Bixeter döletke kétimen dep marakeshte tutulup qalghan idris hesenning teqdiri xewp astida qalghan

Ixtiyariy muxbirimiz erkin tarim
2021.07.26
Bixeter döletke kétimen dep marakeshte tutulup qalghan idris hesenning teqdiri xewp astida qalghan Bixeter bir döletke bérip orunlishish üchün istanbuldin uchup kasablanka xelq'araliq ayrodromigha barghanda marakesh da'iriliri teripidin tutqun qilghan idris hesen türkiyediki waqtida Uyghur tetqiqat institutidiki yighinda sözlewatqan körünüsh. (Waqti éniq emes)
RFA/Erkin Tarim

Türkiyede yashawatqan, bu yil 33 yashqa kirgen idris hesen bixeter bir döletke bérip orunlishish üchün istanbuldin marakeshning kasablanka shehirige uchup barghan. Emma marakesh da'iriliri 20-iyul küni kéche sa'et üchke sekkiz minut qalghanda idris hesenni kasablanka xelq'araliq ayrodromda tutqun qilghan. U, ayrodromgha chüshüpla ayali buzaynur xanimgha uchur yollap salamet yétip kelgenlikini bildürgen.

Burun türkiyede köp qétim tutqun qilin'ghan idris hesen xitaygha qayturulsa hayatining xewp ichide qalidighanliqini hés qilghan. Shunga u, bixeter yawropa dölitige kétish meqsitide ayropilan almishish üchün kasablanka ayrodromigha chüshkende tutqun qilin'ghan. U, tutqun qilinip 80 sa'et ötkendin kéyin ayali buzaynur xanimgha téléfon qilip, hayatining xewp astida ikenlikini, qutuldurush üchün yol méngishini telep qilghan.

Bixeter bir döletke bérip orunlishish üchün istanbuldin uchup kasablanka xelq'araliq ayrodromigha barghanda marakesh da'iriliri teripidin tutqun qilghan idris hesen türkiyediki waqtida perzentliri bilen. (Waqti éniq emes)
Bixeter bir döletke bérip orunlishish üchün istanbuldin uchup kasablanka xelq'araliq ayrodromigha barghanda marakesh da'iriliri teripidin tutqun qilghan idris hesen türkiyediki waqtida perzentliri bilen. (Waqti éniq emes)

Idris hesenning ayali buzaynur xanim bu heqtiki ziyaritimizni qobul qilip mundaq dédi: “Yoldishim istanbuldiki sebiha gökchen ayrodromidin marakeshke barghanda tutuluptu. Ayropilandin chüshüshigila uni tutuwaptu. U, ayropilandin chüshüpla manga ‛ayropilandin chüshtüm‚ dep bir jümle xetni aran yazalaptu. Buningdin 80 sa'et ötkendin kéyin yoldishim tuyuqsiz téléfon qilip qaldi. Téléfonda ‛men ayropilandin chüshken haman méni bashqa bir sheherge apirip solap qoydi. Tézrek yol mangmisangla xitaygha qayturuwétidighan oxshaydu, xitay telep qilghachqa tutuptu‚ déyishigila téléfon üzülüp ketti. Shuningdin kéyin men yoldishimni qutuldurush üchün yol méngishqa bashlidim”.

Ijtima'iy taratqularda bu xewer tarqalghandin kéyin bir qisim Uyghur pa'aliyetchiler, dunya Uyghur qurultiyi we türkiyediki bezi sherqiy türkistan ammiwi teshkilatliri uni qutquzush üchün jiddiy heriketke ötken. Dunya Uyghur qurultiyi re'isi dolqun eysa ependi idris hesen uchrighan bu awarichiliktin xewerdar bolghandin kéyin, uning bixeter üchinchi döletke bérishi üchün heriketke ötkenlikini bayan qildi.

Dolqun eysa ependi muhajirettiki bezi Uyghurlarning zor qiyinchiliqlargha duchar boluwatqanliqini, bixeter döletlerde turuwatqan Uyghurlarning qanunsiz yollar bilen bashqa döletlerge méngishtin saqlinishi kéreklikini tekitlidi.

Idris hesen ependi 2012-yili türkiyege kelgendin buyan bezi paydiliq xizmetlerni qilghan. Norwégiyede turuwatqan Uyghur ziyaliysi abduweli ayup ependi bu heqte melumat berdi.

Idris hesen ependi 2012-yili tyenjin néfit uniwérsitétini püttürgen. Shu yili 9-ayda türkiyege kelgen. U, 2012-yilidin buyan türkiyede kompyutér inzhénéri bolup xizmet qilip kelgenidi. Ayalining éytishiche, u bixeter döletke kétish üchün marakesh arqiliq gollandiyege qarap uchqanda kasablankada tutulup qalghan. Nöwette 3 perzenti bilen bilen ayali uning baldurraq qutulup chiqishini kütmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.