Gérmaniyediki bawariye parlaméntining ezaliri shitatliq parlaméntqa ilham toxti heqqide mektub yollidi

Muxbirimiz méhriban
2020-02-01
Élxet
Pikir
Share
Print
Muddetsiz qamaq jazasigha höküm qilin'ghan Uyghur ziyaliysi ilham toxti ependi.
Muddetsiz qamaq jazasigha höküm qilin'ghan Uyghur ziyaliysi ilham toxti ependi.
AP

Gérmaniyening bawariye parlaméntidiki 6 neper parlamént ezasi yéqinda bawariye parlaméntigha birleshme imzaliq mektub yolighan. Mektupta xitay da'iriliri teripidin muddetsiz qamaqqa höküm qilin'ghan, köp xil xelq'araliq kishilik hoquq mukapatlirigha érishken Uyghur ziyalisi ilham toxtining türmidiki ehwalini sürüshtürüsh we ilham toxtini erkinlikke chiqirish telep qilin'ghan. 28-Yanwar küni ular bawariye shitatliq parlaméntidin özliri ewetken birleshme mektubigha yézilghan jawap xetni tapshuruwalghan.

Gérmanyediki "Ilham toxtini qollash guruppisi" ning mes'uli enwerjan ependi bawariye parlaméntining ilham toxti mesilisi heqqide 6 neper parlamént ezasigha qayturghan jawap xétining mezmunini tonushturup ötti.

Enwerjan ependi 30-yanwar küni ziyaritimizni qobul qilip, imzaliq mektubni yollighan parlamént ezaliridin arif tashdéléndin özige élxét kelgenliki, bu xet arqiliq özining bawariye shitatliq parlaméntining ilham toxti toghriliq qayturghan jawab xetning mezmunidin xewerdar bolghanliqini bildürdi. 

Enwerjan ependining bildürüshiche, bawariye shitatidiki sotsiyal démokratlar partiyesining ezaliridin markus rindérspakér, doktur simoné stromayér xanim, arif tashdélén, aléksandra hirséman xanim, kla'uz adélt, stéfan sustér qatarliq 6 neper parlamént ezasi shitatliq parlamémtqa mezkur mektubni yollighan. Mezkur mektubta ilham toxtigha erkinlik telep qilish, uning türmidiki ehwali heqqide bawariye shitatliq hökümetning xitay bilen bolghan soda alaqisi we bashqa diplomatik munasiwetlerde xitay hökümitige bésim ishlitishi telep qilin'ghan. Undin bashqa mezkur mektubta yene yéqinqi 3 yildin buyan xitay da'iriliri teripidin lagérlargha qamalghan milyonlighan Uyghur tutqunlar mesilisimu otturigha qoyulghan. 

Bu yil 15-yanwar ilham toxti tutqun qilin'ghanliqigha 6 yil tolghan kün.

Ilham toxti xelq'arada tonulghan Uyghur ziyalisi bolup, u tutqun qilinishtin ilgiri tinchliq yoli arqiliq Uyghurlarning xitaydiki barawerliki we qanuniy heqlirini telep qilghan. Bu seweptin 2014-yili 15-yanwar küni xitay hökümiti uni béyjingdiki öyidin tutqun qilinip, shu yili 9-ayning 22-küni muddetsiz qamaqqa höküm qilghan. Ilham toxti tutqun qilin'ghan 6 yildin buyan uninggha xelqaradiki köpligen nopuzluq kishilik hoquq mukapatliri bérilgen. Uning ehwali xitay hökümitidin dawamliq sürüshte qilinip kelmekte. 

Gérmaniyening bawariye shitati gérmaniyediki eng muhim sana'et merkezlirining biri, bolup bu shitatta dunyagha dangliq aptomobillar ishlepchiqirilidu. Bu shitat yalghuz gérmaniye iqtisadididila emes, belki pütkül yawropaning iqtisadidimu muhim orun tutidu.

Enwerjan ependi bawariye parlaménti ezalirining xitay türmisidiki ilham toxti we lagérdiki Uyghurlar heqqide shitatliq parlaméntqa mektub yollishi xitay bilen bolghan soda hemkarliqini izchil dawam qilip kéliwatqan bawariye shitatida Uyghur mesilisige bolghan tonushning kücheygenlikini körsitip béridiken.

Toluq bet