Idris hesenning 12-awghustiki soti üchün kishilik hoquq teshkilatliri jiddiy tedbir almaqtiken

Ixtiyariy muxbirimiz azigh
2021-08-11
Share
Idris hesenning 12-awghustiki soti üchün kishilik hoquq teshkilatliri jiddiy tedbir almaqtiken Idris hesen marakeshke méngishtin bir qanche kün burun perzentliri bilen bille chüshken resim. 2021-Yili iyul, türkiye.
RFA/Azigh

Xitayning telipi bilen marakeshte tutulghan komputér inzhénéri idris hesenning soti 12-awghust küni échilidiken. Mezkur sotqa xelq'araliq kishilik hoquq teshkilatliri we xelqara axbarat wastiliri intayin jiddiy mu'amile qilmaqta. Xelq'araliq teshkilatlar marakesh sotining adil höküm chiqirishi üchün jiddiy herket qilmaqta iken.

Birleshken döletler teshkilati qiynap iqrar qildurushqa qarshi turush komitéti idris hesenning qiynap iqrar qildurulmasliqigha kapaletlik qilish üchün marakesh edliye tarmaqliri bilen jiddiy sözleshmekte iken.

Birleshken döletler teshkilati kishilik hoquq aliy komissarliqi idris hesenni xitaygha qayturushining aldini élish üchün birleshken döletler teshkilatida munasiwetlik xizmetlerni jiddiy tutup ishlimektiken.

B d t ning kishilik hoquqni qoghdighuchilargha a'it alahide xadimi birleshken döletler teshkilatida köchmen qubul qilidighan döletler bilen alaqiliship, idris hesenni üchinchi bixeter bir döletke saq salamet yetküzüsh üchün teyyarliq qilmaqta iken.

Uningdin bashqa bixeterlik qoghdighuchilar teshkilati idris hesenning adil, xelq'ara we yerlik qanunlargha uyghun shekilde sotlinishi üchün adwokatlar, metbu'atlar we siyasiy yollar arqiliq hel qilishqa küchimektiken.

Afriqadiki kishilik hoquqqa mes'ul bir teshkilatimu Uyghur yar fondi bilen alaqiliship, idris hesenning délosi heqqide adil höküm chiqirilishi üchün axbarat arqiliq bésim qilishqa kücheydighanliqni bildürgen.

Milad kandil ependim mezkur sotqa bash aqlighuchi adwokat süpitide qatnishidighan bolup, Uyghur yar fondi jiddiy qutquzush türi mes'ullirining bildürüshiche, adwokat sottin intayin ümidwar iken.

Idris hesenning mesilisige birleshken döletler teshkilati alahide xadim ajratqan bolup, bu alahide xadim sotta höküm chiqirilish jeryanigha közetküchilik qilidiken.

Idris hesen nöwette kishilik hoquqni qoghdighuchi süpitide étirap qilin'ghan bolup, kishilik hoquq organliri idrisning tutulushi we xelq'ara saqchi teshkilati teripidin tutush buyruqi chiqirilishining sewebini idris hesenning kishilik hoquqni qoghdash tirishchanliqigha baghlap mu'eyyenleshtürgen.

Fransiyide turushluq Uyghur ziyaliysi we yawrupa Uyghur institutining mudiri dilnur reyhan xanim ziyaritimizni qubul qilip, kishilik hoquq teshkilatliri we idris hesenning adwokatlirining idris hesenning sotidin intayin ümidwar ikenlikini éytti.

Dilnur xanim yene bir marakeshlik öktichining xongkongda tutulghanliqini, marakeshning xitaydin bu kishini özlirige qayturup bérishni telep qilghanliqini, xitayning marakesh da'irilirige idrisni xongkongda tutulghan marakeshlik öktichi bilen almashturush teklipi sun'ghan bolush éhtimalliqining mewjutluqini éytti.

Ete échilidighan sot axbaratqa, kishilik hoquq organlirigha we herqaysi döletlerning marakeshte turushluq elchixana xadimlirigha ochuq bolup, Uyghur yar fondining mes'ulliri bu sotqa kishilik hoquq organliridin bezi muhim xadimlarning, bezi gherb döletliri diplumatlirining qatnishidighanliqini we sotning xelq'ara axbarat wastiliri teripidin neq meydandin tarqitidighanliqini bildürdi.

Igilishimizche, kishilik hoquqni qoghdighuchilar teshkilatning alahide xadimi linda xanim idris hesenning sotigha özi biwaste kélip qatnishidiken.

Milad kandil ependim Uyghur yar fondi mes'ollirigha etidiki sotta ötküzülidighan ispat anglash yighinining kéchiktürülüsh éhtimalliqining yuqiriliqini éytqan.

Idris hesenning ayali buzeynur xanim ziyaritimizni qobul qilip, mezkur sottin kütidighan ümidlirini bayan qilip ötti.

Idris hesenning sotidin adil höküm chiqidighanliqigha bolghan ijabiy köz qarashlar köp bolsimu, nöwette ehwal yenila jiddiy iken. Uyghur yar fondi jiddiy qutquzush türining mes'ulliridin batur qaraxan ependining bildürüshiche, kimliki namelum biri idris hesenning adwokatigha tilfun qélip, nimishqa idrisqa adwokatliq qilghanliqi, kim teripidin yallan'ghanliqi, kimler bilen hemkarlishiwatqanliqi toghrisida milad kandil ependidin so'al sorighan. Adwukat intayin temtirigen. Biz tepsiliy melumatni igilesh üchün adwokatigha uchur qilghan bolsaqmu, so'allirimizgha jawap bermidi. Bezi közetküchiler, xitayning bu xil usullar arqiliq idris hesenning délosigha küch chiqiriwatqan adwokat we kishilik hoquq pa'aliyetchilirige tehdit salmaqchi boliwatqan bolushining mumkinlikini bildürdi.

Ehwaldin xewerdar bezi kishilerning bildürüshiche, 2016-yili marakesh we xitay otturisida imzalan'ghan "Öz-ara jinayetchilerni qayturup bérish kélishimnamisi", xelq'ara saqchi teshkilatining idris hesen üstidiki tutush buyruqning pütünley bikar qilinmasliqi we xitay hökümitining marakeshke salghan iqtisadiy meblighi qatarliqlar idris hesen délosining jiddiylikidin uchur béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet