Heptilik xewerler (5 - yanwardin 11 - yanwarghiche)

• Muxbirimiz ümidwarning bu heqtiki toluq melumati
• Download story audio

Gérmaniye yéshillar partiyisi Uyghurlar heqqide teklip layihisi sundi

12 - Ayning 5 - küni gérmaniyidiki eng chong töt partiyining biri hésablinidighan yéshillar partiyisining gérmaniye parlaméntidiki wekili wolkérbek bashliq 10 nechche parlamént ezasi mezkur partiyining Uyghurlar heqqidiki 16 türlük teklip layihisini parlaméntqa qoyghan bolup, Uyghur mesilisi bir sa'ettin artuq waqit gérman parlamént ezalirining muzakire témisigha aylan'ghan.

Mezkur teklip layihiside Uyghurlarning siyasiy, iqtisadiy, medeniyet, ma'arip,til we bashqa kishilik hoquqlirining qoghdash astigha élinishi teshebbus qilin'ghan bolup, mesililer bir qeder etrapliq otturigha qoyulghan. Bu munasiwet bilen dunya Uyghur qurultiyi rehberliri yéshillar partiyisige öz rehmitini bildürüsh bilen mezkur teklip layihiside Uyghurlarning duch kéliwatqan mesililirining asasen yorutulghanliqini mu'eyyenleshtürdi.

Wang léchü'en bilen nur bekri 2008 - yili muqimliqni kücheytmekchi

9 - Yanwar küni ürümchide Uyghur aptonom rayonluq siyasiy qanun xizmet yighini échilghan bolup, partkom sékritari wang léchü'en söz qilip, her derijilik organlarni üch xil küchler' din hushyar bolushqa, bolupmu, olimpik musabiqisi ötküzülüsh aldida turghanda muqimliqni ikkila qolda tutush' qa, 'her ikki qol qattiq bolushqa, 'teshebbuskarliq bilen hujumgha ötüsh, bash kötersila zerbe bérish, aldin qol sélish" tin ibaret istratégiyisini téximu kücheytishke chaqirdi.

Wang léchü'en "muqimliq hemmini bésip chüshidu" dégen prinsipta ching turushni yene tekitligen bolup, mu'awin sékritar nur bekrimu idé'ologiye sahesidiki milliy bölgünchilikke qattiq zerbe bérishni kücheytishni otturigha qoydi. Etisi Uyghur aptonom rayonluq hökümetmu yighin échip, 2008 - yili muqimliq xizmitini yaxshi ishlesh heqqide seperwerlik qildi.

2007 - Yili, Uyghurlarning xelq'arada élip barghan pa'aliyetliri yuqiri kötürülgen bir yil bolup, d u q re'isi rabiye qadir pragada amérika prézidénti jorj bush bilen körüshken shuningdek yene aq saray xadimliri bilenmu uchrashqandin sirt yene yawropa ittipaqi, yaponiyide ziyarette bolup, Uyghurlar mesilisini etrapliq tonushturghan idi.

Qaghiliqtin 87 neper Uyghur yash chingdaw shehirige yolgha sélindi

Qaghiliq nahiyisi hökümet xewerliridin ashkarilinishiche, bu yil kirgendin bashlap qaghiliq nahiyiside Uyghur yashlarni xitay ölkilirige yötkesh ishliri yene élip bériliwatqan bolup, 2 - yanwar küni qaghiliq nahiyisidin 87 neper Uyghur yash chingdawgha élip kétilgen. Ularni uzutushqa nahiyilik partkom we hökümet hem yéza kadirliri qatnashqan.

Qiziq yéri shuki, ilgiri pütünley qizlar ichkirige élip kétilgen bolsa, bu qétim 87 neperining hemmisige oghul bala tallan'ghan. Bular qaghiliqtin yolgha sélin'ghan 5 - türkümdiki yashlar iken.

Amérika prézidénti jorj bush ottura sherq ziyaritini dawamlashturuwatidu

Amérika prézidénti jorj bush 1 ‏- ayning 8 ‏- küni türkiye prézidénti abdulla gül bilen körüshkendin kéyin, ottura sherq ziyaritini bashlighan idi. Prézidént bush bu qétim 16 - yanwargha qeder isra'iliye, pelestin, ereb xelipiliki, kuweyt, se'udi erebistani, misir qatarliq döletlerde sekkiz kün ziyarette bolidu. Prézidént bush peyshenbe we jüme künliri ayrim-ayrim halda isra'iliye bash ministiri ormut, pelestin hökümitining re'isi maxmud abbas qatarliqlar bilen körüshüp, pelestin mesilisini muzakire qilip, ikki dölet arisida kélishim hasil qilinip, ottura sherq weziyitini ténchlandurushqa tirishchanliq körsitidighanliqini bildürgen.

Prézidént bush isra'iliye sepiri jeryanida 2-jahan urushida natsistlarning yehudilarni qirghin qilghanliqigha munasiwetlik xatire sariyini ziyaret qilip, matem bildürdi shuningdek u pelestin mesilisini hel qilishta isra'iliye hökümitini bezi jehetlerdin yol qoyushqa chaqirdi.

D u q wekilliri türkiye jumhuriyiti bash ministiri tayip erdoghan we uning meslihetchisi bulent arinch ependiler bilen körüshti

1 - Ayning 8 - küni dunya Uyghur qurultiyi mu'awin bashliqi séyit tümtürk ependi bashchiliqidiki bir hey'et türkiye jumhuriyiti bash ministiri tayip erdoghan bilen körüshüp, sherqiy türkistan mesilisini izhar qilghan. Shu küni yene mezkur wekiller ömiki sabiq parlamént bashliqi, bash ministir rejep tayip erdoghanning bash meslihetchisi bulent arinch ependi parlamént binasidiki ishxanisida körüshken.

Bu uchrishishta aldi bilen d u q mu'awin bashliqi séyit tümtürk ependi uninggha d u q re'isi rabiye qadir xanimning salimini yetküzgendin kéyin, Uyghurlarning bügünki weziyiti heqqide qisqiche melumat berdi we Uyghurlarning bügünki weziyiti heqqide d u q teripidin teyyarlan'ghan` sherqiy türkistan mesilisi we chet'eldiki sherqiy türkistanliqlar` mawzuluq doklatni berdi.

Bulent arinch ependi söz qilip, özining sherqiy türkistan dawasining qollighuchisi ikenliki, Uyghurlarning heriketlirini qollaydighanliqi hem Uyghurlarning hörlükige tilekdash ikenlikini bildürdi.

Türkiyining zeytunburnu rayonida sherqiy türkistan ma'arip we hemkarliq jem'iyitining shöbisi quruldi

Türkiyidiki Uyghur teshkilatliri oz pa'aliyetlirini kücheytmekte. Shitabi enqerediki sherqiy türkistan medeniyet hemkarliq jem'iyitimu yéqindin buyan bir qatar muweppeqiyetlerni qolgha keltürgen idi. 1 ‏- Ayning 6 ‏- küni türkiyide pa'aliyet qiliwatqan sherqiy türkistan ma'arip we hemkarliq jem'iyiti, istanbul shehirining Uyghurlar zich olturaqlashqan zeytunburnu rayonida öz shöbisini qurup, échilish murasimini ötküzdi.

Échilish murasimgha istanbul, enqere, qeyseri qatarliq sheherlerdin kelgen jemi 200 din artuq muhajir qatnashti. Murasimgha sherqiy türkistan ma'arip we hemkarliq jemiyitining bash katipi heqqaniy ependi riyasetchilik qildi. (Ümidwar)