Мәликә һәнд әл-қасими: "хитайниң һазирқи рәиси хитайлар үчүнму бир қабаһәт"

Мухбиримиз нуриман
2020-04-27
Share
melike-hend-el-qasimi-xanim.jpg Әрәб бирләшмә хәлипиликидики хан җәмәтиниң әзаси болған мәликә һәнд әл-қасими ханим йиғинда. 2020-Йили апрел.
Hend El-Qasimi teminligen

Уйғур паалийәтчи арслан һидайәт 25-апрел йәһудий чоң қирғинчилиқини хатириләш билән бир вақитта нөвәттә уйғурлар дуч келиватқан қирғинчилиққа дуняниң диққитини тартиш үчүн "уйғур чоң қирғинчилиқи" (UyghurHolocaust#) вә "мусулман чоң қирғинчилиқи" (MuslimHolocaust#) һәрикитини башлатқан.

Бу һәрикәткә әрәб бирләшмә хәлипиликидики хан җәмәтиниң әзаси болған мәликә һәнд әл-қасими ханим дәрһал аваз қошидиғанлиқини билдүрүп, қисқа син ишләп тарқатқан. Бу син көрүнүши қисқиғина бир қанчә күн ичидә 130 миң қетимдин көпрәк көрүлгән.

Мәликә һәнд әл-қасими ханим син көрүнүши арқилиқ мундақ дегән: "әссаламуәләйкум! рамизан мубарәк! һәммиңларниң тутуватқан розаңларниң яхши болушини тиләймән. Мән бу видейони һаятимниң бир қисимни уйғур қериндашлирим билән ортақлишиш вә уларниң зулумға қарши қиливатқан күрәшлиридә бир сәптә икәнликимни билдүрүш үчүн тарқаттим. Мән уларниң җаза лагерлиридин пат арида қоюп берилишигә тиләкдашмән. Биз хитайда йүз бериватқан бу мусулманлар чоң қирғинчилиқиға ортақ тақабил турушимиз керәк."

Арслан һидайәт бу қетимлиқ паалийити һәққидә тохтилип мундақ деди: "әгәр йәһудийлар баштин кәчүргән чоң қирғинчилиқини һәқиқәтән хатириләйдиған иш болса, һазир йүз бериватқан қирғинчилиқларни тохтитиш керәк."

Мәликә һәнд әл-қасими ханим узундин бери уйғур мәсилисигә диққәт қилип келиватқан болуп, рамизан мәзгилидә уйғур мусулман қериндашлириниң йиғивелиш лагерлирида қелиши уни биарам қилған. У хитайниң тероризимни баһанә қелип милйонлиған уйғур мусулманлирини лагерларға солап қоюшиниң хата тәдбир икәнликини тәкитләп, мундақ деди: "мән хитайға барған, шундақ яқтурған идим. Хитайниң бир деһқанчилиқ дөлитидин мушундақ күчлүк дөләт қатариға өтүши үчүн хушал болған идим. Лекин уларниң уйғурларға қилғанлирини көргәндин кийин хитайни яқтурмидим."

У йәнә мундақ деди: "уйғурларға йүргүзүлүватқан зулумни тохтитиш үчүн бир иш қилалишимизни үмид қилимән. Хитай һөкүмити билән сөзлишип уйғурларға йүргүзүватқан сияситини тохтитишни тәләп қилишмиз мумкин. Хитай тәрәп террорлуқни түгитиш үчүн мушундақ сиясәт йүргүзгәнликини дәп келиватиду. Лекин хата қилған бир қанчә киши 11 милйонлуқ бир милләткә вәкиллик қилалмайду. Биз мусулманлар тинчлиқни халаймиз, һәр қандақ бир кишиниң тинч яшашқа һәққи бар."

Мәликә һәнд әл-қасими ханим хитайниң уйғурларға қаратқан бастурушини "мусулман чоң қирғинчилиқи" дәп атиған вә уйғурлар билән бир сәптә икәнлики һәққидә очуқ пикир баян қилған тунҗи мусулман җамаәт әрбаби болуши мумкин. Мәликә һәнд әл-қасими ханим бу һәқтә тохтилип, әрәб дунясиниң уйғурларниң әһвалидин хәвәрсиз икәнликини тилға алди.

Арслан һидайәт мәликә һәнд әл-қасими ханимниң тәсири билән әрәб дунясиниң әмәлдарлиридин рәсмий баянат келишни үмид қилидиғанлиқини билдүрүп, мундақ деди: "бәзи дөләтләр хәт арқилиқ хитайға наразилиқини ипадилиди, лекин очуқ-ашкара баянат елан қилмиди. Иншааллаһ, мәликә һәнд әл-қасими ханимниң баянатидин кейин әрәб дунясиниң юқири дәриҗилик әмәлдарлириниң уйғур мусулманларни қоллап хитайға қарши баянат беришини үмид қилимән."

Мәликә һәнд әл-қасими ханим ахирида йәнә өзиниң лагерлар һәққидә бир китаб язғуси барлиқини, һәқиқий шәхсләрниң һәқиқий һекайиси арқилиқ пүтүн дуня хәлқини бирликтә бу қирғинчилиққа қарши турушқа дәвәт қилидиғанлиқини ейтти.

У йәнә мундақ деди: "биз хитайниң лагерларни тақиши үчүн чоқум бирлишишимиз керәк. Хитай инсанларни лагерларға солиди, һамилә аялларниң балилирини еливәтти, аилиләрни вәйран қилди, бу хата. Хитайниң һазирқи рәиси хитайлар үчүнму бир қабаһәт."

Мәликә һәнд әл-қасими ханимниң уйғурларни қоллап йоллиған син көрүнүши муһаҗирәттики уйғурлар арисида қизғин алқишқа еришкән болуп, син көрүнүшиниң астиға йүзләрчә рәһмәт хәтлири чүшкән. Муһаҗирәттики уйғурлар германийәлик түрк путболчи мәсут өзилниң бир қетимлиқ баянати арқилиқ тәнтәрбийә саһәсидики даңлиқларға тәсир қилғандәк, мәликә һәнд әл-қасими ханимниң бу очуқ баянатиниң әрәб дунясидики даңлиқ шәхсләрниң уйғурларни қоллишиға вәсилә болуп қелишини үмид қилишмақта.

Арслан һидайәт муһаҗирәттики уйғур яшларға мундақ хитаб қилди: "бешимизға келиватқан бу қирғинчилиқни түгитиш үчүн, аримиздин йеңи абдухалиқ уйғур, йеңи сабит дамоллам, йеңи әхмәтҗан қасимилар чиқиши керәк. Биз үчинчи қетим дөлитимизниң қурулуши үчүн бир кишилик төһпимизни қошимиз, дейәлишимиз керәк."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт