Ilham toxtigha “Saxarof mukapati” ni tarqitish murasimi yawropa parlaméntida ötküzüldi

Ilham toxtigha bérilgen “Saxarof mukapati” ning guwahnamisi. 2019-Yili 18-dékabir, firansiye.

“Ilham toxti guruppisi” we d u q birlikte yawropa parlaméntining ilham toxtigha “Saxarof mukapati” ni bergenlikige rehmitini bildürmekte. 2019-Yili 18-dékabir, firansiye.

18-Dékabir küni yawropa parlaméntining strasburgdiki merkizide ilham toxtigha bérilgen “Saxarof mukapati” ni tarqitish murasimi daghdughiliq ötküzüldi.

24-Öktebir yawropa ittipaqining eng aliy kishilik hoquq mukapati bolghan “Saxarof mukapati” ning xitay türmisidiki Uyghur öktichi ziyaliysi ilham toxtigha bérilgenliki élan qilinip, dunya metbu'atlirida zor ghulghula qozghighan shuningdek Uyghurlar we xitayning Uyghur diyaridiki jaza lagérliri mesilisi xelq'ara jem'iyetning yene bir qétim diqqet nuqtisigha aylan'ghan idi. Bügün, yeni 18-dékabir firansiyening strasburg shehiridiki yawropa parlaméntining merkizide bu mukapatni tarqitish murasimi ötküzüldi.

Murasimgha yawropa parlaméntining 750 din artuq ezaliri qatnashqan bolup, dunya Uyghur qurultiyining re'isi dolqun eysa, ilham toxtining qizi jewher ilham we “Ilham toxti guruppisi” ning re'isi enwerjan qatarliqlarmu bu murasimgha daxil boldi. Jewher ilham zalgha kirgende pütün parlamént ezaliri orunliridin turup, alqish sadaliri bilen qarshi aldi.

Neq meydan xewerlirige asaslan'ghanda, bu murasim tolimu heywetlik ötküzülgen bolup, yawropa parlaméntining re'isi dawid sassoli ependidin kéyin jewher ilham söz élip, yawropa ittipaqining “Saxarof mukapati” ni dadisi ilham toxtigha layiq körgenlikige rehmetlirini bildürgen. U sözide ilham toxtining hayati, pa'aliyetliri, Uyghurlarning nöwettiki weziyiti, milyonlighan Uyghurlarning xitayning jaza lagérlirida tartiwatqan zulumlirini tepsiliy anglatqan. Uning sözi axirlashqanda pütün zalda yene bir qétim güldüras alqish sadaliri yangrighan.

Ilham toxtigha bérilgen “Saxarof mukapati” ning guwahnamisini yawropa parlaméntining re'isi dawid sassoli ependi ilham toxtining qizi jewherge öz qoli bilen teqdim qilghanda murasim zalini yene bir qétim güldüras alqish sadaliri qaplighan. Yawropa parlaméntining re'isi dawid sassoli sözide: “Biz bu mukapat arqiliq xitay hökümitini ilham toxtini derhal qoyup bérishke we az sanliq milletlerning heq-hoquqigha hörmet qilishqa chaqirimiz,” dégenlerni tilgha alghan.

Kishining diqqitini alahide jelp qilidighini, mukapat lewhesining Uyghur kona yéziqida yézilishi boldi. Lewhege “Yawropa parlaménti 2019-yilliq ‛saxarof mukapati‚ ni ilham toxtigha, yeni uning Uyghurlarning heq-hoquqi üchün baturane élip barghan kürishini we temkin bir yarashturush awazi bolghanliqini étirap qilghanliqi üchün teqdim qildi,” dégen xetler yézilghan.

Melum bolghinidek, ilham toxti bu yil 30-séntebir küni yawropa ittipaqining “Waslaw xawél erkinlik mukapati” gha érishken idi. Uning arqa-arqidin yawropa ittipaqining aliy mukapatlirigha na'il bolushi xelq'araning diqqitini jelp qilipla qalmay, Uyghur jama'itinimu köp söyündürmekte.

Strasburgdiki murasim zalidin Uyghur xelqige xosh xewer yollighan d u q re'isi dolqun eysa ependi tolimu hayajanliq minutlarni bashtin köchürgenlikini tilgha aldi. U ziyaritimizni qobul qilghanda bu mukapatning ilham toxtigha bérilishining siyasiy ehmiyetlirini eskertti.

“Ilham toxti guruppisi” ning re'isi enwerjan we tehdit astidiki xelqler teshkilatining diréktori ulrik déliyus qatarliqlar yawropa parlaméntining “Saxarof mukapati” ni Uyghur ziyaliysi ilham toxtigha layiq körgenliki üchün rehmetlirini ipade qilghan bir lozunka yasap barghan bolup, ular bu lozunkini parlamént ezalirigha namayan qilghan. Enwerjan ependi neq meydandin qilghan sözide özining hayajanlirini basalmaywatqanliqini ipade qildi.