12-Ноябир “шәрқий түркистан җумһурийәт күни” дә дунядики мәшһур қурулушлар уйғурлар үчүн көк рәңдә йорутулди

Мухбиримиз нуриман
2021-11-12
Share

Йеқинқи бир қанчә йилдин буян фирансийәдә уйғурларни қоллаш үчүн елип берилған һәрикәтләр изчил давам қилип кәлмәктә иди.

Париж шәһәр башлиқи ан һедалго 2-өктәбир өзинң тиветтер суписида уйғурларни қоллайдиғанлиқни билдүрүп мундақ дәп язған: “нурғун кишиләр бу шәнбә күни уйғурларни қоллап йүрүш қилиду, париж шәһири зиянкәшликкә учриған уйғурлар билән бир сәптә туриду. Пат йеқинда парижда бир уйғур өйи ечилиду. Париж шәһәрлик һөкүмәт 12-ноябир күни уйғур байриқиниң рәңгидә йорутулиду.”

12-Ноябир күни, йәни пүтүн дунядики уйғурлар һәрхил шәкилдә җумһурийәт байримини қутлаватқан бү күндә париж шәһәрлик һөкүмәт бинаси һәқиқәтәнму көк рәңдә йорутулған вә һөкүмәт бинасиниң темидики чоң икранға “уйғурларға әркинлик” дегән хәтләр йезилған.

Явропа уйғур институтиниң мәсули, фирансийәдики уйғурларни қоллаш паалийәтлирини тәшкиллигүчиләрниң бири дилнур рәйһан ханимниң билдүрүшичә, париж шәһәрлик һөкүмәт дилнур рәйһан ханим, явропа парламентиниң әзаси, фирансийәлик рафаил гилукисмән вә ярдәмчиси пийәх бүссийәх қатарлиқларниң тәшәббуси билән париж шәһәрлик һөкүмәт бинасини шәрқий түркистан байриқиниң рәңги болған көк рәңдә бояшни қарар қилған.

Дилнур рәйһан ханим париж шәһәрлик һөкүмәт бинасиниң алдида туруп телефун зияритимизни қобул қилди вә нәқ мәйданда болуватқан әһваллани аңлатти.

Париж шәһиринң муавин шәһәр башлиқи җен лук ромиро әпәнди париж шәһәрлик һөкүмәт бинасиниң алдиға берип уйғурларни қоллайдиғанлиқни ипадилигән. У нәқ мәйдандин телефун зияритимизни қобул қилип мундақ деди: “мән париж шәһириниң кишилик һоқуқ ишлириға мәсул шәһәр башлиқи. Биз хитайниң уйғурларға йүргүзүватқан бастурушлирини әйибләш вә мушундақ алаһидә күндә уйғурларни қоллайдиғанлиқмизни билдүрүш үчүн шәһәрлик һөкүмәт бинасиға ‛уйғурларға әркинлик‚ дегән хәтни чиқардуқ вә бинани көк рәңдә бойидуқ. Париж шәһири фирансийәдики уйғурларни қоллайду, чүнки париж шәһири ‛кишилик һоқуқ шәһири‚. Бу шәһәрдә нурғун кишилик һоқуқ хитабнамилири елан қилинған. Шуңа парижниң уйғурлани қоллайдиғанлиқини билдүрүши бәк муһим. Шуңа бүгүн шәһәрлик һөкүмәт бинасиға ‛уйғурларға әркинлик‚ дегән хәтни чиқардуқ вә бинани көк рәңдә бояшни қарар қилдуқ. Күнимиздә қуллуқ, һәр қандақ бир сәвәб билән аилисидин айревитиш мумкин болмаслиқи керәк. Әркинлик вә кишилик һоқуқни фирансузлар бәк муһим дәп қарайду. Париж шәһәр башлиқи вә париж шәһириму муһим дәп қарайду. Биз бу көрәштә уйғулар билән бир сәптә туримиз. Хәлқаралиқ органларму уйғулар билән бир сәптә туруши керәк. Уйғурлар әркинликкә иришиши керәк. Һәммимиз бирликтә уйғурларниң бу дунядики башқа милләтләргә охшашла әркин яшаш һоқуқини тәләп қилшимиз керәк.”

Дилнур ханимниң ейтишичә, әслидә шәһәрлик һөкүмәт фирансийәниң симовллуқ қурулуши болған иффел мунарини көк рәңдә бояшқа қошулған, кейин бу қарарини өзгәртип һөкүмәт бинасини көк рәңдә бойиған. Бу күни пәқәт парижла әмәс, бирюссил, чарлерой (Charleroi), пирага қатарлиқ явропадики башқа шәһәрләрму уйғурларни қоллайдиғанлиқини билдүрүш үчүн ашу шәһәрдики асаслиқ семовуллуқ биналарни көк рәңгә бойиған.

Белгийә уйғур җәмийитиниң аммиви мунасивәт вә тәшвиқат ишлириға мәсул хадими әкбәр турсун әпәндиниң билдүрүшичә, париж шәһири билән охшаш вақитта белгийә пайтәхти берюссилдики симоволлуқ қорулуш “‍атомиюм” мунариму көк рәңгә боялған.

Америкадики массачусеттис технологийә институти ғол һүҗәйрә тәтқиқат орниниң директори, доктор майсәм мутәллип вә харвар университетиниң оқутқучиси гүлнар әзиз қатарлиқ бостонда яшайдиған уйғур җамаитиму җумһурийәт байримини тәбрикләш мунасивети билән байрақ чиқириш мурасими өткүзгән.

Иҗтимаий таратқуларда тарқалған учурларға қариғанда, 12-ноябир күни түркийә, америка, фирансийә, билгийә вә башқа уйғурлар яшаватқан дөләтләрниң һәммисидә дегүдәк уйғурлар һәрхил шәкилдә ай-юлтузлуқ көк байрақлирини ләпилдәткән.

Ахирида дилнур ханим мундақ деди: “пүтүн дунядики уйғурлар кейинки қетимлиқ җумһурийәт байримимизни вәтинимиз тупрақлирида тәбриклийәлишимиз үчүн қолни-қолға тутушуп, давамлиқ тиришишимиз керәк.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт