Уйғурларниң голландийидики айлиқ сөһбитидә баҗ һәққидә сават берилди

Ихтиярий мухбиримиз пидаий
2013.03.04
Share on WhatsApp
Share on WhatsApp
gollandiye-ayliq-sohbet.jpg “явропа шәрқий түркистан маарип җәмийити” ниң айлиқ сөһбәт паалийитидин көрүнүш. 2013-Йили 3-март, голландийә.
RFA/Pidaiy

Голландийидики “явропа шәрқий түркистан маарип җәмийити” ниң айлиқ сөһбәт паалийитидә диний саватлар сөзлинипла қалмай, голландийидики баҗ вә малийә системисини һәққидиму лексийә сөзләнди. Сөһбәт әһли бу қетимқи сөһбәттин рази болғанлиқини билдүрүшти.

2013‏-Йили 3‏-март голландийиниң зәйст шәһиригә орунлашқан “явропа шәрқий түркистан маарип җәмийити” ниң хизмәт мәркизидә, “айлиқ сөһбәт паалийити” өткүзүлди. Паалийәткә әрләр, аяллар вә кичик балиларму иштирак қилди.

Паалийәт шу йәр вақти чүш 2 дин, таки кәч саәт 8 гә қәдәр давам қилди. Паалийәт йиллардин бири давам қилип келиватқан тәртип асасида “қуран кәрим” тилавити билән башланди. Андин пәйғәмбәр әләйһиссаламниң һаят кәчмишлири мәркәз қилинған вәқәликләр баян қилинди. Кейин “тәвһийд вә иман” һәққидә чүшәнчиниң давами аңлитилди.

Паалийәт арилиқлирида дәм елишлар, өз-ара тонуш характеридики әркин сөһбәтләр, намаз вә ғизалинишларму орунлаштурулди. Ахирида голландийидики баҗ ишлири, малийә мәсилилири һәққидә сават вә дуч кәлгән мәсилиләр һәққидә соал-җаваб шәклидә программа болунди. Бу программиға голландийидә узун йиллардин мушу саһәдә хизмәт қилип келиватқан бир түрк қериндаш алаһидә тәклип қилинған болуп, көпчилик қисқа вақитта көп учурлардин бәһримән болди.

Паалийәт иштиракчилири зияритимизни қобул қилип, өз тәсиратлирини аңлатти.

“явропа шәрқий түркистан маарип җәмийити” йеқинқи йиллардин бири барғансери күчийип хизмәтлирини кеңәйтиватқан вә сәрхиллаштуруватқан тәшкилатлардин бири.

“айлиқ сөһбәт паалийити” бу җәмийәтниң асаслиқ хизмәтлиридин болуп, айда бир қетим изчил давам қилдуруп кәлмәктә. Бу паалийәт келишни ихтияр қилған барлиқ вәтәндашлар ечиветилгән очуқ паалийәт болуп, бундин кейин ханим-қизларму қатнишалайдикән.

Бу җәмийәттә һазир балилар үчүн “ислам вә ана тил курси”, чоңлар үчүн “қуран-тәҗвид курси” дәрслирини давам қилдурмақта.

Игилишимизчә, улар йәнә “тәләп-тәқдим курси” намлиқ бир түр тәстиқлап, тәләп қилғучилар билән тәқдим қилғучиларниң түрлүк саһәдә билим алмаштурушиға пайдилиқ ишларни пиланлимақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.