Shiwétsiyede öz aldigha igilik tikligen Uyghur yash enwer abdulla

Shiwétsiyediki Uyghur yash enwer abdullaning yanfon we kompyutér sétish, rémont qilish shirkiti. 2016-Yili mart.

Shiwétsiyege kélip yerleshken Uyghurlar ichide qisqa waqit ichide shiwét tilini pishshiq öginip, her xil kesiplerde xizmet qilish bilen birge, Uyghurlarning tijaret jehettiki artuqchiliqini jari qildurup öz aldigha igilik tiklewatqanlarmu az emes.

Ene shularning biri, shiwétsiyege kélip qisqighine 3 yil ichide özining yan téléfon we kompyutér sétish, rémont qilish shirkitini qurup chiqqan Uyghur yash enwer abdulla bolup, uning igilik tiklesh yolidiki izdinishi we qolgha keltürgen netijiliri Uyghur jama'itining maxtishigha sazawer boldi.

Biz enwer abdullaning tijaret bashlash, tijaritini kéngeytish jeryani hemde Uyghur yashlarni yéteklesh jehette qandaq ishlarni élip barghanliqi heqqide tepsiliy melumat élish üchün, téléfon arqiliq ziyaret qilduq.

1997-Yili “5-Féwral” ghulja weqesige qatnashqanliqi üchün wetinidin ayrilishqa mejbur bolghan enwer abdulla qazaqistan'gha chiqip ketken.

U, 2007-yili qazaqistanda bille tijaret qiliwatqan shériklirining xitaylar teripidin tutulup, Uyghur diyarigha élip kétilgenliki, özi heqqidimu tutush buyruqi chiqirilghanliqi toghrisida toxtaldi.

Enwer abdulla qazaqistandimu turush imkaniyiti bolmighanliqtin birleshken döletler teshkilati köchmenler komitétining qazaqistandiki shöbisidin yardem telep qilghan we panahliq iltimasi qobul qilinip, shu yili shiwétsiyege orunlashqan.

Enwer abdulla a'ilisi bilen bille shiwétsiyege orunlashqandin kéyin, qisqa waqit ichide til ötkilidin ötüp, özining Uyghur diyari we qazaqistanda qilghan tijariti yan téléfon we kompyutér sétish, rémont qilish tijaritini shiwétsiyede bashlash üchün shara'it hazirlaydu.

U, özi turushluq rayonning igilik tikligüchilerni terbiyilesh kursini tamamlap, yan téléfon we kompyutér sétish, rémont qilish shirkitini qurup 2010-yili 6-ayda shiwétsiyening yotobori shehirining merkizi rayonida tijaritini bashlaydu.

Shiwétsiyediki Uyghur jama'itidin abbas ependi enwer abdullaning tijaret jehettiki artuqchiliqini jari qildurup öz aldigha igilik tiklep, Uyghur jama'itige yaxshi ülge tiklep bergenliki heqqide toxtaldi.

Enwer abdulla öz aldigha igilik tiklepla qalmay, belki Uyghur dawasini kelgen xéridarlirigha anglitishqa tirishti. U, etrapidiki Uyghur yashlarni öz aldigha igilik yaritishqa yéteklesh bilen birge, ularning dukan échishi üchün yardemde boldi. Enwer abdullaning yardimi bilen öz aldigha igilik tikligen extem bu toghrisida toxtaldi.

Ziyaret axirida özining kelgüsi pilanliri heqqide biz bilen ortaqlashqan enwer abdulla bu kesipni öginishke qiziqidighan we ögen'güsi bar Uyghurlar üchün her waqit yardemde bolidighanliqini ipade qildi.