D u q “Uyghur irqiy qirghinchiliqi” ni shiwétsiye hökümitige anglatmaqta

Ixtiyariy muxbirimiz ekrem
2022-05-19
Share
D u q “Uyghur irqiy qirghinchiliqi” ni shiwétsiye hökümitige anglatmaqta D u q re'isi dolqun eysa bashchiliqidiki wekiller shiwétsiye hökümet we parlamént xadimliridin “Uyghur irqiy qirghinchiliqi” ni étirap qilishni telep qildi. 2022-Yili 18-may, shiwétsiye.
RFA/Ekrem

18-Maydin bashlap shiwétsiye paytexti stokholimda 3 künlük ziyaritini bashlighan d u q re'isi dolqun eysa, d u q programma yétekchisi zumret'ay qatarliqlar d u q ning shiwétsiyede turushluq bayanatchisi dilshat réshit we shiwétsiyediki Uyghur teshkilatlirining mes'ulliri bilen birlikte ikki kündin buyan shiwétsiye hökümet we parlamént xadimliri bilen uchrishishlar élip bérip, Uyghurlarning nöwettiki éghir weziyitini anglatqan.

Söhbetler esnasida ular shiwétsiye hökümet xadimlirigha sherqiy türkistandiki xitay zulumini anglitish bilen birge, “Uyghur sot kollégiyesi” ning ötken yili qobul qilghan “Uyghur irqiy qirghinchiliqi” we “Insaniyetke qarshi jinayet” qararini étirap qilghuzushqa tirishqan hemde Uyghurlarning telep-isteklirini bildürüp ötken.

D u q re'isi dolqun eysa bashchiliqidiki wekiller shiwétsiye hökümet we parlamént xadimliridin “Uyghur irqiy qirghinchiliqi” ni étirap qilishni telep qilish pa'aliyitide xatire süret. 2022-Yili 18-may, shiwétsiye.
D u q re'isi dolqun eysa bashchiliqidiki wekiller shiwétsiye hökümet we parlamént xadimliridin “Uyghur irqiy qirghinchiliqi” ni étirap qilishni telep qilish pa'aliyitide xatire süret. 2022-Yili 18-may, shiwétsiye.
RFA/Ekrem

Stokholimdin ziyaritimizni qobul qilghan d u q re'isi dolqun eysa ependi shiwétsiyediki pa'aliyetler heqqide toxtalghanda, “Uyghur sot kollégiyesi” ning “Uyghur irqiy qirghinchiliqi” we “Insaniyetke qarshi jinayet” qararini yawropa döletlirige étirap qildurush üchün, d u q ning xélidin buyan heriketke ötkenlikini, shiwétsiyediki pa'aliyetning shu pilanning bir terkibiy qismi ikenlikini tekitlidi.

D u q programma yitekchisi zumret'ay bu heqte pikir bayan qilghanda, yawropadiki bashqa döletlerge qarighanda Uyghurlarni yaxshiraq bilidighan shiwétsiyeliklerge “Uyghur irqiy qirghinchiliqi” ni tonutush arqiliq, shiwétsiye parlaméntida Uyghurlargha munasiwetlik qararlarni alghuzush we ilgiriki yillarda qurulghan shiwétsiye parlaméntidiki “Uyghur dostluq goruppisi” ni qaytidin janlandurush, jiddiy heriketke ötküzüshning bu qétimqi pa'aliyetlerning asasliq meqsetliridin biri bolghanliqini eskertti.

D u q rehberlirining stokholimdiki pa'aliyetlirige hemrah bolghan qurultay bayanatchisi dilshat réshitmu bu xususta ipade bildürüp, shiwétsiye hökümet we parlamént xadimliri bilen élip barghan bu uchrishishlarning nahayiti ehmiyetlik bolghanliqini tilgha aldi.

D u q rehberlirining bildürishiche, shiwétsiye hökümet we parlamént xadimliri bilen bolghan uchrishushtin sirt, ular 20-mayghiche yene shiwétsiyediki hersahe kishilik hoquq teshkilatliri bilenmu söhbetler ötküzüp, Uyghurlar mesilisini tonutidiken hemde öz'ara hemkarliqlar üstide izdinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet