Идрис һәсәнниң 12-авғустики соти үчүн кишилик һоқуқ тәшкилатлири җиддий тәдбир алмақтикән

Ихтиярий мухбиримиз азиғ
2021-08-11
Share
Идрис һәсәнниң 12-авғустики соти үчүн кишилик һоқуқ тәшкилатлири җиддий тәдбир алмақтикән Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.
RFA/Azigh

Хитайниң тәлипи билән маракәштә тутулған компутер инженери идрис һәсәнниң соти 12-авғуст күни ечилидикән. Мәзкур сотқа хәлқаралиқ кишилик һоқуқ тәшкилатлири вә хәлқара ахбарат вастилири интайин җиддий муамилә қилмақта. Хәлқаралиқ тәшкилатлар маракәш сотиниң адил һөкүм чиқириши үчүн җиддий һәркәт қилмақта икән.

Бирләшкән дөләтләр тәшкилати қийнап иқрар қилдурушқа қарши туруш комитети идрис һәсәнниң қийнап иқрар қилдурулмаслиқиға капаләтлик қилиш үчүн маракәш әдлийә тармақлири билән җиддий сөзләшмәктә икән.

Бирләшкән дөләтләр тәшкилати кишилик һоқуқ алий комиссарлиқи идрис һәсәнни хитайға қайтурушиниң алдини елиш үчүн бирләшкән дөләтләр тәшкилатида мунасивәтлик хизмәтләрни җиддий тутуп ишлимәктикән.

Б д т ниң кишилик һоқуқни қоғдиғучиларға аит алаһидә хадими бирләшкән дөләтләр тәшкилатида көчмән қубул қилидиған дөләтләр билән алақилишип, идрис һәсәнни үчинчи бихәтәр бир дөләткә сақ саламәт йәткүзүш үчүн тәйярлиқ қилмақта икән.

Униңдин башқа бихәтәрлик қоғдиғучилар тәшкилати идрис һәсәнниң адил, хәлқара вә йәрлик қанунларға уйғун шәкилдә сотлиниши үчүн адвокатлар, мәтбуатлар вә сиясий йоллар арқилиқ һәл қилишқа күчимәктикән.

Африқадики кишилик һоқуққа мәсул бир тәшкилатиму уйғур яр фонди билән алақилишип, идрис һәсәнниң делоси һәққидә адил һөкүм чиқирилиши үчүн ахбарат арқилиқ бесим қилишқа күчәйдиғанлиқни билдүргән.

Милад кандил әпәндим мәзкур сотқа баш ақлиғучи адвокат сүпитидә қатнишидиған болуп, уйғур яр фонди җиддий қутқузуш түри мәсуллириниң билдүрүшичә, адвокат соттин интайин үмидвар икән.

Идрис һәсәнниң мәсилисигә бирләшкән дөләтләр тәшкилати алаһидә хадим аҗратқан болуп, бу алаһидә хадим сотта һөкүм чиқирилиш җәряниға көзәткүчилик қилидикән.

Идрис һәсән нөвәттә кишилик һоқуқни қоғдиғучи сүпитидә етирап қилинған болуп, кишилик һоқуқ органлири идрисниң тутулуши вә хәлқара сақчи тәшкилати тәрипидин тутуш буйруқи чиқирилишиниң сәвәбини идрис һәсәнниң кишилик һоқуқни қоғдаш тиришчанлиқиға бағлап муәййәнләштүргән.

Франсийидә турушлуқ уйғур зиялийси вә яврупа уйғур институтиниң мудири дилнур рәйһан ханим зияритимизни қубул қилип, кишилик һоқуқ тәшкилатлири вә идрис һәсәнниң адвокатлириниң идрис һәсәнниң сотидин интайин үмидвар икәнликини ейтти.

Дилнур ханим йәнә бир маракәшлик өктичиниң хоңкоңда тутулғанлиқини, маракәшниң хитайдин бу кишини өзлиригә қайтуруп беришни тәләп қилғанлиқини, хитайниң маракәш даирилиригә идрисни хоңкоңда тутулған маракәшлик өктичи билән алмаштуруш тәклипи сунған болуш еһтималлиқиниң мәвҗутлуқини ейтти.

Әтә ечилидиған сот ахбаратқа, кишилик һоқуқ органлириға вә һәрқайси дөләтләрниң маракәштә турушлуқ әлчихана хадимлириға очуқ болуп, уйғур яр фондиниң мәсуллири бу сотқа кишилик һоқуқ органлиридин бәзи муһим хадимларниң, бәзи ғәрб дөләтлири диплуматлириниң қатнишидиғанлиқини вә сотниң хәлқара ахбарат вастилири тәрипидин нәқ мәйдандин тарқитидиғанлиқини билдүрди.

Игилишимизчә, кишилик һоқуқни қоғдиғучилар тәшкилатниң алаһидә хадими линда ханим идрис һәсәнниң сотиға өзи бивастә келип қатнишидикән.

Милад кандил әпәндим уйғур яр фонди мәсоллириға әтидики сотта өткүзүлидиған испат аңлаш йиғининиң кечиктүрүлүш еһтималлиқиниң юқирилиқини ейтқан.

Идрис һәсәнниң аяли бузәйнур ханим зияритимизни қобул қилип, мәзкур соттин күтидиған үмидлирини баян қилип өтти.

Идрис һәсәнниң сотидин адил һөкүм чиқидиғанлиқиға болған иҗабий көз қарашлар көп болсиму, нөвәттә әһвал йәнила җиддий икән. Уйғур яр фонди җиддий қутқузуш түриниң мәсуллиридин батур қарахан әпәндиниң билдүрүшичә, кимлики намәлум бири идрис һәсәнниң адвокатиға тилфун қелип, нимишқа идрисқа адвокатлиқ қилғанлиқи, ким тәрипидин ялланғанлиқи, кимләр билән һәмкарлишиватқанлиқи тоғрисида милад кандил әпәндидин соал сориған. Адвукат интайин тәмтиригән. Биз тәпсилий мәлуматни игиләш үчүн адвокатиға учур қилған болсақму, соаллиримизға җавап бәрмиди. Бәзи көзәткүчиләр, хитайниң бу хил усуллар арқилиқ идрис һәсәнниң делосиға күч чиқириватқан адвокат вә кишилик һоқуқ паалийәтчилиригә тәһдит салмақчи боливатқан болушиниң мумкинликини билдүрди.

Әһвалдин хәвәрдар бәзи кишиләрниң билдүрүшичә, 2016-йили маракәш вә хитай оттурисида имзаланған "өз-ара җинайәтчиләрни қайтуруп бериш келишимнамиси", хәлқара сақчи тәшкилатиниң идрис һәсән үстидики тутуш буйруқниң пүтүнләй бикар қилинмаслиқи вә хитай һөкүмитиниң маракәшкә салған иқтисадий мәблиғи қатарлиқлар идрис һәсән делосиниң җиддийликидин учур беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт