Gollandiyede sherqiy türkistan jumhuriyet künini xatirilesh namayishi ötküzüldi

Ixtiyariy muxbirimiz Uyghur'ay
2021.11.12
Share on WhatsApp
Share on WhatsApp
Gollandiyede sherqiy türkistan jumhuriyet künini xatirilesh namayishi ötküzüldi Ikki jumhuriyetning qurulghanliqini xatirilesh we 2022-yili xitayda ötküzülmekchi bolghan qishliq olimpik tenheriket musabiqisini bayqut qilish meqsitide ötküzülgen namayish. 2021-Yili 12-noyabir, gollandiye.
RFA/Uyghur'ay

12-Noyabir küni denxag shehiridiki gollandiye tashqiy ishlar ministirliqi binasi aldida gollandiye sherqiy türkistan teshkilatlar ittipaqining orunlashturushi bilen tarixtiki ikki jumhuriyetning qurulghanliqini xatirilesh we 2022-yili xitayda ötküzülmekchi bolghan qishliq olimpik tenheriket musabiqisini bayqut qilish meqsitide namayish ötküzüldi.

Mezkur namayish gollandiye waqti sa'et 10 bashlandi. Namayishqa qatnashquchilar ay-yultuzluq kök bayraqlarni lepilditip, ikki qétimliq sherqiy türkistan jumhuriyiti qurulghan ulugh tarixiy künde, özlirining azadliqqa bolghan arzusi we iradisini ipadiligen. Namayish nahayiti qizghin dawamlashqan bolup, namayishchilar jarangliq awazda shu'ar towlap, xitay konsulxanisigha piyade yürüsh qilghan, bu arqiliq xitay hökümitige bolghan nepriti we naraziliqini bildürgen.

Ikki jumhuriyetning qurulghanliqini xatirilesh we 2022-yili xitayda ötküzülmekchi bolghan qishliq olimpik tenheriket musabiqisini bayqut qilish meqsitide ötküzülgen namayish. 2021-Yili 12-noyabir, gollandiye.

Radiyomiz ziyaritini qobul qilghan gollandiye sherqiy türkistan teshkilatlar ittipaqining ezasi abdusalam niyaz ependi, bu qétimqi namayishning nahayiti ehmiyetlik bolghanliqini, özlirining xitay hökümitige bolghan ghezep-nepritini ipadilesh arqiliq ikki qétimliq sherqiy türkistan jumhuriyiti qurulghan xatire künni ehmiyetlik rewishte xatiriligenlikini bildürdi.

Uning éytishiche, bu qétimqi namayishta 2022-yili xitayda ötküzülidighan qishliq olimpik musabiqisini bayqut qilish chaqiriqimu otturigha qoyulghan.

Biz bu qétimliq namayish heqqide gollandiye sherqiy türkistan teshkilatlar ittipaqining re'isi obulqasim abliz ependini ziyaret qilduq. U tarixtiki ‍ikki qétimliq sherqiy türkistan jumhuriyetlirini xatirilesh pa'aliyitining ehmiyiti heqqide toxtaldi.

Uyghurlar 20-esirning aldinqi yérimida qanliq milliy azadliq inqilabi élip bérip, 1933-yili qeshqerde we 1944-yili ghuljada ikki qétim musteqil sherqiy türkistan jumhuriyetliri'ini jakarlighan idi.

Tarixtiki ikki qétimliq sherqiy türkistan jumhuriyiti gerche ichkiy-tashqiy küchlerning bésimi netijiside uzun'ghiche mewjut bolup turalmighan bolsimu, emma dunyaning her qaysi jayliridiki Uyghurlar bu tarixiy künni yillardin buyan izchil xatirilep, milliy azadliq üchün qan tökken qehrimanlarni xatirilep kelmekte.

Abdusalam niyaz ependining éytishiche, gollandiyede bu namayishtin bashqa yene “Jumhuriyet bayrimi” ni xatirilesh yüzisidin bir qanche pa'aliyetlermu ötküzülidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.