Istanbuldiki Uyghur ösmürler “Ana til söygüsi” pa'aliyiti ötküzdi

Istanbuldin ixtiyariy muxbirimiz arslan teyyarlidi
2024.02.23
uyghur-osmur-ana-til-istanbul-1.jpg Merkizi istanbulning zeytinburnugha jaylashqan “Ma'arip yeslisi” diki Uyghur balilar “Ana til söygüsi” pa'aliyiti ötküzmekte. 2024-Yili 21-féwral, türkiye.
RFA/Arslan

Muhajirettiki bashqa barliq Uyghurlargha oxshashla istanbuldiki Uyghur ata-anilarmu perzentlirige ana til, milliy medeniyet we dini étiqadini ögitish, shundaqla ulargha Uyghurluq rohini singdürüsh jehette tirishchanliq körsetmekte.

21-Féwral “Dunya ana tili” küni munasiwiti bilen merkizi istanbulning zeytinburnugha jaylashqan “Ma'arip yeslisi” diki Uyghur balilar “Ana til söygüsi” pa'aliyiti ötküzdi. Ular guruppilargha uyushturulup, sehnide her xil nomurlarni körsetti.

Ana tilim méning gülüm-méning bayriqim,

Méning textim, méning bextim, méning bayliqim.

Uyghur yesli baliliri we ösmürliri shu küni ana tiligha bolghan söygüsi we hés-tuyghulirini yuqiriqi misralar bilen ipade qildi.

Pa'aliyet bashlinishi bilen türkiye jumhuriyiti bilen sherqiy türkistan istiqlal marshi oquldi. Andin sherqiy türkistan “Ma'arip yeslisi” ning mudiri xurshide artish xanim, “Dunya ana tili küni” ni tebriklidi. U mundaq dédi: “Biz Uyghurlar ana wetinimizdiki zulum sewebidin 20-esirning aldinqi yérimidin bashlap keng kölemde köchüshke we ana tupraqlirimizdin ayrilip, dunyaning her qaysi jaylirida yashashqa mejbur bolup kelduq. Bizler hazir öz mewjutluqimiz we medeniyitimizni saqlap qélish üchün tirishiwatimiz, biz oqutquchilar balilirimizgha we oqughuchilirimizgha ana tilini ögitishni, milletning medeniyitini saqlap qélishni hemmidin muhim, dep qaraymiz”.

Merkizi istanbulning zeytinburnugha jaylashqan “Ma'arip yeslisi” diki Uyghur balilar “Ana til söygüsi” pa'aliyiti ötküzmekte. 2024-Yili 21-féwral, türkiye.
Merkizi istanbulning zeytinburnugha jaylashqan “Ma'arip yeslisi” diki Uyghur balilar “Ana til söygüsi” pa'aliyiti ötküzmekte. 2024-Yili 21-féwral, türkiye.
RFA/Arslan

Xurshide xanim “Ma'arip yeslisi” de Uyghur perzentlirige Uyghur tili we medeniyitini ögitishke ehmiyet bériwatqanliqini tekitlep, mundaq dédi: “Öz tariximiz we medeniyitimizni oqughuchilarning hés-toyghusi, zéhni quwwiti we heriket alahidilikige maslashturup ögitish, bizning nishanimizdur. Shunga biz kelgüsimiz bolghan ösmürlerge ana tilimizni ögitish arqiliq, ularda saghlam milliy kimlik we özige bolghan ishenchisini yétildürüshke shara'it teyyarlap bériwatimiz. Ana tilimizda dramma we türlük oyunlarni asas qilghan pa'aliyetler arqiliq, balilarning ijadiy tepekkurini hemde mesililerni hel qilish iqtidarini terbiyelewatimiz. Balilarning ana tilida shé'ir, qoshaq we naxsha anglash, shundaqla sözlesh iqtidarini ashurup, ularni bashlan'ghuch mektep sewiyesi bilen teng qedemde yétishtürüp kéliwatimiz. Her yili mektep yéshigha kelgen balilargha élipbeni tonush we oqushni ögitiwatimiz, ana til ders programmisi shekillendürüwatimiz, mushundaq yaxshi oqush shara'iti teyyarlap bergen büyüklirimizdin merhum abdulhekimxan mexsumhajimdin allah razi bolsun, rebbim yatqan yérini jennette qilsun!”

Ösmürler bu pa'aliyet jeryanida “Ana tilim”, “Oyghan”, “Kök bayriqim” qatarliq shé'irlarni jarangliq déklamatsiye qilip, yighin'gha qatnashquchilarning qizghin alqishigha érishti.

Ey ana tilim Uyghurning tili,

Sen bilen meshhur mexmud qeshqeri

Ana tilim jan tilim, hayatimda qal tilim

Ana tilim bolghachqa Uyghur deymen özümni.

Harun isimlik ösmürmu “Kök bayriqim” dégen shé'irni jarangliq déklamatsiye qildi:

Bayriqim, kök bayriqim,

Taji texitim, bayliqim

Talay shéhit jan bergen

Ay-yuzluq kök bayriqim

Hör wetinim asmini

Nur chaqnaydu yultuzi

Hilal aydur hemrahi

Lepilder kök bayriqim,

Uyghurumgha pasiban

Sanga bolsun pida jan

Bu zulmetni yurutqan

Yultuzumsen bayriqim.

Hayatimning menasi

Sen üchündur bayriqim,

Ejdad rohiy mirasi,

Ghururumsen bayriqim.

Pa'aliyet axirida nomur körsetken pütün ösmürler teqdirlendi, ular her xil oyunchuqlar we maddiy buyumlar bilen mukapatlandi.

Ötken hepte “Dunya ana til küni” munasiwiti bilen istanbuldiki Uyghur akadémiyesi wexpisi we Uyghur ana tili komitéti, tangnuri telim-terbiye merkizi we serxiller ma'aripi qatarliq orunlarning birlikte uyushturushi bilen “Uyghurlarda ana til söygüsi” namliq edebiyat-sen'et pa'aliyiti ötküzülgen idi. Bu pa'aliyette söz qilghan Uyghur ziyaliyliri muhajirettiki Uyghurlarning ana tiligha téximu ehmiyet bérishni tekitleshken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.