Istanbulda ötküzülgen qurban héyt pa'aliyitide Uyghurlarning zulumdin qutulushi üchün ortaq hemkarlishish tekitlendi

Istanbulda ötküzülgen qurban héytni tebriklesh pa'aliyitide sherqiy türkistan ma'arip we hemkarliq jem'iyiti re'isi hidayetulla oghuzxan sözlewatidu. 2024-Yili 19-iyun, istanbul.

Yilda bir qétim tebriklinidighan musulmanlarning bayrimi bolghan qurban héyt yétip kélishi bilen Uyghur diyaridiki musulman xelqler cheklimige uchrap bayramni köngüllük ötküzüshtin mehrum qilin'ghan bir peytte muhajirettiki Uyghurlar köngli yérim bolsimu qurban héytni öz'ara xushal ötküzüshke tiriship kelmekte.

Jümlidin istanbuldiki Uyghur teshkilatlirining birlikte uyushturushi bilen qurban héytning 4-küni, yeni 19-iyun istanbulning Uyghurlar köp olturaqlashqan sefaköy rayonida köp sanda er-ayal we perzentlerning qatnishishi bilen qurban héyt bayrimini tebriklesh pa'aliyiti ötküzüldi.

Pa'aliyet qur'ani kerim tilawiti bilen bashlandi, pa'aliyette sherqiy türkistan ma'arip we hemkarliq jem'iyiti re'isi hidayetulla oghuzxan söz qilip pütün Uyghur xelqining qurban héytini tebriklidi we kéler qétimliq héytlishish pa'aliyitini sherqiy türkistanda birlikte ötküzüsh arzusini izhar qildi.

Hidayetulla oghuzxan sözide, bügünki künde Uyghur xelqining xitayning qirghinchiliq siyasiti astida ingrawatqanliqini, erkin dunyadiki Uyghurlardin ümid kütüp jimjitliq ichide du'a qiliwatqanliqini bildürdi. U: “Xelq ümid kütüwatqan biz chet ellerdiki, erkin dunyadiki Uyghurlar bolush süpitimiz bilen bu ulugh bayram kündimu, héyt bayrimi tentenisi qiliwatqan bolsaqmu gheplettin oyghinip hem özimizning mewjutluqini hem yoq bolushqa duchar boluwatqan xelqimizni zulumdin qutuldurushni untumasliqimiz kérek”, dédi.

Hidayetulla oghuzxan sözide, Uyghur diyarida héyt bolmighanliqini, qurban héytning Uyghurlarning dini étiqadi we milliy örp-aditi boyiche ötküzülmey jimjitliq ichide ötkenlikini tekitlidi we Uyghur ösmürlirige xitayning milliy kiyimlirini kiydürüp xitayche bayram ötküzüshke mejburlan'ghanliqini ijtima'iy taratqularda tarqalghan sin arqiliq körüp yürikining échishqanliqini ipadilidi.

RFA/Arslan

Pa'aliyette söz qilghan sherqiy türkistan ölimalar birliki re'isi doktor alimjan bughda Uyghurlarning qurban héytini tebriklesh bilen birge, “Sherqiy türkistanning özgermes qizil siziqlirini qoghdash” ni tekitlep, nurghunlighan Uyghur xelqining “Öz wetinini, dini étiqadini we milliy medeniyitini qoghdash yolida bedel tülep türmige tashliniwatqanliqini we shéhit boluwatqanliqini, Uyghurlarning dini étiqadi, milliy medeniyitige oxshash qimmet qarashlirigha ige chiqish kéreklikini, bashqilarning kemsitishige, özgertishige we ayagh asti qilishigha yol qoymasliq lazimliqi” ni tekitlidi.

RFA/Arslan

Pa'aliyette yene sherqiy türkistan jem'iyitining re'is wekili xalid muhemmed emin söz qilip Uyghurlarning qurban héytini tebriklidi we mundaq dédi: “Bügünki bu héytlishish pa'aliyitimiz hergizmu héyt tentenisi qilish emesliki ochuq bir heqiqet, chünki ana wetinimiz sherqiy türkistandiki eziz xelqimizning tartiwatqan azab-oqubetliri bizni bügünkidek héyt künliride bolsun we yaki bashqa künlerde bolsun, omumen her qandaq xushalliq künlerde bolsun shu azab-oqubetlerni qelbimizde hés qilmay turalmaymiz, shunga bügünki bu héytlishishni héyt tentenisidin bekrek öz'ara méhir-muhebbetni kücheytish, inaqliqimizni, ittipaqliqimizni kücheytish soruni dep qaraymen we eng qisqa waqit ichide wetinimiz sherqiy türkistan'gha ghelibe bilen qaytip mushuninggha oxshash héytni öz xelqimiz bilen birge heqiqiy héyt menisi bilen ötküzüshke nésip qilishni alladin tileymen” .

RFA/Arslan

Büyük birlik partiyesining mu'awin re'isi métin fidan'er ependi mundaq dédi: “Siler bilen birge héytlishish bizni nahayiti xushal qildi, silerni birlik-barawerlik ichide wetinimizde körüsh, birlikte yashash bizni téximu xushal qildi, bizning qérindashliqimiz ebediy dawamlishidu, biz büyük birlik partiyesi bolush süpitimiz bilen sherqiy türkistan mesilisini özimizning mesilisi dep qaraymiz, büyük birlik partiyesining sabiq re'isi merhum muhsim yaziji'oghli we hazirqi re'isimiz mustafa destiji sherqiy türkistan mesilisini özining mesilisi dep qarap, her zaman tilgha élip keldi, sherqiy türkistanliq qérindashlirimizning heq-hoquqi we musteqilliqi üchün her waqit tiriship keldi, buningdin kéyinmu küchimizning yétishiche sherqiy türkistanliq qérindashlirimizning yénida bolimiz we ularni qollaymiz” .

RFA/Arslan

Yighinda söz qilghan dunya Uyghur qurultiyi wexpisining re'isi abduréshit abdulhemit ependi, Uyghurlarning qurban héytini tebriklidi we teshkilatlar ara birlik-barawerlikning dawamlishishini ümid qilidighanliqini ipadilidi.

Pa'aliyette yene Uyghur ösmürliri qurban héyt toghrisida shé'ir déklamatsiye qildi.

Pa'aliyette yene istanbulidiki bashqa bir qisim Uyghur teshkilatliri we jem'iyetliri mes'ullirimu söz qilip héytni tebriklidi. Pa'aliyet jeryanida yene milliy en'ene boyiche yüzlerche Uyghur ösmür balilirigha bayramliq pul tarqitip bérilip balilar xushal qilindi.