Heptilik xewerler (12 - iyundin 18 - iyun'ghiche)


2010-06-18
Share

Rabiye qadir xanim italiye luka parlaméntining erkinlik mukapatigha érishti

17 ‏- Iyun italiye luka ölkisining parlaménti Uyghur milliy herikiti rehbiri rabiye qadir xanimgha "erkinlik mukapati" berdi. Mukapatni rabiye qadir xanimning kenji qizi qéqinus sidiq xénim rabiye xanimgha wakaliten tapshurup aldi.

17 - Iyun, luka ölkilik parlamént re'isi shtafan buchali qéqinus xénim, dunya Uyghur qurultiyi wekilliridin ömer qanat we alim séyitoflarni kütüwaldi. Luka ölkilik parlamént, rabiye qadir xanim élip bériwatqan pa'aliyetlerge yuqiri baha berdi.

18 ‏- Iyun rabiye qadir xanimni yene, italiyining Societa Libera teshkilati kishilik hoquq mukapati bilen mukapatlidi.

Sidiqhaji rozi ependining doklat bérish pa'aliyiti tokyoda bashlandi

Obzorchi sidiqhaji rozi ependining doklat bérish pa'aliyiti 16 - iyun tokyoda bashlandi. Obzorchi sidiqhaji rozi ependi 16 -iyundin 28 - iyun'ghiche yaponiyining bir qanche uniwérsitétida doklat béridu.
 
U, yaponiyide "5 - iyul ürümchi qirghinchiliqini untumang", "sétiwétilgen sherqiy türkistan"dégen témilarda doklat béridu. Obzorchi sidiqhaji rozi, 6 - ayning 16 - 17 - künliri yaponiyining tokyo shehiride yapon mutexessisler bilen söhbet yighinliri ötküzgen we muxbirlargha bayanat bergen.

Yaponiye kagoshima xelq'ara uniwérsitéti oqutquchisi doktor haji qutluq qadiri bu pa'aliyetlerning yaponiyining iqtisadiy yardimi bilen ötküzülüwatqanliqini bildürdi. Uning éytishiche, bu pa'aliyet 6 - ayning 16 - künidin 28 - künigiche dawam qilidiken.

Istanbuldiki Uyghurlar Uyghur yeslisidiki ösmürlerni mukapatlash munasiwiti bilen jem boldi

2010 ‏- Yili 6 ‏- ayning 12 ‏- küni istanbulda ösmürlerning qur'an kerim oqush we ana tilda sözlishish netijilirini mukapatlash murasimi ötküzüldi.

Murasimni sherqiy türkistan ma'arip we hemkarliq jem'iyiti uyushturghan. Yighin istanbul zeytinburnu rayonida élip bérildi.

Bu Uyghur ösmürler sherqiy türkistan ma'arip we hemkarliq jem'iyiti teripidin istanbulning zeytinburnu we sefaköy rayonlirida échilghan yeslilerdin kelgen.

Murasimgha istanbulda yashawatqan Uyghur aqsaqalliridin seley hajim artushi qatarliq péshqedem ustazlar, sherqiy türkistan ammiwi teshkilat mes'ulliri we istanbulda yashawatqan Uyghurlardin köp sanda kishi qatnashti.

Amérika doklat élan qilip, xitayda adem etkeschilik ehwalining yenila nahayiti éghir ikenlikini bildürdi

Amérika tashqi ishlar ministirliqi düshenbe küni dunyadiki "adem etkeschilik mesilisi" heqqide doklat élan qilip, xitayni yene bir qétim adem etkeschilik mesiliside "közitilidighan döletler tizimliki"ge kirgüzdi.
 
Doklatta Uyghur élining bezi jaylirida déhqanlarni hashargha tutush, balilarni mejburiy emgekke sélish ehwalining dawamlishiwatqanliqi ilgiri sürülgen.

Doklatta dunyadiki 177 döletning adem etkeschilik ehwalidin melumat bérilgen.

Doklatta xitaydiki adem etkeschilik ehwaligha baha bérip, xitay "erler, ayallar we balilar etkeschiliki, bolupmu ularni mejburiy emgekke sélish, pahishilikke mejburlash etkeschilikining menbesi, ötkünchi békiti we axirqi pellisi" dep körsetken.

Amistérdamda Uyghurlargha yardem bérish kulubi 2‏ - qétimliq yéghin uyushturdi

6 - Ayning 14 - küni gollandiye parlamént ezasi xarri fan bommil ependi bashchiliqida qurulghan Uyghurlargha yardem bérish kulubi yéghin achti.

Yighinda 5 - iyul ötküzülidighan naraziliq namayish pa'aliyitining konkrét pilan - layihiliri maqullinip, munasiwetlik xadimlargha xizmet teqsim qilindi. Hemme birdek ittipaqliship bu qétimqi pa'aliyette Uyghurlarning awazini yuqiri pellige kötürüshke wede berdi.

Yéghin'gha kulub ezaliridin 20 din artuq adem qatnashti. Yéghin shu yer waqti 7 de bashlinip bir yérim sa'ettin artuq dawam qilip, kéler qétimliq uchrishish waqtini békitkendin kéyin axirlashti.

"Uyghurlargha yardem bérish kulubi'' gollandiyidiki s p sotsiyal partiyisining asasliq rolchiliridin bolghan xarri fan bommil ependining teshkillishi bilen bu yil 4 - ayning 19 - küni amistérdam sheherlik hökümet binasining yéghin zalida qurulghan idi.

D u q wekili b d t kishilik hoquq kéngishining 14 - nöwetlik yighinigha qatnashti

D u q wekili b d t kishilik hoquq kéngishining 14 - nöwetlik yighinigha qatnashti. B d t kishilik hoquq kéngishining 14 - nöwetlik yighini 5 - ayning 31 - küni jenwede bashlan'ghan.

D u q bash katipi dolqun eysa ependi 6 - ayning 14 - künidin bashlap Uyghurlargha wakaliten bu qétimqi yighin'gha qatnashmaqta.

Dolqun eysa ependi, d u q ning yillardin buyan b d t kishilik hoquq kéngishi yighinigha jiddiy köngül bölüwatqanliqini tilgha aldi. D u q wekilliri bir qanche aydin buyan bu yighinning teyyarliq xizmetlirini estayidil qanat yaydurghan we köpligen döletler we xelq'araliq teshkilatlarning wekilliri bilen uchrashqan.

Xitay bezi nahiyilerde Uyghurlargha chet'el muxbirlirini qobul qilmasliq belgilimisi chiqardi

Dunya Uyghur qurultiyi bayanatchisi dilshat rishitning bildürüshiche, Uyghur élining toqquzaq, peyziwat we poskam nahiyiliride, ahalilerning chet'el muxbirlirining ziyaritini qobul qilishi cheklen'gen.

Uqturushta yene, ahaliler öz béshimchiliq bilen chet'el muxbirining ziyaritini qobul qilsa jawabkarliqi sürüshte qilinidighanliqi bildürülgen.

Bash shtabi parizhdiki chégrisiz muxbirlar teshkilati bayanat élan qilip, xitay da'iriliri Uyghur élide yolgha qoyghan cheklimilerni tenqidlidi.

Xitay da'iriliri uchar yézisida kelkündin özini qutuldurghanlarni qolgha aldi

Yéngisar nahiyisining uchar yézisida zor kelkün apiti yüz bergen. 10 Mingdin artuq adem apetning ziyinigha uchrighan.

Dunya Uyghur qurultiyi bayanatchisi dilshat rishitning bildürüshiche, hökümet da'iriliri apettin qutquzush tedbirlirini waqtida almighan. Hökümet inkas qayturmighandin kéyin özini qutquzush üchün heriket qilghanlarni bolsa "jem'iyetni qalaymiqan qilish" jinayiti bilen eyibligen we 13 Uyghurni qolgha alghan.
 
Uchar yéziliq saqchixana xadimi 13 ademning qolgha élin'ghanliqini inkar qilmighan. U muxbirgha "men bu so'alingizgha jawab bérelmeymen" dégen.

Halbuki, uchar yéziliq hökümet katipi ziyaritimizni qobul qilip, yuqiriqi xewerni inkar qildi.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet