12-Noyabir “Sherqiy türkistan jumhuriyet küni” de dunyadiki meshhur qurulushlar Uyghurlar üchün kök rengde yorutuldi

Muxbirimiz nur'iman
2021-11-12
Share

Yéqinqi bir qanche yildin buyan firansiyede Uyghurlarni qollash üchün élip bérilghan heriketler izchil dawam qilip kelmekte idi.

Parizh sheher bashliqi an hédalgo 2-öktebir özinng tiwéttér supisida Uyghurlarni qollaydighanliqni bildürüp mundaq dep yazghan: “Nurghun kishiler bu shenbe küni Uyghurlarni qollap yürüsh qilidu, parizh shehiri ziyankeshlikke uchrighan Uyghurlar bilen bir septe turidu. Pat yéqinda parizhda bir Uyghur öyi échilidu. Parizh sheherlik hökümet 12-noyabir küni Uyghur bayriqining renggide yorutulidu.”

12-Noyabir küni, yeni pütün dunyadiki Uyghurlar herxil shekilde jumhuriyet bayrimini qutlawatqan bü künde parizh sheherlik hökümet binasi heqiqetenmu kök rengde yorutulghan we hökümet binasining témidiki chong ikran'gha “Uyghurlargha erkinlik” dégen xetler yézilghan.

Yawropa Uyghur institutining mes'uli, firansiyediki Uyghurlarni qollash pa'aliyetlirini teshkilligüchilerning biri dilnur reyhan xanimning bildürüshiche, parizh sheherlik hökümet dilnur reyhan xanim, yawropa parlaméntining ezasi, firansiyelik rafa'il gilukismen we yardemchisi piyex büssiyex qatarliqlarning teshebbusi bilen parizh sheherlik hökümet binasini sherqiy türkistan bayriqining renggi bolghan kök rengde boyashni qarar qilghan.

Dilnur reyhan xanim parizh sheherlik hökümet binasining aldida turup téléfun ziyaritimizni qobul qildi we neq meydanda boluwatqan ehwallani anglatti.

Parizh shehirinng mu'awin sheher bashliqi jén luk romiro ependi parizh sheherlik hökümet binasining aldigha bérip Uyghurlarni qollaydighanliqni ipadiligen. U neq meydandin téléfun ziyaritimizni qobul qilip mundaq dédi: “Men parizh shehirining kishilik hoquq ishlirigha mes'ul sheher bashliqi. Biz xitayning Uyghurlargha yürgüzüwatqan basturushlirini eyiblesh we mushundaq alahide künde Uyghurlarni qollaydighanliqmizni bildürüsh üchün sheherlik hökümet binasigha ‛Uyghurlargha erkinlik‚ dégen xetni chiqarduq we binani kök rengde boyiduq. Parizh shehiri firansiyediki Uyghurlarni qollaydu, chünki parizh shehiri ‛kishilik hoquq shehiri‚. Bu sheherde nurghun kishilik hoquq xitabnamiliri élan qilin'ghan. Shunga parizhning Uyghurlani qollaydighanliqini bildürüshi bek muhim. Shunga bügün sheherlik hökümet binasigha ‛Uyghurlargha erkinlik‚ dégen xetni chiqarduq we binani kök rengde boyashni qarar qilduq. Künimizde qulluq, her qandaq bir seweb bilen a'ilisidin ayréwitish mumkin bolmasliqi kérek. Erkinlik we kishilik hoquqni firansuzlar bek muhim dep qaraydu. Parizh sheher bashliqi we parizh shehirimu muhim dep qaraydu. Biz bu köreshte uyghular bilen bir septe turimiz. Xelq'araliq organlarmu uyghular bilen bir septe turushi kérek. Uyghurlar erkinlikke irishishi kérek. Hemmimiz birlikte Uyghurlarning bu dunyadiki bashqa milletlerge oxshashla erkin yashash hoquqini telep qilshimiz kérek.”

Dilnur xanimning éytishiche, eslide sheherlik hökümet firansiyening simowlluq qurulushi bolghan iffél munarini kök rengde boyashqa qoshulghan, kéyin bu qararini özgertip hökümet binasini kök rengde boyighan. Bu küni peqet parizhla emes, biryussil, charléroy (Charleroi), piraga qatarliq yawropadiki bashqa sheherlermu Uyghurlarni qollaydighanliqini bildürüsh üchün ashu sheherdiki asasliq sémowulluq binalarni kök rengge boyighan.

Bélgiye Uyghur jem'iyitining ammiwi munasiwet we teshwiqat ishlirigha mes'ul xadimi ekber tursun ependining bildürüshiche, parizh shehiri bilen oxshash waqitta bélgiye paytexti béryussildiki simowolluq qorulush “‍Atomiyum” munarimu kök rengge boyalghan.

Amérikadiki massachuséttis téxnologiye instituti ghol hüjeyre tetqiqat ornining diréktori, doktor maysem mutellip we xarwar uniwérsitétining oqutquchisi gülnar eziz qatarliq bostonda yashaydighan Uyghur jama'itimu jumhuriyet bayrimini tebriklesh munasiwéti bilen bayraq chiqirish murasimi ötküzgen.

Ijtima'iy taratqularda tarqalghan uchurlargha qarighanda, 12-noyabir küni türkiye, amérika, firansiye, bilgiye we bashqa Uyghurlar yashawatqan döletlerning hemmiside dégüdek Uyghurlar herxil shekilde ay-yultuzluq kök bayraqlirini lepildetken.

Axirida dilnur xanim mundaq dédi: “Pütün dunyadiki Uyghurlar kéyinki qétimliq jumhuriyet bayrimimizni wetinimiz tupraqlirida tebrikliyelishimiz üchün qolni-qolgha tutushup, dawamliq tirishishimiz kérek.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet