Ili pédagogika uniwérsitéti marksizm institutining sékrétari abdulla isma'ilning tutqunda ikenliki delillendi

Muxbirimiz shöhret hoshur
2022-05-02
Share
Ili pédagogika uniwérsitéti  marksizm institutining sékrétari abdulla isma'ilning tutqunda ikenliki delillendi
Photo: RFA

Yéqinda ghulja weziyitidin xewerdar kishilerdin biri radiyomizgha inkas  yollap, ili pédagogika uniwérsitétidin 20 ge yéqin oqutquchining tutulup ketkenlikini  we  bulardin 8 nepirining isimlirini  melum qildi. Muxbirimizning téléfon ziyaretliri dawamida,  melum qilin'ghanlardin  6  nepirining  tutqunda ikenliki delillendi. Delillinishiche,  marksizm instituti partiye yachéykisining sékrétari abdulla isma'il “Ikki yüzlimichilik” bilen eyiblinip 2018 ‏-yili tutqun qilin'ghan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu. 

Radiyomizgha kelgen inkasta bayan qilinishiche, ili pédagogika uniwérsitétining  tejribilik  oqutquchisi,  iqtidarliq ijtima'iy teshkilatchi, uniwérsitét marksizm institutining partiye yachéyka sékrétari abdulla isma'il 2018 ‏-yili tutqun qilinip  iz-déreksiz ghayib bolghan. Inkasta abdulla isma'ilning délosining bir terep qilinishida mektep tereptin masliship xizmet qilghan ikki kishining isim we téléfon nomurliri xatirilen'gen. Bulardin biri, mektep oqutush ishliri  bashqarmisining bir xadimi bolup, bu xadim deslepte abdulla isma'ilni tonumaydighanliqini bayan qildi, biz so'allirimizni tekrarlighandin kéyin, tonuydighanliqini bildürgen bolsimu, özining muwapiq bir jayda emeslikini eskertip, uning nöwettiki ehwali heqqide melumat bérishtin özini qachurdi.

Abdullaning nöwette gollandiyede yashawatqan ottura mekteptiki sawaqdishi,  gollandiye sherqiy türkistan Uyghur birliki teshkilatining  sabiq re'isi perhat qadirning bayan qilishiche, abdulla isma'il ottura mekteptiki  mezgilide derste elachiliqi bilenla emes, yene alahide putbol mahariti we ijtima'iy munasiwet  qabiliyiti bilenmu dang chiqarghan.  1962 ‏-Yili süydöngde tughulghan  abdulla isma'il, 1981 ‏-yili  ili pédagogika institutining edebiyat kafédrasigha qobul qilin'ghan we institutni 1985 ‏-yili püttürüp, shu yili mektepte   oqutquchi bolup qépqalghan.

Inkasta déyilishiche, uniwérsitét  marksizm institutining partiye yachéyka sékrétari bolup wezipe ötewatqan   abdulla isma'il 2017 ‏-yildin bashlap, mektepte gumanliq shexsler qatarigha kirgüzülgen we arilap  soraq qilinishqa bashlighan. Deslepki soraq  mektep intizam tekshürüsh komitéti teripidin élip bérilghan. Inkasta yene shu yildiki  tekshürüshke mes'ul bolghan intizam tekshürüsh komitéti xadimining téléfon nomurimu xatirilen'gen. Téléfonimizni qobul qilghan mes'ul xadim, özining abdulla isma'il bilen 5 yilche awwal körüshkenlikini tilgha aldi. U yene özining abdulla isma'il toghriliq matériyal toplap alaqidar orun'gha yollighanliqini ashkarilidi.  Inkasta yene abdulla isma'ilning birqanche xil atalmish jinayet bilen qarilan'ghanliqi qeyt qilin'ghan, emma konkrét qaysi jinayet ikenliki tilgha élinmighan. Mezkur intizam tekshürüsh xadimi eyni chaghda abdullaning ikkiyüzlimichilik gumani bilen tutulghanliqini ashkarilidi.

Melum bolushiche, dunya Uyghur qurultiyining mu'awin bash teptishi bextiyar nasir ependimu eyni yillarda  abdulla isma'il oqutquchiliq  qilghan mektepte oqughan. Déyilishiche, abdulla isma'il, béyjingdiki bir uniwérsitétta  pelsepe ilmide  doktorluq unwanigha érishken.

 Ili pédagogika uniwérsitéti intizam tekshürüsh komitétining mezkur xadimi, abdullaning uniwérsitétning birqanche memuri orginida emel tutqanliqini melum qilish bilen birlikte, uning 2018 ‏-yili tutqun qilin'ghanliqini delillidi.

Melum bolushiche, abdulla isma'il “Ili géziti” qatarliq bir türküm gézit- zhurnallarda, marksizm nezeriyesige a'it tetqiqat maqalilirinimu élan qilghan.

Hörmetlik radiyo anglighuchilar, yuqirida ili pédagogika uniwérsitéti marksizm institutining sékrétari abdulla isma'ilning tutqunda ikenliki heqqide  anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet