Һәптилик хәвәрләр (5 - январдин 11 - январғичә)


2008-01-11
Share

Германийә йешиллар партийиси уйғурлар һәққидә тәклип лайиһиси сунди

12 - Айниң 5 - күни германийидики әң чоң төт партийиниң бири һесаблинидиған йешиллар партийисиниң германийә парламентидики вәкили волкербәк башлиқ 10 нәччә парламент әзаси мәзкур партийиниң уйғурлар һәққидики 16 түрлүк тәклип лайиһисини парламентқа қойған болуп, уйғур мәсилиси бир саәттин артуқ вақит герман парламент әзалириниң музакирә темисиға айланған.

Мәзкур тәклип лайиһисидә уйғурларниң сиясий, иқтисадий, мәдәнийәт, маарип,тил вә башқа кишилик һоқуқлириниң қоғдаш астиға елиниши тәшәббус қилинған болуп, мәсилиләр бир қәдәр әтраплиқ оттуриға қоюлған. Бу мунасивәт билән дуня уйғур қурултийи рәһбәрлири йешиллар партийисигә өз рәһмитини билдүрүш билән мәзкур тәклип лайиһисидә уйғурларниң дуч келиватқан мәсилилириниң асасән йорутулғанлиқини муәййәнләштүрди.

Ваң лечүән билән нур бәкри 2008 - йили муқимлиқни күчәйтмәкчи

9 - январ күни үрүмчидә уйғур аптоном районлуқ сиясий қанун хизмәт йиғини ечилған болуп, партком секритари ваң лечүән сөз қилип, һәр дәриҗилик органларни үч хил күчләр' дин һушяр болушқа, болупму, олимпик мусабиқиси өткүзүлүш алдида турғанда муқимлиқни иккила қолда тутуш' қа, 'һәр икки қол қаттиқ болушқа, 'тәшәббускарлиқ билән һуҗумға өтүш, баш көтәрсила зәрбә бериш, алдин қол селиш" тин ибарәт истратегийисини техиму күчәйтишкә чақирди.

Ваң лечүән "муқимлиқ һәммини бесип чүшиду" дегән принсипта чиң турушни йәнә тәкитлигән болуп, муавин секритар нур бәкриму идеологийә саһәсидики миллий бөлгүнчиликкә қаттиқ зәрбә беришни күчәйтишни оттуриға қойди. Әтиси уйғур аптоном районлуқ һөкүмәтму йиғин ечип, 2008 - йили муқимлиқ хизмитини яхши ишләш һәққидә сәпәрвәрлик қилди.

2007 - Йили, уйғурларниң хәлқарада елип барған паалийәтлири юқири көтүрүлгән бир йил болуп, д у қ рәиси рабийә қадир прагада америка президенти җорҗ буш билән көрүшкән шуниңдәк йәнә ақ сарай хадимлири биләнму учрашқандин сирт йәнә явропа иттипақи, японийидә зиярәттә болуп, уйғурлар мәсилисини әтраплиқ тонуштурған иди.

Қағилиқтин 87 нәпәр уйғур яш чиңдав шәһиригә йолға селинди

Қағилиқ наһийиси һөкүмәт хәвәрлиридин ашкарилинишичә, бу йил киргәндин башлап қағилиқ наһийисидә уйғур яшларни хитай өлкилиригә йөткәш ишлири йәнә елип бериливатқан болуп, 2 - январ күни қағилиқ наһийисидин 87 нәпәр уйғур яш чиңдавға елип кетилгән. Уларни узутушқа наһийилик партком вә һөкүмәт һәм йеза кадирлири қатнашқан.

Қизиқ йери шуки, илгири пүтүнләй қизлар ичкиригә елип кетилгән болса, бу қетим 87 нәпәриниң һәммисигә оғул бала талланған. Булар қағилиқтин йолға селинған 5 - түркүмдики яшлар икән.

Америка президенти җорҗ буш оттура шәрқ зияритини давамлаштуруватиду

Америка президенти җорҗ буш 1 ‏- айниң 8 ‏- күни түркийә президенти абдулла гүл билән көрүшкәндин кейин, оттура шәрқ зияритини башлиған иди. Президент буш бу қетим 16 - январға қәдәр исраилийә, пәләстин, әрәб хәлипилики, кувәйт, сәуди әрәбистани, мисир қатарлиқ дөләтләрдә сәккиз күн зиярәттә болиду. Президент буш пәйшәнбә вә җүмә күнлири айрим-айрим һалда исраилийә баш министири ормут, пәләстин һөкүмитиниң рәиси махмуд аббас қатарлиқлар билән көрүшүп, пәләстин мәсилисини музакирә қилип, икки дөләт арисида келишим һасил қилинип, оттура шәрқ вәзийитини тенчландурушқа тиришчанлиқ көрситидиғанлиқини билдүргән.

Президент буш исраилийә сәпири җәрянида 2-җаһан урушида натсистларниң йәһудиларни қирғин қилғанлиқиға мунасивәтлик хатирә сарийини зиярәт қилип, матәм билдүрди шуниңдәк у пәләстин мәсилисини һәл қилишта исраилийә һөкүмитини бәзи җәһәтләрдин йол қоюшқа чақирди.

Д у қ вәкиллири түркийә җумһурийити баш министири тайип әрдоған вә униң мәслиһәтчиси буләнт аринч әпәндиләр билән көрүшти

1 - Айниң 8 - күни дуня уйғур қурултийи муавин башлиқи сейит түмтүрк әпәнди башчилиқидики бир һәйәт түркийә җумһурийити баш министири тайип әрдоған билән көрүшүп, шәрқий түркистан мәсилисини изһар қилған. Шу күни йәнә мәзкур вәкилләр өмики сабиқ парламент башлиқи, баш министир рәҗәп тайип әрдоғанниң баш мәслиһәтчиси буләнт аринч әпәнди парламент бинасидики ишханисида көрүшкән.

Бу учришишта алди билән д у қ муавин башлиқи сейит түмтүрк әпәнди униңға д у қ рәиси рабийә қадир ханимниң салимини йәткүзгәндин кейин, уйғурларниң бүгүнки вәзийити һәққидә қисқичә мәлумат бәрди вә уйғурларниң бүгүнки вәзийити һәққидә д у қ тәрипидин тәйярланған` шәрқий түркистан мәсилиси вә чәтәлдики шәрқий түркистанлиқлар` мавзулуқ доклатни бәрди.

Буләнт аринч әпәнди сөз қилип, өзиниң шәрқий түркистан давасиниң қоллиғучиси икәнлики, уйғурларниң һәрикәтлирини қоллайдиғанлиқи һәм уйғурларниң һөрлүкигә тиләкдаш икәнликини билдүрди.

Түркийиниң зәйтунбурну районида шәрқий түркистан маарип вә һәмкарлиқ җәмийитиниң шөбиси қурулди

Түркийидики уйғур тәшкилатлири оз паалийәтлирини күчәйтмәктә. Шитаби әнқәрәдики шәрқий түркистан мәдәнийәт һәмкарлиқ җәмийитиму йеқиндин буян бир қатар мувәппәқийәтләрни қолға кәлтүргән иди. 1 ‏- Айниң 6 ‏- күни түркийидә паалийәт қиливатқан шәрқий түркистан маарип вә һәмкарлиқ җәмийити, истанбул шәһириниң уйғурлар зич олтурақлашқан зәйтунбурну районида өз шөбисини қуруп, ечилиш мурасимини өткүзди.

Ечилиш мурасимға истанбул, әнқәрә, қәйсәри қатарлиқ шәһәрләрдин кәлгән җәми 200 дин артуқ муһаҗир қатнашти. Мурасимға шәрқий түркистан маарип вә һәмкарлиқ җәмийитиниң баш катипи һәққаний әпәнди риясәтчилик қилди. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт