Уйғур аилигә түрк шәһәр башлиқи игә чиқти

Ихтиярий мухбиримиз әркин тарим
2015.10.02
Share on WhatsApp
Share on WhatsApp
ershat-mexmut-ailisi.jpg Маниса шәһәрлик һөкүмити ярдәм қилған, хитайниң бесимидин манисаға қечип кәлгән ершат мәхмут аилиси. 2015-Йили өктәбир, түркийә.
RFA/Erkin Tarim

Хитайниң бесимидин қечип түркийәгә кәлгән бир уйғур аилигә түркийә измир маниса шәһәрлик һөкүмәт игә чиқип хизмәткә орунлаштурди.

Маниса шәһәрлик һөкүмити бундин 5 ай бурун хитайниң бесимидин манисаға қечип келип кона бир амбарда йетип қопқан 5 яшта бир пәрзәнти бар ершат мәхмут аилисигә ярдәм қолини узатти. Маниса шәһәрлик һөкүмәт бу аилини байқиғандин кейин буларға юнус әмраһ мәһәллисидин өй иҗаригә елип бәргән. Арқидинла ершат мәхмут билән аяли айшә қадирни ататүрк кәнт бағчисида хизмәткә орунлаштурған. Ершат мәхмут 1-өктәбир күни милләт гезитигә бәргән баянатида, бир балиси вә аяли билән 3 җанниң нурғун қийинчилиқларни бешидин өткүзгәнликини, йеқинда маниса шәһириниң башлиқи җеңгиз әргүн әпәндиниң ярдими билән әр-аял иккисиниң хизмәткә орунлишип турмуш җәһәттин хатирҗәм болғанлиқини ейтқан. 5 яштики оғли имранни маниса шәһәрлик һөкүмәтниң йәслисигә бәргәнликини баян қилған.

Шәһәр башлиқи җиңгиз әргүнгә көп рәһмәт ейтимиз

Нурғун қийинчилиқларни бешидин өткүзгәнликини турмушиниң әмдиләтин аста-аста түзилишкә башлиғанлиқини баян қилған ершат мәхмут әпәнди хитайниң бесимидин қечип кәлгәнликини баян қилип мундақ дегән:
Мән уйғур түркимән. Хитай зулумидин қечип манисаға кәлдим. Бәш яшлиқ бир оғлум бар. Аялим билән маниса шәһәрлик һөкүмәттә ишчи болуп ишләшкә башлидуқ. Баламни шәһәрлик һөкүмәтниң йәслисигә бәрдуқ. Турмушимиз аста-аста түзүлүшкә башлиди. Маниса хәлқи меһмандост бәк яхши икән. Маниса шәһәр башлиқи җеңгиз әргүн бәк яхши адәм икән, бизгә көп ярдәм қилди. Униңға рәһмәт ейтимиз, аллаһ униңдин рази болсун.

Шәһәрлик һөкүмәт игә чиқмиған болса кочида қалаттуқ

Уйғур мусапир илшат мәхмутниң аяли айшә қадир ханим 1-өктәбир күни түркийәниң әң чоң гезитлиридин бири болған милләт гезитигә бәргән баянатида, маниса шәһириниң башлиқи игә чиқмиған болса талада қалидиғанлиқини баян қилип мундақ дегән: шәһәр башлиқи җеңгиз әргүн бизгә игә чиқти. Ишикини ачти. Әгәр у бизгә игә чиқмиған болса, талада қелишқа мәҗбур болаттуқ. Бәзи кишиләр бизниң бу йәрдә турушимизни халимиди. Һазир хизмитимиз бар. Мудиримиз вә хизмәтдашлиримизму бизгә бәк яхши муамилә қиливатиду. Шәһәр башлиқимиз җеңгиз әргүн әпәндигә көп рәһмәт ейтимиз, аллаһ униңдин рази болсун.

Түркийәдә нурғун ишсиз адәмләр туруп бундақ бир уйғурни хизмәткә орунлаштурушни қандақ чүшинишимиз керәк? түркийәгә йеңи кәлгән мусапир уйғурларниң хизмәт тепишидики қийинчилиқлар немә? вә бу қийинчилиқларни һәл қилишниң йоллири тоғрисида мусапирларға ярдәм қилиш хизмәтлири билән шуғуллиниватқан һидайәтуллаһ оғузхан әпәнди билән сөһбәт елип бардуқ.

У, түркләр уйғурларни узақтики қериндаш дәп көридиғанлиқини, шуңа маниса шәһәр башлиқиниң бир уйғур әр-аялни хизмәткә орунлаштурғанлиқини ейтти. У, йәнә уйғур мусапирларниң түркийәдә қануний ишләш һоқуқиға игә болуш үчүн һөкүмәт билән көрүшүватқанлиқини, йеқинда хуш хәвәрни уйғурларға йәткүзидиғанлиқини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.