Heptilik xewerler (4 - séntebirdin 10 - séntebirgiche)

Muxbirimiz jüme
2010.09.10

Uyghurlar roza héytni kütüwaldi

9 - Séntebir, amérika paytexti washin'gton we uning etrapida yashaydighan Uyghurlar roza héytini kütüwaldi, héyt namizini bille oqudi we bayramlirini öz ‏- ara tebrikleshti.

Uyghur milliy herikiti rehbiri rabiye qadir xanim, pütün dunyadiki Uyghurlargha we pütün dunya musulmanlirigha, shuningdek oqutquchi ustazlargha özining tebrikliri bilen bayramliq salamlar yollidi.

Qazaqistan, türkiye, özbékistan we qirghizistan qatarliq döletlerdiki Uyghurlarmu roza héytni tebriklidi.Yawropa elliri we awstraliye qatarliq döletlerde yashawatqan Uyghurlarmu rozi héytni özgiche shekilde tebrikleshti.

Halbuki, Uyghur élidiki Uyghurlar jümlidin barliq musulman qérindashlarning bu yilqi roza héytini yenila siqilish ichide ötküzgenliki ilgiri sürülmekte.

Dunya Uyghur qurultiyi bayanatchisi dilshat rishitning bildürüshiche, Uyghurlar bu yilqi rozi héytini xitayning qattiq zerbisi we qattiq nazariti astida ötküzmekte iken.

Rabiye qadir xanim heqqidiki kitab "ejdiha bilen élishish" shiwétche neshrdin chiqish aldida turmaqta

Shwétsiye Uyghur komitétining bildürüshiche, Uyghur milliy herikiti rehbiri rabiye qadir xanim heqqide yézilghan "ejdiha bilen élishish" namliq kitab, shwéd tilida neshrdin chiqish aldida turmaqta.

Melum bolushiche, bu kitab, 10 ‏- ayning 5 ‏ - yaki 6 ‏ - künliri neshrdin chiqmaqchi. Shwétsiye Uyghur komitétining munasiwetlik orunlardin igilishiche, kitab deslepte 5000 tirazh neshr qilinidiken. Kitab bazargha sélinish aldida, shwétsiye parlaméntida mexsus mezkur kitabni tonushturush murasimi ötküzülidighan bolup, murasimgha rabiye qadir xanimmu teklip qilinishi mumkin.

Bu kitab ilgiri gérmanche, in'glizche we yaponche qatarliq tillarda neshr qilin'ghan idi.

Uyghur milliy herikiti rehbiri rabiye qadir xanim amérikidiki teywenliklerning yazliq yighinigha qatnashti

Yighin, 2010 - yili 3 ‏ - séntebirdin 5 ‏ - séntebirgiche amérikining téksas shtatida ötküzülgen.
 
Yighin, téksasning a'ustin shehiridiki bir aliy méhmanxanida échilghan. Yighinda rabiye xanim heqqide ishlen'gen muhebbetning 10 sherti namliq filim qoyulghandin bashqa, rabiye xanim Uyghur milliy herikiti we Uyghur weziyiti heqqide söz qilghan.

Yighin'gha 200 din artuq kishining qatnashqanliqi, rabiye xanimning nutqidin barliq yighin qatnashquchilirining qattiq hayajanlan'ghanliqi ilgiri sürülmekte.

Melum bolushiche, rabiye xanimning nutqidin tesirlen'gen teywenlikler, Uyghur milliy herikitini yéqindin qollaydighanliqini bildürgen we dunya Uyghur qurultiyining yéqinda ötküzülidighan pa'aliyiti üchün yardem qilidighanliqi heqqide wede bergen.

Dunya Uyghur qurultiyi b d t ning jenwediki merkizide we yawropa parlaméntida mexsus wekil turghuzdi

Dunya Uyghur qurultiyi bu heqtiki bayanatida, wekillikke teyinlen'gen ikki alahide xadimning jenwe we bryussélgha bérip arqa - arqidin ish bashlighanliqini bildürgen.

Melum bolushiche, kanada Uyghur jem'iyitining sabiq re'is memet toxti bryussélgha, amérika Uyghur jem'iyiti xadimliridin kesiy poli'as xanim jenwe teyinlen'gen.

Dunya Uyghur qurultiyi bayanatida mezkur orunlashturushning sewebini chüshendürüp, sherqiy türkistan mesilisini "b s t we yawropa parlaméntigha oxshash xelq'ara organlarning küntertipige kirgüzüsh rabiye qadir xanim yétekchilikidiki d u q ning muhim xizmet programmiliridin biri" ikenlikini ilgiri sürgen.

Yawropa bixeterlik we hemkarliq teshkilati noruz bayrimini xelq'araliq bayram süpitide étirap qildi

Tajikistan asiya - plus agéntliqining xewer qilishiche, yawropa bixeterlik we hemkarliq teshkilatining bash sékrétari mark perrén de brishambo bu heqtiki qarargha imza qoyghan.

23 - Féwral b d t ning 64 - qétimliq yighinidimu noruzning xelq'araliq ehmiyiti étirap qilin'ghan hemde 21 - mart xelq'araliq noruz bayram küni qilip békitilgen idi.

Noruz Uyghurlarning en'eniwi bayramlirining biri bolup, Uyghurlarmu noruzni esirlerdin biri tebriklep kelmekte.

Xitay, ishchilar hoquqi depsende qiliniwatqan döletler qatarigha kirgüzüldi

Amérikidiki kishilik hoquq teshkilatliridin"erkinlik sariyi" 1 ‏- séntebir dunyadiki ishchilar hoquqining omumi ehwali heqqide doklat élan qilip, xitayni ishchilar hoquqi depsende qiliniwatqan döletler qatarigha kirgüzdi.

Doklatning asiya - tinch okyan rayonigha alaqidar qismida, ishchilar hoquqining kapaletke ige bolushi jehette, awstraliye, yéngi zéllandiye we jenubiy koriye birinchi rette, yaponiye we teywen ikkinchi rette orun aldi.

Xitay bolsa afghanistan we kambodzha qatarliq döletler bilen bir qatarda ishchilar hoquqi depsende qilin'ghan döletler qatarigha tizildi.

Amérika di'alog fondi jem'iyiti xitaydin 22 neper Uyghur siyasiy mehbusning iz ‏ - dérikini bérishni telep qilghan

Mezkur jem'iyet bu heqtiki teleplirini2009‏ - yili 11‏ - ayda xitay da'irilirige tapshurghan. Melum bolushiche, yéqinda xitay terep mezkur jem'iyetni bu heqtiki bezi uchurlar bilen teminligen.

Tizimlik yollan'ghandin kéyin, Uyghur aptonom rayoni da'iriliri bu yil 7 ‏ - ayghiche wasitilik qanallar arqiliq mezkur jem'iyetke 18 neper mehbusning ehwalidin melumat bergen. Lékin 22 kishilik tizimliktiki 4 neper mehbusning tépilmighanliqini bildürgen.

Di'alog fondi jem'iyiti ismi tépilmighan mehbuslarning isim xataliqi yaki bu kishilerning xitay türme sistémisigha téxi kirgüzülmigen bolushi mumkinlikidin guman qilidighanliqini eskertmekte.


 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.