötküzidiken.

Hüseyin jélil tunji qétim a'ilisi bilen körüshti

Ötken yekshenbe yeni 2- séntebir küni kanada puqrasi hüseyin jélil tunji qétim anisi we singlisi bilen körüshtürülgen . Kanada Uyghur jemiyitining re'isi muhemmed toxtining bildürüshiche, ürümchi saqchi da'iriliri muddetsiz qamaq jazasigha höküm qilin'ghan hüseyin jélil bilen uning a'ilisining buningdin kéyinmu dawamliq körüshtürülidighanliqini bildürgen.

Hüseyin jélil kanada puqrasi bolup, özbékistan'gha barghanda özbék da'iriliri uni xitaygha tutup bergen idi. Hüseyin jélil mesilisi kanada -xitay otturisidiki talash-tartishliq mesilige aylan'ghan idi.

Wang léchü'en lyenjen bilen hemkarlashmaqchi

Uyghur aptonom rayoni partkomining sékritari wang léchü'en 9 - ayning 5 - küni ürümchide, teywendiki gomindang partiyisining pexri re'isi lyenjenni qizghin qarshi alghan we her xil saheler boyiche hemkarlishish üchün söhbet ötküzgen.

Wang léchü'en sözide néfit, tebi'iy gaz, su insha'ati, éléktir quwwiti, qatnash, uchur -alaqe qatarliq sahelerde teywendiki gomindangning herxil shekil bilen shinjangni échishqa qatnishishini, bu arqiliq ottura asiyadiki qoshna ellerge yüzlinishini qarshi alidighanliqini we bundaq ikki partiye hemkarliqini dawamliq kücheytidighanliqini bildürgen.

Teywendiki gomindang partiyisi teywen musteqilliqighe qarshi partiye bolup, u chén shüybyenning musteqilliq pikrige qarshi turmaqta. Gomindang partiyisining rehberlirining musteqilliq pikirliri ezeldinla mewjut bolghan Uyghur diyarigha kélishi közetküchilerning diqqitini tartti. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet