Германийәдики баварийә парламентиниң әзалири шитатлиқ парламентқа илһам тохти һәққидә мәктуб йоллиди

Мухбиримиз меһрибан
2020-02-01
Елхәт
Пикир
Share
Принт
Муддәтсиз қамақ җазасиға һөкүм қилинған уйғур зиялийси илһам тохти әпәнди.
Муддәтсиз қамақ җазасиға һөкүм қилинған уйғур зиялийси илһам тохти әпәнди.
AP

Германийәниң баварийә парламентидики 6 нәпәр парламент әзаси йеқинда баварийә парламентиға бирләшмә имзалиқ мәктуб йолиған. Мәктупта хитай даирилири тәрипидин муддәтсиз қамаққа һөкүм қилинған, көп хил хәлқаралиқ кишилик һоқуқ мукапатлириға еришкән уйғур зиялиси илһам тохтиниң түрмидики әһвалини сүрүштүрүш вә илһам тохтини әркинликкә чиқириш тәләп қилинған. 28-январ күни улар баварийә шитатлиқ парламентидин өзлири әвәткән бирләшмә мәктубиға йезилған җавап хәтни тапшурувалған.

Германйәдики «илһам тохтини қоллаш гурупписи» ниң мәсули әнвәрҗан әпәнди баварийә парламентиниң илһам тохти мәсилиси һәққидә 6 нәпәр парламент әзасиға қайтурған җавап хетиниң мәзмунини тонуштуруп өтти.

Әнвәрҗан әпәнди 30-январ күни зияритимизни қобул қилип, имзалиқ мәктубни йоллиған парламент әзалиридин ариф ташделендин өзигә елхет кәлгәнлики, бу хәт арқилиқ өзиниң баварийә шитатлиқ парламентиниң илһам тохти тоғрилиқ қайтурған җаваб хәтниң мәзмунидин хәвәрдар болғанлиқини билдүрди. 

Әнвәрҗан әпәндиниң билдүрүшичә, баварийә шитатидики сотсиял демократлар партийәсиниң әзалиридин маркус риндерспакер, доктур симоне стромайер ханим, ариф ташделен, александра һирсеман ханим, клауз аделт, стефан сустер қатарлиқ 6 нәпәр парламент әзаси шитатлиқ парламемтқа мәзкур мәктубни йоллиған. Мәзкур мәктубта илһам тохтиға әркинлик тәләп қилиш, униң түрмидики әһвали һәққидә баварийә шитатлиқ һөкүмәтниң хитай билән болған сода алақиси вә башқа дипломатик мунасивәтләрдә хитай һөкүмитигә бесим ишлитиши тәләп қилинған. Ундин башқа мәзкур мәктубта йәнә йеқинқи 3 йилдин буян хитай даирилири тәрипидин лагерларға қамалған милйонлиған уйғур тутқунлар мәсилисиму оттуриға қоюлған. 

Бу йил 15-январ илһам тохти тутқун қилинғанлиқиға 6 йил толған күн.

Илһам тохти хәлқарада тонулған уйғур зиялиси болуп, у тутқун қилиништин илгири тинчлиқ йоли арқилиқ уйғурларниң хитайдики баравәрлики вә қануний һәқлирини тәләп қилған. Бу сәвәптин 2014-йили 15-январ күни хитай һөкүмити уни бейҗиңдики өйидин тутқун қилинип, шу йили 9-айниң 22-күни муддәтсиз қамаққа һөкүм қилған. Илһам тохти тутқун қилинған 6 йилдин буян униңға хәлқарадики көплигән нопузлуқ кишилик һоқуқ мукапатлири берилгән. Униң әһвали хитай һөкүмитидин давамлиқ сүрүштә қилинип кәлмәктә. 

Германийәниң баварийә шитати германийәдики әң муһим санаәт мәркәзлириниң бири, болуп бу шитатта дуняға даңлиқ аптомобиллар ишләпчиқирилиду. Бу шитат ялғуз германийә иқтисадидидила әмәс, бәлки пүткүл явропаниң иқтисадидиму муһим орун тутиду.

Әнвәрҗан әпәнди баварийә парламенти әзалириниң хитай түрмисидики илһам тохти вә лагердики уйғурлар һәққидә шитатлиқ парламентқа мәктуб йоллиши хитай билән болған сода һәмкарлиқини изчил давам қилип келиватқан баварийә шитатида уйғур мәсилисигә болған тонушниң күчәйгәнликини көрситип беридикән.

Пикирләр (0)
Share
Толуқ бәт