Һәптилик хәвәрләр (20-январдин 26-январғичә)


2008-01-25
Share

Қазақистандики уйғур тиҗарәтчилири кулуби "илһам мукапати" ни тарқатти

Қазақистан уйғур тиҗарәтчилири йеқинқи он йилдин буян өз миллитиниң мәдәнийәт -маарип вә сәнәт ишлириниң тәрәққиятини маддий җәһәттин қоллаш арқилиқ көрүнәрлик нәтиҗиләрниң қолға келишини илгири сүрмәктә. Дилмурат қозийев башчилиқидики қазақистан уйғур тиҗарәтчилири кулуби "илһам" дәп аталған бир мукапат тәсис қилған болуп, улар бир қанчә йиллардин буян һәр йили бир қетим баһалаш елип берип, әдәбият -сәнәт, иҗтимаий вә тәбиий пәнләр һәм башқа саһәләрдә көзгә көрүңән вә нәтиҗә яратқанларни мукапатлашни давамлаштурмақта. 2 ‏- январ күни алматадики мухтар әвизоф намидики дөләтлик теятирханида 2007-йиллиқ "илһам мукапати" ни тарқитиш мурасими өткүзүлди . Чәтәл әлчилири вә дөләт әрбаблири қатнашқан мәзкур паалийәттә мәдәнийәт сепидики җүмлидин әдәбият , сәнәт , тинчлиқ қатарлиқ саһәләрдә мол нәтиҗә яратқан төһпикарлар мукапатланди. Бу қетимқи мукапатниң тури алдинқи йилдикидин көпәйгән болуп, униң даирисигә тинчлиқ мукапатиму киргүзүлгән .

Илида бир қисим чәтәлликләр тазиланди

21- январ күни , или қазақ аптоном областида һөкүмәт һәмдә сақчи даирилириниң бирликтә , чегридин қанунсиз киргән , рәсмийәтсиз туруватқан һәм қанунсиз ишләватқан йәни чәтәл тили дәрси берип, оқутқучилиқ қиливатқан чәт әлликләргә қарита үч хил қанунсизларни тазилаш һәрикити башлиғанлиқи вә бу җәрянда 19 чәтәлликни қолға алғанлиқи хәвәр қилинди. Или қазақ аптоном областлиқ һөкүмәт тор бетиниң хәвәр қилишичә, мәзкур чәтәлликниң 17 нәпири қанунсиз чегридин киргәнләр болуп, икки нәпири қанунсиз ишлигәнләр икән. Или даирилири йәнә түрлүк тәкшүрүш вә контрол қилиш чарилирини ишқа ашуруватқан болуп, улар бу арқилиқ 2008-йиллиқ бейҗиң олимпик тәнһәрикәт йиғинниң ғәлибилик ечилишини капаләткә игә қилиш һәм шу вақиттики аманлиқ тәртипини сақлаш муддиасиға йәтмәкчи икән.

Үрүмчидә қораллиқ биңтүән тәрбийиләйдиған чоң бина селинишқа башлиған

Үрүмчидики вуҗачү дәп атилидиған хитай қурулуш армийисиниң туралғу җайи рәсмий шәһәр қилип өзгәртилгәндин буян ,униң тәрәққият сүрити тез болмақта, йеқинда вуҗачүдә урушқа тәйярлиқ көрүш тәлипи бойичә қораллиқ биңтүән әскәрлирини тәрбийиләйдиған бир қоманданлиқ шитаби қурулған вә бу орган үчүн чоң бина селинишқа башлиған. Бу чоң бинаниң нами екологийилик һәрбий газарма' дәп атилидикән. Нөвәттә, биңтүәнниң һәрбий тәйярлиқ ишлириғиму алаһидә көңүл бөлүватқанлиқи мәлум.

Биңтүән даирилири өзлириниң адәм санини икки йерим милйон дәп елан қиливатқан болсиму, лекин уларниң әмәлийәттики саниниң буниңдин хели көп икәнлики пәрәз қилинмақта. Биңтүән уйғур елида пәйда болғандин буян йәрлик хәлқләрниң қаршилиқ һәрикәтлирини бастуруп кәлгән болуп, улар адәттә қораллиқ деһқанлар дәп қарилиду.

Уйғур аптоном райони һөкүмитидә һоқуқ тәңшәш елип берилди

22- январ күни уйғур аптоном районида һоқуқ тәңшәш елип берилған болуп, аптоном районниң юқири рәһбәрлик орнида өзгириш болған. Бу өзгиришләр уйғур аптоном райони 11- нөвәтлик хәлқ қурултийи 3- қетимлиқ омуми йиғининиң нәтиҗиси сүпитидә болған . Уйғур аптоном райониниң рәиси, муавин рәислири, хәлқ қурултийиниң мудири вә муавин мудирлири һәм юқири сот мәһкимисиниң башлиқи қатарлиқлар бекитилип чиқилған.

Бу нөвәтлик йиғинда 9 нәпәр муавин рәис бекитип чиқилған болуп, буларниң ичидә бәш нәпәр хитай , бир нәпәр қазақ бар икән. Уйғур аптоном райониниң рәисләр қатлимида хитайларниң сани уйғурлардин артуқ болған. Бу қетим нур бәкри рәисликкә рәсмий бәкитилгән болуп, у сөз қилип , өзиниң аталмиш үч хил күчләргә қаттиқ зәрбә беридиғанлиқи, партийә һөкүмәткә садиқ болуп хизмәт қилидиғанлиқи вә башқа хизмәтләр бойичә вәдә бәргән. Нур бәкриниң рәис болуши уйғурлар арисида түрлүк инкасларни қозғимақта.

Русийә баш шитаб башлиқи; русийә таҗавузчилиққа ядро қорали арқилиқ җаваб бериду

Өткән шәнбә күни русийә қораллиқ күчлири баш қоманданлиқ шитаб башлиқи генерал армийә юрий балуевский "дуня шуни чүшиниши лазимки, русийә әгәр зор хәвпкә дуч кәлсә, ядро қораллирини өз ичигә алған һәрбий күчлири билән өзини қоғдайду, русийиниң башқа дөләтләргә һуҗум қилиш пилани йоқ" дәп билдүрди. У, сөзидә русийиниң вә униң иттипақдашлириниң игилик һоқуқи һәм земин пүтүнликини қоғдаш үчүн қораллиқ күчләрни ишлитиши мумкинликини тәкитлигән. . Русийә алий һәрбий әмәлдариниң бу хил ядро қорали ишлитиштин янмайдиғанлиқини җакарлиши хәлқара җәмийәтниң диққитини җәлп қилди. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт