Heptilik xewerler (6- öktebirdin 12- öktebirgiche)

• Muxbirimiz ümidwarning bu heqtiki toluq melumati
• Download story audio

Rabiye qadir xanim, xelq'ara kishilik hoquq höjjetlik filim bahalash komitétining ezaliqigha saylandi

Téxi aldinqi heptide en'gliyide bir qatar pa'aliyetlerni élip bérip, en'giliye yuqiri derijilik hökümet we parlamént da'iriliri bilen körüshüp, Uyghurlar mesilisini tonushturup, washin'gton'gha qaytip kelgen Uyghur milliy herikitining rehbiri we dunya Uyghur qurultiyining re'isi rabiye qadir xanim, chéx jumhuriyitining sabiq prézidénti wsalaw xawélning riyasetchilikide we dunya hajetmen xelqler teshkilatining uyushturushi bilen praga shehiride, kéler yili may éyida ötküzülidighan, 10‏ - nöwetlik xelq'ara kishilik hoquq höjjetlik filim féstiwalining, bahalash komitétining ezaliqigha saylandi. Közetküchiler buni rabiye qadir xanimning xelq'ara miqyasida yuqiri hörmetke sazawer bolghanliqining bir ipadisi dep hésablimaqta.

Rabiye qadir xanim 2007-yilliq nobil tinchliq mukapatining namzatliqigha körsitilgen bolup, u her qétimda küchlük namzatlar qatarigha kirgen. Bu yilqi nobil tinchliq mukapati amérikining sabiq mu'awin prézidénti al gor ependige bérildi.

Uyghurlarda roza héyt ötküzdi

Ramizan éyi axirliship, 12- we 13-öktebir künliri dunyaning her qaysi jayliridiki musulmanlar mubarek roza héytini ötküzdi. Elwette, bu kün Uyghur musulmanliri üchünmu xasiyetlik we xushalliq kündur.

Amérika, türkiye , se'udi erebistan, yawropa ittipaqi we ottura asiya hem Uyghur élidiki Uyghurlar 12-13-öktebir küni roza héytni kütüwélish yüzisidin türlük pa'aliyetlerni élip bardi.

Amérika ermenilerning qirghinchiliqqa uchrash mesilisi heqqide qarar layihisi maqullidi

Amérika awam palata tashqi munasiwetler komitéti 10-öktebir küni amérika prézidénti bush we türkiye da'irilirining qarshi turushigha qarimay, 1 ‏- dunya urushi mezgilide osmanli impériyisining ermenlerge " irqiy tazilash" élip barghanliqini mu'eyyenleshtüridighan qarar layihisi maqullidi.

Türkiye mezkur qarar layihisining amérika - türkiye munasiwetlirige éghir derijide tesir körsitidighanliqini agahlandurmaqta. Bu qarar layihisidin kéyin türkiyining bir qisim jaylirida naraziliq namayishliri ötküzülgen hemde türkiye jama'etchilikide küchlük naraziliq inkasliri peyda bolghan. Türkiye izchil halda bundaq qirghinchiliqni inkar qilip kelgen.

Xitay amérikining dalay lamagha altun médal bérishige narazi boldi

Xitay tashqi ishlar minstirliqining bayanatchisi lyu jenchaw 11 - öktebir küni béyjingda muxbirlarni kütüwélish yighini ötküzüp, amérika dölet mejlisining dalay lamagha amérikining eng aliy altun médal mukapati bergenlikige qarshi turidighanliqini tekitlep, "biz her qandaq bir dölet yaki shexisning dalay lamadin junggoning ichki ishlirigha arilishish üchün paydilinishigha qarshi turimiz " dégen.

17-Öktebir küni altun médal bérish murasimigha prézidént bushmu qatnishidighanliqini jakarlighan bolup, bu xitay terepni bi'aram qilghan. Shu küni yene amérika dölet mejlisi aldidiki meydanda keng kölemlik xatirilesh pa'aliyiti ötküzülidu.

Amérika palata ezaliri xitay re'isi xu jintawgha imzaliq xet yollidi

Aldinqi heptide ashkarilinishiche, 19-séntebir amérika dölet mejlisi ezasi trén fanks , tom lantos qatarliq 33 neper palata ezasi imza qoyup, xitayda türmide yétiwatqan kishilik hoquq pa'aliyetchisi chén gu'angchéngni qoyup bérishke qistap we xitayning weyran qilish xaraktérige ige pilanliq tughut siyasitige qarita nezer aghdurushqa dewet qilip, xitay re'isi xu jintawgha muraji'etname yollighan.

Franks ependi we tom lantos ependi qatarliq mejlis ezaliri yene, Uyghur milliy herikitining rehbiri rabiye qadir xanimning balilirining qolgha élinishi qatarliq bir qatar mesililerge yéqindin köngül bolup , xitay hökümitidin ularni qoyup bérishni telep qilghan idi.

Merhum küresh küsen ependi wapatining bir yilliqi xatirilendi

6-Öktebir küni amérika paytexti washin'gton yénidiki fa'irfakis shehiride merhum kompozitor we siyasiy pa'aliyetchi küresh küsenning singlisi munewwer xanim we Uyghur amérika birleshmisining teshkillishi bilen küresh küsen wapatining bir yilliqigha atap nezir ötküzdi .

Merhumning bir yilliq xatirilesh murasimigha washin'gton etrapidiki Uyghurlar emes belki, nyuyork we niyuw jérsiy qatarliq shitatlardinmu bir qisim Uyghurlarmu kélip qatnashti. Bu pa'aliyette merhum küresh küsenning rohigha atap du'a-tilawet qilindi shuningdek uning mol mezmunluq ijadiy pa'aliyetliri we siyasiy küresh hayati eslep ötüldi.

Qedimiy kuchaning küsen namini özige texellus qilghan küresh sultan ötken yili. 29 -Öktebirde shwétsiyide tuyuqsiz qozghalghan yürek tiqilmisi bilen 47 yéshida qaza qilghan idi. Dunya Uyghur qurultiyining re'isi rabiye qadir xanim küresh küsenning wapatini Uyghur milliy herikiti üchün zor bir yoqitish dep teriplesh bilen uning Uyghur dawasigha qoshqan töhpilirining héchqachan untulmaydighanliqini körsetken idi.(Ümidwar)