Istanbuldiki Uyghurlar roza héytini bille ötküzdi
2015.07.19
17 - Iyul jüme küni türkiyede roza héyt tebriklendi. Bu munasiwet bilen istanbuldiki Uyghurlarmu roza héytini xushalliq bilen kütüwaldi.
Bu küni, sherqiy türkistan ma'arip we hemkarliq jem'iyiti sefaköy shöbisining uyushturushi bilen istanbuldiki Uyghurlardin er - ayal we kichik balilar bolup 1000 gha yéqin kishi istanbulning küchükchekmeje déngiz boyigha yighilip roza héyt bayrimini birlikte tebriklidi.
Pa'aliyette erler bilen ayallar ayrim - ayrim orun'gha topliship olturdi. Pa'aliyette aldi bilen sherqiy türkistan ma'arip we hemkarliq jem'iyitining sefaköy shöbe re'isi enwer qarim söz qildi we yighin ishtirakchilarning roza héyt bayrimini qizghin tebriklidi.
Kéyin abdulhekimxan mexsum, hidayetullah oghuzxan we abduqadir yapchan qatarliqlar söz qilip Uyghurlarning roza héyt bayrimini tebriklidi.
Déngiz boyidiki güzel menzirilik chimliq meydanda ötküzülgen bu pa'aliyette kichik ösmürler topliship her xil oyun oynidi we xushalliqqa chömdi.
Kéyin méhmanlargha tamaq ziyapiti bérildi we esir namizini birlikte oqughandin kéyin xushal keypiyat ichide öylirige qaytishti.
Bügün etigen seherde yene istanbulning zeytinburnudiki Uyghurlar emine inanch jamisige topliship roza héyt namizini birlikte oqudi we namazdin kéyin jami aldigha topliship qizghin salamlashti we bir - birining roza héyt bayrimini tebrikleshti kéyin hemmisi birdek du'agha qol kötürüp yaxshi tilekler tilidi.
Biz istanbulning déngiz boyida ötküzülgen roza héyt bayrimini tebriklesh pa'aliyiti toghrisida pa'aliyetni uyushturghan sherqiy türkistan ma'arip we hemkarliq jem'iyitining sefaköy shöbe re'isi enwerqarim bilen söhbet élip barduq.
Enwer qarim bu pa'aliyetni uyushturushtiki asasiy meqset toghrisida toxtilip, ghérib musapirliq ichide ötüwatqan hayatta roza héytni bir az bolsimu xushal ötküzüsh, istanbulgha yéngi kelgen Uyghur muhajirlar bilen ilgiri kelgen kona Uyghurlarni tonushturush, bir yerge jem qilip qérindashliq muhit berpa qilish shundaqla Uyghurlarning birlik - barawerlikni kücheytish we roza héytni xushal ötküzüsh üchün bu pa'aliyetni uyushturghanliqini ipadilidi.