Alma shirkitining xitaydiki bir qisim mulazimiti cheklen'gen

22 - Aprél küni alma shirkiti bayanat bérip, shirketning xitaydiki ikki chong mulazimiti yeni éléktronluq kitab we kino mulazimitining toxtighanliqini bildürdi. Alma shirkiti mulazimetning toxtishigha “Da'irilerning alma shirkiti teripidin sétilghan éléktronluq kitablar we kinolarning mezmunigha qaritilghan kontrolluq seweb bolghan” liqini bildürdi. Weqening xitay re'isi shi jinpingning riyasetchilikide 19 - aprél échilghan merkizi hökümetning tor - uchur xeterliki yighinidin kéyin yüz bérishi taratqularning diqqitini qozghidi.

Xitay bilen nisbeten yaxshi munasiwitini saqlap kéliwatqan alma shirkitiningmu xitaydiki mulazimitining toxtitilishi, xitay we xelq'arada yene bir qétimliq munazire témisi boldi.

Xewerlerdin melum bolushiche, alma shirkiti bayanatida yéqin arida xitaydiki mulazimitini eslige keltürüp, xitaydiki xéridarlirining tordin kitab sétiwélishi we kino filimlirini körüshige kapaletlik qilidighanliqini bildürgen bolsimu, emma mulazimetning qachan eslige kélidighanliqi heqqide toxtalmighan.

Ündidardiki “Léngféng saloni” ning bildürüshiche, alma shirkitining xitaydiki mulazimitining taqilishigha 10 - mart küni xitay döletlik neshriyat, kino - téléwiziye bash nazaret ishxanisi bilen xitay soda - sana'et uchur merkizi birlikte élan qilghan “Intérnét uchur mulazimitini bashqurush qa'idiliri” de belgilen'gen yéngi nizamlar seweb bolghanliqi tilgha élin'ghan. Belgilimide“Muzika, kino qatarliqlarmu tor neshr buyumlirigha tewe bolghini üchün, herqandaq orunning öz aldigha kino we naxsha - muzika plastinkilirini xitay chégrasi ichide tarqitishigha yol qoyulmaydu, munasiwetlik tor bashqurush apparatliri choqum xitay chégrasi ichide bolushi kérek, chet'el shirketliri peqet xitay hökümitining ruxsitini alghandila andin xitay shirketliri bilen hemkarlashsa bolidu” déyilgen.

Weqening xitay re'isi shi jinpingning riyasetchilikide 19 - aprél échilghan merkizi hökümetning tor - uchur bixeterliki yighinidin kéyin yüz bérishi weziyet analizchilirining diqqitini qozghidi.

Alma shirkitining xitaydiki mulazimitini qollinip kéliwatqan, xitay kishilik hoquq aktipliridin xunenlik o byaw féng ependi radiyomiz ziyaritini qobul qilip, “Méningche hökümetning alma shirkitining xitaydiki tor mulazimitining toxtishigha xitay hökümiti teripidin cheklen'gen “Xongkongning 10 yili” namliq filimning iTunes kino toridiki tizimlikler arisida bolghanliqi seweb bolghan bolushi mumkin dep qaraymen. Chünki hazir dölitimizde jem'iyetke bolghan nazaret barghanche kücheydi, xewer we tordiki inkaslarning hemmisini süzgüchtin ötküzüsh telep qiliniwatidu. Hökümet alma shirkitining mulazimitini taqiwetse manga oxshash iTunes kino mulazimitini ishletmeydighanlar üchün tesiri chong bolmaydu, men tam atlash yoli arqiliq gogul, twitér, yutup qatarliq chet'ellerning tor mulazimitidin paydilinip uchurlarni körimen. Lékin men junggo hökümitining intérnét mulazimiti we tordiki pikir erkinlikini cheklishige naraziliq bildürimen” dédi.

Xitay we Uyghur weziyitini uzundin közitip kéliwatqan muhajirettiki Uyghur pa'aliyetchiliridin kanadadiki kompyutér uchur - alaqe mutexessisi ömerjan ependi radiyomiz ziyaritini qobul qilip, alma shirkitining xitaydiki mulazimitining taqilishigha xitay hökümitining siyasiti seweb bolghanliqini bildürdi.

Ömerjan ependi xitay hökümitining chet'el taratquliri we intérnét mulazimet shirketlirining xitaydiki mulazimitini uzundin buyan cheklep kéliwatqan bolsimu, emma soda éhtiyaji seweblik alma shirkiti qatarliqlarning xitaydiki tor mulazimitige yol qoyup kelgenlikini, shunga bu qétim belkim alma shirkitining kitab we kino mulazimitige bir qisim cheklimilerni qoyghan bolsimu, belkim bir mezgildin kéyin soda éhtiyaji seweblik alma shirkitining xitaydiki mulazimitini özi échish telipini qoyushi mumkinlikini bildürdi.

Amérika Uyghur birleshmisining re'isi élshat hesen ependi bolsa, xitaydiki intérnét uchur qamalining barghanche küchiyip méngishi mumkinlikini bildürüp, xitay re'isi shi jinpingning 19 - aprél échilghan xitay merkizi hökümitining intérnét uchur yighinida gerche intérnéttiki uchurlargha ehmiyet bérishni tekitligen bolsimu, emma kommunist hakimiyitining qarshi pikir éqimining küchiyishidin qorqqanliqi üchün intérnét uchur kontrolluqini barghanche kücheytishi mumkinlikini bildürdi.

Ündidar saloni qanun sehipiside 20 - aprél tarqalghan bir uqturushta yanfon ishletküchiler erkin asiya radiyosi yanfon yumtali qatarliq 9 xil yanfon yumtalini ishlitishtin hezer eyleshke chaqirilghan.

Élshat ependi mezkur agahlandurush heqqide toxtaldi we da'irilerning özliri yoshuruwatqan mesililerning chet'el taratquliri arqiliq xitay puqraliri we Uyghurlargha anglitilishidin ensirigenliki üchün cheklesh wasitilirini barghanche kücheytiwatqanliqini bildürdi.