4-Nöwetlik "Uyghur mutepekkurlirini xatirilesh ilmiy muhakime yighini" istanbulda ötküzüldi

Ixtiyariy muxbirimiz erkin tarim
2019-05-06
Share
alimjan-akademiye.jpg Uyghur akadémiyesi re'isi proféssor doktor alimjan inayet ependi meghpiret xanim bilen. 2019-Yili 5-may, türkiye.
RFA/Erkin Tarim

Istanbuldiki Uyghur akadémiyesi 5-ayning 5-küni, istanbul türk ojaqliri wexpining zalida 4-nöwetlik "Uyghur mutepekkurlirini xatirilesh ilmiy muhakime yighini" ötküzdi.

Bu yighin hazir xitay türme we yighiwélish lagérlirida yétiwatqan dotsént ilham toxti, proféssor abduqadir jalalidin, yazghuchi yalqun rozi we doktor rahile dawut we bashqa meshhur Uyghur ilim erbablirigha béghishlandi.

Yighinda, Uyghur akadémiyesi re'isi proféssor doktor alimjan inayet ependi échilish nutiqi sözlep, aldi bilen Uyghur diyarining ichi-sirtidiki barliq Uyghurlarning doppa bayrimini tebriklidi. Arqidin, u bu qétimqi yighinda xatirilimekchi bolghan Uyghur ziyaliylirini tilgha élip, ularning Uyghur milliti üchün tiriship xizmet qilghanliqini, ular Uyghurlar üchün ilmiy tetqiqat élip barghanliqi üchün türmige we jaza lagérlirigha tashlan'ghanliqini, chet'eldiki Uyghur ziyaliyliriningmu hazir üstige chüshken mes'uliyetni ada qilishi kéreklikini tekitlidi. Yighinda Uyghur akadémiyesi bash katipi perhat qurban tengritaghli ependi "Dangliq sen'etchi abduréhim héyitning ijadi emgekliri" témisida, proféssor doktor alimjan ependi doktor rahile dawutning ilmiy tetqiqatliri toghrisida doklat bergen.

4-Nöwetlik "Uyghur mutepekkurlirini xatirilesh ilmiy muhakime yighini" da Uyghur akadémiyesi re'isi, izmirdiki ege uniwérsitéti oqutquchisi doktor alimjan inayet ependimu söz qilghan. U, yighin toghrisida melumat berdi.

Mezkur yighinni uyushturghan Uyghur akadémiyesi re'isi abdulxemit qaraxan ependi ziyaritimizni qobul qilip, yighinni ötküzüshtiki meqsiti toghrisida toxtalghan.

U, yighinning nahayiti yaxshi ötkenlikini, istanbuldiki Uyghurlardin köp kishining ishtirak qilghanliqini bayan qildi.

Uyghur akadémiyesi bash katipi perhat qurban tengritaghli ependi téléfon ziyaritimizni qobul qilip, doklatida abduréhim héyt heqqidiki xatiriliri, uning ijadiyetliri toghrisida melumat bergenlikini bayan qildi.

Yighin axirida yene türkiyede toluq kurs, magistirliq we doktorluq üchün oqushni xalighan Uyghur oqughuchilarning oqush mukapatigha qandaq iltimas qilishi kérekliki toghrisida melumat bérilgen. Alimjan inayet ependi bu heqte melumat berdi. Bu yighin'gha qatnashqan istanbulda yashaydighan Uyghur ziyaliysi dilara yüsüp xanim yighinning muweppeqiyetlik ötkenlikini bayan qildi. Pa'aliyet axirida Uyghur oqughuchilar gitar we dutar bilen abduréhim héyitning naxshisini orundap bergen.

Abdulxemit qaraxan ependi, bundin kéyin Uyghur akadémiyesining nuqtiliq halda jaza lagérlirigha élip kétilgen Uyghur ziyaliyliri toghrisida izdinish élip baridighanliqini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.