Ili pédagogika uniwérsitétining oqutquchisi abduréshit xemit qesemnamige qol qoymighanliqi seweblik tutqun qilin'ghan

Muxbirimiz shöhret hoshur
2022-05-16
Share
Ili pédagogika uniwérsitétining oqutquchisi abduréshit xemit qesemnamige qol qoymighanliqi seweblik tutqun qilin'ghan Ili pédagogika uniwérsitétining kompyotér oqutquchisi abdurishit xemit ependi.
Oqurmen teminligen

Inkas qilinishiche, ili pédagogika uniwérsitétining kompyotér oqutquchisi abdurishit xemit 2016‏-yili Uyghur rayonida “Üch xil küch” ke qarshi bayanat élan qilish we xitay kompartiyesige sadaqet bildürüsh dolquni qozghalghanda, qesemnamige qol qoymighanliqi üchün üstidin tekshürüsh élip bérilghan we bir qatar atalmish “Jinayet” ler artilip tutqun qilin'ghan. Muxbirimizning éniqlashliri dawamida, abdurishit xemitning tutqunda ikenliki delillendi.

Melum bolushiche, abdurishit xemit, ili pédagogika uniwérsitétining sabiq mudiri xemit qadirghuja dégen kishining oghli bolup, u mezkur uniwérsitét qorosida chong bolghan. Déyilishiche, 1995‏-yili shinjang uniwérsitétigha qobul qilighan abdurishit xemit 2000‏-yili mezkur uniwérsitétining kompyotér kespini püttürgen. U in'giliz tilini hem kespiy saheside hem ijtima'iy hayatta qollan'ghudek derijide puxta ögen'gen. U 2000‏-yili ili pédagogika uniwérsitétining uchur-téxinika institotigha oqutquchi bolup ishqa chüshkende, kespke puxtiliqi bilenla emes, belki heqqaniyetchi mijezi bilenmu tézla közge körün'gen. Mektepke qobul qilinidighan oqughuchilarning milletler nisbitidiki tengsizliktin tartip, mektep oqutquchilirining teminat teqsimatidiki égiz-pesliklerge qeder, hemme mesilide u her waqit perqliq we naraziliq pikrini bildürüp kelgen؛ nöwiti kelgende mektep rehberliri bilen munazirilishishtinmu özini tartmighan. Netijide u mekteptiki Uyghur we qazaq oqutquchilarning gheyriy resmiy bir wekilige aylinip qalghan. Uning bu xaraktéri mektepning xitay rehberliri teripidin eyni chaghda “Jidelxorluq” dep addiyla atilip kelgen bolsa, 2017‏-yiligha kelgende “Milliy bölgünchilik” we “Ikki yüzlimichilik” dep eyiblnip, tutqun qilinishqa asas bolghan.

Biz abdurishit xemitning ehwalini éniqlash üchün ghuljadiki ma'arip tarmaqlirigha téléfon qilduq. Ili pédagogika oniwérsitéti oqutush bashqarmisining xadimi nöwette mekteptiki oqutquchilar tizimlikide abdurishit xemit isimlik bir oqutquchining yoq ikenlikini bayan qilish arqiliq, uning tutqunda ikenlik éhtimalliqini otturigha chiqardi.

Abdurishit xemitning chet eldiki bir sawaqdishining élxet arqiliq radiyomizgha yetküzüshiche, abdurushit xemit 2016‏-yili Uyghur élida “Üch xil küchke qarshi turush” we “Xitay kompartiyisige sadaqet bildürüsh” dolquni qozghalghanda, mektep siyasiy bölümi teyyarlighan qesemyat bayanatigha qol qoymighan we bu seweplik shu yilning axrida uning üstidin tekshürüsh élip bérilghan. Mektep intizam tekshürüsh kométiti teripidin élip bérilghan bu tekshürüshte uning mektep rehberliri bilen ilgiriki talash-tartishlirimu qaytidin otturigha chiqirilip, uninggha “Milliy öchmenlik tuyghusi peyda qilish” we “Mektepte milliy qutratquluq qilish” qatarliq siyasiy qalpaqlar keydürülgen. Netijide uning délosini qanun tarmaqlirigha ötküzüp bergen. Qanun tarmaqliri tekshürüshni yene bir qedem kéngeytip, uning kompyotérini tekshürgen. Tekshürüsh jeryanida uning “Tam atlap cheklen'gen uchurlarni körgenliki” we “Chet ellikler bilen torda alaqilashqanliqi” bayqalghan. Buning bilen uning “Jinayiti”, “Milliy bölgünchilik gherizide bolush” dep békitilgen.

Ili pédagogika uniwérsitétining intizam tekshürüsh xadimi, abdurishit xemitning buningdin besh yil burun, yeni 2017‏-yili tutqun qilin'ghanliqini ashkarilidi. Emma u abdurishit xemitning késilgen yaki késilmigenliki we nede tutup turuliwatqanliqi heqqide melumat bérelmidi.

Melum bolishiche, abdurishit xemitining ata-anisidin bir terep qazaq bolup, u 2010‏-yilliri uruq-tughqanlirini yoqlash üchün qazaqsitan'gha chiqqan. U ikkinchi qétimliq qazaqsitan sepiride türkiyenimu ziyaret qilip kompyotér sahesidiki kesipdashliri bilen körüshken. Déyilishiche, uning normal uruq-tughqan we dostlar ziyariti “Bölgünchi teshkilatlar we shexsler bilen teshkiliy alaqe ornitish” dep qarilip, uninggha “Döletni parchilashqa urunush” dégen jinayet artilghan.

Inkasta yene eskertilishiche, abdurishit xemit chet ellikler bilen qilghan alaqisi we xalisane terjimanliq xizmiti üchün eng köp soraq qilin'ghan.

Uniwérsitétning yene bir xadimimu abdurushit xemitning tutqunda ikenlikini delillidi, emma uning késilgen yaki késilmigenliki heqqide melumat bermidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet