Уйғур тәтқиқат институти “ийи” партийәси билән учришиш өткүзди

Ихтиярий мухбиримиз әркин тарим
2022-02-15
Share
Уйғур тәтқиқат институти “ийи” партийәси билән учришиш өткүзди Түркийәдики “ийи” партийәси рәисиниң түркий милләтләргә мәсул рәһбәрлиридин һекмәт оҗақли башчилиқидики һәйәт әнқәрәдики уйғур тәтқиқат мәркизини зиярәт қилди. 2022-Йили 15-феврал.
RFA/Erkin Tarim

Түркийәдики “ийи” партийәси рәисиниң түркий милләтләргә мәсул рәһбәрлиридин һекмәт оҗақли башчилиқидики һәйәт әнқәрәдики уйғур тәтқиқат мәркизини зиярәт қилип, уйғур мәсилисини түркийә җамаәтчиликигә қандақ аңлитиш, бундин кейин немиләрни қилиш тоғрисида музакирә елип барди. Музакирә ахирида һәйәт әзалириниң һәммиси айрим айрим сөз қилип, уйғур мәсилисиниң түркийә хәлқиниң өз мәсилиси икәнликини, бүгүн хитайниң уйғурларға елип бериватқан ирқий қирғинчилиққа кишиләрниң диққитини тартиш, түркийә парламентида бу тоғрилиқ қарар мақуллитиш үчүн қолидин кәлгәнни қилидиғанлиқини тәкитләшти.

15-Феврал күни чүштин кейин әнқәрәдики уйғур институтида өткүзүлгән мәзкур учришишта алди билән уйғур тәтқиқат институтиниң мутәхәссислири ели қәшқири вә муһәббәт қасимова сөз қилип, уйғурларниң һазирқи еғир вәзийити, мәзкур дәваниң хәлқарадики әһвали, дуня уйғур қурултийи вә уйғур тәтқиқат институтиниң паалийәтлири тоғрисида мәлумат бәрди.

“ийи” партийәсиниң түркий милләтләргә мәсул рәһбәрлиридин һекмәт оҗақли әпәнди болса уйғурларниң һазирқи еғир вәзийитидин хәвәрдар икәнликини, уйғур мәсилисини болупму хитайниң нөвәттә уйғурларға елип бериватқан ирқий қирғинчилиқи тоғрисида түркийә парламентида қарар мақуллитиш үчүн тиришчанлиқ көрситидиғанлиқини баян қилди.

У, “ийи” партийәсиниң уйғур мәсилисигә алаһидә көңүл бөлидиғанлиқини тәкитләп мундақ деди: “партийәмиз уйғур қериндашлиримизға алаһидә көңүл бөлиду. Уйғурларниң дәрди бизниңму дәрдимиз, шуңа биз шәрқий түркистан тәшкилатлириниң барлиқ паалийәтлиригә қатнишиватимиз. Бизму изчил һалда шәрқий түркистан мәсилисини оттуриға қоюп келиватимиз. Шәрқий түркистан түркийәдә һәр даим һәммә кишиниң қәлбидики муһим бир мәсилидур. Биз хитайниң уйғурларға қарита елип бериватқан ирқий қирғинчилиқиға көп қетим наразилиқ билдүрүп баянат елан қилдуқ. Һәр қайси телевизийәләрдә сөзләп хәлқимизгә бу һәқтә мәлумат бәрдуқ. Бизниң нәзиримиздә шәрқий түркистан мәсилиси, ирақ түркмәнлири мәсилиси, қарабағ мәсилиси билән охшаш. Буларниң һәммиси бизниң қәлбимиздики бир яра. Бу яриларни сақайтиш, дуня җамаәтчиликиниң диққитини хитай шәрқий түркистанда елип бериливатқан ирқий қирғинчилиққа тартиш үчүн қолимиздин кәлгәнни қилимиз, болупму түркийә парламентида бу һәқтә қарар мақуллитиш үчүн тиришчанлиқ көрситимиз”.

Учришиш ахирида “ийи” партийәсиди түлай айдин ханим адәттә уйғурлар дучар болуватқан “ирқий қирғинчилиқ” ниң оттуриға қоюлуватқанлиқини, уйғур ханим-қизлар, уйғур балилири дучар болуватқан трагедийәниму аңлитиш керәкликини тәкитләп мундақ деди: “биз һәр даим уйғурларни қоллаймиз. Болупму аяллар билән кичик балиларниң мәсилисини оттуриға қояйли. Түркийәдики уйғур ханим-қизларниң қийинчилиқлирини һәл қилип беримиз. Қийинчилиқи бар уйғурлар партийәмиз билән алақә орнатса болиду”.

“ийи” партийәси рәиси мәрал ақшәнәр ханимниң йолйоруқиға бинаән 6 мутәхәссис “хитайниң шинҗаң уйғур аптоном районидики кишилик һоқуқ дәпсәндичилики” намлиқ доклатни тәйярлиғаниди. Мәзкур доклатта, гуваһлиқ бәргән уйғурларниң аңлатқанлириға асаслинип, шундақла б д т да қобул қилинған “ирқий қирғинчилиқниң алдини елиш әһдинамиси” дә көрситилгәнләргә қарап, хитайниң һазир шәрқий түркистанда елип бериватқанлири дәл ирқий қирғинчилиқ икәнлики оттуриға қоюлғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт