4-Нөвәтлик «уйғур мутәпәккурлирини хатириләш илмий муһакимә йиғини» истанбулда өткүзүлди

Ихтиярий мухбиримиз әркин тарим
2019-05-06
Елхәт
Пикир
Share
Принт
Уйғур академийәси рәиси профессор доктор алимҗан инайәт әпәнди мәғпирәт ханим билән. 2019-Йили 5-май, түркийә.
Уйғур академийәси рәиси профессор доктор алимҗан инайәт әпәнди мәғпирәт ханим билән. 2019-Йили 5-май, түркийә.
RFA/Erkin Tarim

Истанбулдики уйғур академийәси 5-айниң 5-күни, истанбул түрк оҗақлири вәхпиниң залида 4-нөвәтлик «уйғур мутәпәккурлирини хатириләш илмий муһакимә йиғини» өткүзди.

Бу йиғин һазир хитай түрмә вә йиғивелиш лагерлирида йетиватқан дотсент илһам тохти, профессор абдуқадир җалалидин, язғучи ялқун рози вә доктор раһилә давут вә башқа мәшһур уйғур илим әрбаблириға беғишланди.

Йиғинда, уйғур академийәси рәиси профессор доктор алимҗан инайәт әпәнди ечилиш нутиқи сөзләп, алди билән уйғур дияриниң ичи-сиртидики барлиқ уйғурларниң доппа байримини тәбриклиди. Арқидин, у бу қетимқи йиғинда хатирилимәкчи болған уйғур зиялийлирини тилға елип, уларниң уйғур миллити үчүн тиришип хизмәт қилғанлиқини, улар уйғурлар үчүн илмий тәтқиқат елип барғанлиқи үчүн түрмигә вә җаза лагерлириға ташланғанлиқини, чәтәлдики уйғур зиялийлириниңму һазир үстигә чүшкән мәсулийәтни ада қилиши керәкликини тәкитлиди. Йиғинда уйғур академийәси баш катипи пәрһат қурбан тәңритағли әпәнди «даңлиқ сәнәтчи абдуреһим һейитниң иҗади әмгәклири» темисида, профессор доктор алимҗан әпәнди доктор раһилә давутниң илмий тәтқиқатлири тоғрисида доклат бәргән.

4-Нөвәтлик «уйғур мутәпәккурлирини хатириләш илмий муһакимә йиғини» да уйғур академийәси рәиси, измирдики әгә университети оқутқучиси доктор алимҗан инайәт әпәндиму сөз қилған. У, йиғин тоғрисида мәлумат бәрди.

Мәзкур йиғинни уюштурған уйғур академийәси рәиси абдулхәмит қарахан әпәнди зияритимизни қобул қилип, йиғинни өткүзүштики мәқсити тоғрисида тохталған.

У, йиғинниң наһайити яхши өткәнликини, истанбулдики уйғурлардин көп кишиниң иштирак қилғанлиқини баян қилди.

Уйғур академийәси баш катипи пәрһат қурбан тәңритағли әпәнди телефон зияритимизни қобул қилип, доклатида абдуреһим һейт һәққидики хатирилири, униң иҗадийәтлири тоғрисида мәлумат бәргәнликини баян қилди.

Йиғин ахирида йәнә түркийәдә толуқ курс, магистирлиқ вә докторлуқ үчүн оқушни халиған уйғур оқуғучиларниң оқуш мукапатиға қандақ илтимас қилиши керәклики тоғрисида мәлумат берилгән. Алимҗан инайәт әпәнди бу һәқтә мәлумат бәрди. Бу йиғинға қатнашқан истанбулда яшайдиған уйғур зиялийси дилара йүсүп ханим йиғинниң мувәппәқийәтлик өткәнликини баян қилди. Паалийәт ахирида уйғур оқуғучилар гитар вә дутар билән абдуреһим һейитниң нахшисини орундап бәргән.

Абдулхәмит қарахан әпәнди, бундин кейин уйғур академийәсиниң нуқтилиқ һалда җаза лагерлириға елип кетилгән уйғур зиялийлири тоғрисида издиниш елип баридиғанлиқини баян қилди.

Пикирләр (0)
Share
Толуқ бәт