Uyghurlar marakeshning istanbuldiki bash konsolxanisi aldida namayish qilip idris hesenni qoyup bérishni telep qildi

Ixtiyariy muxbirimiz arslan
2021-08-11
Share
Uyghurlar marakeshning istanbuldiki bash konsolxanisi aldida namayish qilip idris hesenni qoyup bérishni telep qildi Marakeshte qolgha élin'ghan idris hesenning ayali we perzentliri uni qoyup bérishni telep qilip, marakeshning istanbuldiki konsulxanisi aldida ötküzgen namayishidin körünüsh. 2021-Yili 11-awghust, türkiye.
RFA/Arslan

11‏-Awghust charshenbe küni istanbuldiki Uyghurlardin bir guruppa kishi marakesh dölitining istanbuldiki konsulxanisi aldida namayish qilip marakeshte qolgha élin'ghan idris hesenni qoyup bérishni telep qildi. Namayishchilar birdek, "Idris hesen'ge erkinlik!", "Idris hesen xitaygha qayturulmisun!" dégendek sho'arlar towlidi. Namayish jeryanida Uyghur pa'aliyetchi doktor burhan ulughyol in'gliz tilida marakesh bash konsulxanisigha xitab qilip, idris hesenni xitaygha qayturup bermeslikni we uni erkin qoyup bérishni telep qildi. Kéyin yene idris hesenning ayali buzeynur obul söz qilip, marakesh hökümitining idris hesenni qoyup bérishini telep qildi. Buzeynur obul mundaq dédi: "Bizning istanbuldiki marakesh konsolxanisining aldigha jem bolushimizning sewebi bolsa, yoldishim Uyghur kompyutér mutexessisi, sherqiy türkistanliq idris hesen hazir marakeshning kasablanka ayrodromida xitaygha qayturulush xewpige duch kélip tutup turulishidur. Eger yoldishim xitaygha qayturulsa u naheq ölümge we yaki muddetsiz qamaq jazasigha uchraydu. Marakesh hökümitini yoldishimni derhal qoyup bérishke, xitayning insaniyetke qarshi jinayet sadir qilishigha purset yaritip bermeslikke we zulumgha ortaq bolmasliqqa chaqiriq qilimen".

Istanbuldiki Uyghurlardin bir guruppa kishi marakeshning istanbuldiki konsulxanisi aldida marakeshte qolgha élin'ghan idris hesenni qoyup bérishni telep qilip ötküzgen namayishidin körünüsh. 2021-Yili 11-awghust, türkiye.
Istanbuldiki Uyghurlardin bir guruppa kishi marakeshning istanbuldiki konsulxanisi aldida marakeshte qolgha élin'ghan idris hesenni qoyup bérishni telep qilip ötküzgen namayishidin körünüsh. 2021-Yili 11-awghust, türkiye.

Buzeynur obul sözide yene gherb ellirini idris hesen'ge ige chiqip uni qutuldurushqa we bixeter döletke yötkilishi üchün yardem qilishqa chaqiriq qilip mundaq dédi: "Oxshash waqitta bashta türkiye qatarliq pütkül gherb döletlirining insaniyetke ige chiqip, xitayning rehimsiz changgiligha chüshüp qélish aldida turuwatqan yoldishim idris hesenni derhal qutuldurushqa we hayat bixeterliki kapaletke ige bolidighan bir döletke yötkilishini qolgha keltürüshi üchün konkrét qedem bésishini jiddiy telep qilimen".

Biz idris hesenning nöwettiki ehwali heqqide téximu tepsiliy melumat élish üchün marakeshning istanbuldiki bash konsulxanisigha téléfon qilghan bolsaqmu, téléfon élinmidi.

Biz bu pa'aliyetni uyushturghan pa'aliyetchilerdin doktor burhan ulughyol bilen söhbet élip barduq.

Doktor burhan ulughyolning bildürüshiche, 12‏-awghust küni marakeshte idris hesen üstidin sot échilidighan bolup, bu namayishning yene bir sewebining marakesh hökümitige azraq bolsimu bésim qilish arqiliq idris hesenni qoyup bérishke yol échishtur.

Doktor borhanning bildürüshiche, konsulxana bixeterlik xadimliri namayishchilargha qizghin mu'amile qilghan we bash konsolxanining derwazisi aldighiche bérip namayish qilishigha ruxset qilghan.

Buzeynur xanimning bildürüshiche marakeshning istanbuldiki bash konsulxana xadimi uning yoldishini qoyup bérish toghrisidiki iltimas matériyal we resimini qobul qilghan hem munasiwetlik organlargha yetküzidighanliqini bildürgen.

Bu heqte doktor burhan ependining bildürüshiche, namayish axirida bash konsulxana xadimi burhan ependini ishxanisida qobul qilghan we burhan ependi u kishige idris hesen toghrisida melumat bergen hem uni qoyup bérish toghrisidiki iltimasni sun'ghan. Konsulxana xadimi marakeshning enqerediki bash elchiliki bilenmu alaqe qilip, ehwalni bildürüshni tewsiye qilip élxet adrésini burhan ependige bergen.

Bir qanche yildin buyan türkiyede yashawatqan, bu yil 33 yashqa kirgen idris hesen bixeter bir döletke bérip orunlishish üchün istanbuldin marakeshning kasablanka shehirige uchup barghan. Emma marakesh da'iriliri 20-iyul küni kéchide idris hesenni kasablanka xelq'araliq ayrodromda tutqun qilghanidi.

Igilinishche Uyghur teshkilat rehberliri we xelq'araliq kishilik hoquq teshkilatliri idris hesenni qutuldurush üchün jiddiy yol mangmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet