Гуаңхүй гуруһи қурған көмүр вә химийә завутлири ном йезисидики тәбиий тоғрақлиққа хирис елип кәлгән

Мухбиримиз қутлан
2015.10.13
Share on WhatsApp
Share on WhatsApp
gwangxuy-shirkiti-araturk-nahiyesi-1.jpg Гваңхуй ширкити қурған завутлар ном йезиси тәвәсидики қәдимий тоғрақлиқни булғимақта. 2015-Йили өктәбир.
Social Media

Йеқинда иҗтимаий таратқулар арқилиқ ашкара болған аратүрк наһийәсидики еғир муһит булғиниш вәтән ичи вә сиртидики җамаәтчиликниң диққитини қозғимақта.

Мәлум болушичә, гуаңхүй гуруһи буниңдин бирқанчә йиллар илгири аратүрк наһийәсиниң ном йезиси тәвәсидә көмүр вә етилен пишшиқлап ишләш завути қурған.

Завуттин тинимсиз һалда сиртқа чиқирилған кислаталиқ паскина су билән һаваға қоюп берилгән зәһәрлик ис-түтәк әзәлдин һаваси сап бу тағлиқ наһийәни еғир дәриҗидә булғашқа башлиған. Болупму ном йезиси тәвәсидики бийпаян қәдимий тоғрақлиқ һава вә муһиттики булғиниш түпәйли җиддий хирисқа дуч кәлгән.

Биз иҗтимаий таратқулар арқилиқ ашкара болған учурларға асасән гуаңхүй гуруһиниң аратүрк наһийәсидики көмүр кан ишханисиға телефон қилдуқ. Һалбуки, телефонимизни қобул қилған хитай хадим соаллиримизға җаваб беришни рәт қилди.

Андин биз мәзкур наһийәдики йәрлик хәлқтин әһвал игиләшкә тириштуқ. Зияритимизни қобул қилған бир йәрлик уйғур деһқан хитайлар қурған завут, кан-карханиларниң өз юртиға көрситиватқан еғир хирислири һәққидә шикайәт қилди.

Аратүрк наһийәси қумул вилайитиниң шималий қисмиға җайлашқан бир кичик наһийә. У тәңритағ тизмилири арқилиқ җәнубта қумул түзләңликидин айрилип туриду. Шималий қисми моңғулийә хәлқ җумһурийити билән чегралиниду. Аратүрк наһийәси уйғурларни асас қилған қәдимий юрт болуп, 1931-йилидин 1951-йилиғичә болған җәрянда көп қетим хитайниң миллий зулумиға қарши қораллиқ қозғилаңлар йүз бәргән җайларниң биридур.

Аратүрк наһийәси тухоло йезисиниң башлиқиму зияритимизни қобул қилип, гуаңхүй гуруһи қурған завутларниң аратүрк наһийәсигә, болупму ном йезисиниң муһитиға көрсәткән тәсирлирини баян қилди.

Мәлумки, аратүрк наһийәси йерим деһқанчилиқ билән йерим чарвичилиқни асас қилған тағлиқ чегра наһийә болуп, бу йәрдә яшиғучи йәрлик уйғурлар тарихтин буян давамлаштуруп кәлгән ишләпчиқириш шәкли билән турмуш усулини йеқинқи мәзгилләргичә сақлап кәлгән. Һалбуки, даириләрниң наһийәни мәҗбурий һалда санаәтләштүрүш пилани худди тохуло йезисиниң башлиқи тәкитлигинидәк “деһқанларни кәтмәндин, чарвичиларни қамчидин айриған.”

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.