Dörbiljinlik jama'et erbabi dawut ablet jemetidin 44 kishining tutqunda ikenliki delillendi

Muxbirimiz shöhret hoshur
2019-04-01
Élxet
Pikir
Share
Print
Awstraliyediki pa'aliyetchi ablehet dawutning ikkichi enisi almas dawut perzentliri bilen.
Awstraliyediki pa'aliyetchi ablehet dawutning ikkichi enisi almas dawut perzentliri bilen.
RFA/Shöhret Hoshur

Dörbiljin bazarliq hökümetning pénsiyege chiqqan kadiri, jama'et erbabi dawut abletning lagérdiki ehwali heqqide melumat igilishimiz dawamida alaqidar bir saqchi xadimi dawut ablet jemetidin jem'iy 44 kishining tutqunda ikenlikini ashkarilidi. Dawut abletning awstraliyediki oghli, pa'aliyetchi ablehet dawut öz a'ilisining dörbiljinde iqtisadiy we ijtima'iy orni közge körün'gen chong bir jemet ikenliki, yéqinqi ikki yilda uning taghiliri, qérindashliri we newre tughqanliri bolup, jem'iy 14 kishining tutqunda ikenlikidin éniq xewiri barliqini we qalghanlirining ehwalidin pütünley xewersizlikini éytti.

Xitayning yighiwélish lagérlirigha adem tutush dolqunining xasliqliridin biri ‏-bu lagérlargha her bir a'ilidin az dégende birdin, köp bolghanda 10 nechchidin, hetta bezi a'ililerdin jemet boyiche 40-50 che kishining tutqun qilinishidur. Ashkarilinishiche, dörbiljinlik jama'et erbabi dawut ablet bilen birlikte uning biwasite a'ile ezaliri we uruq-tughqanliri bolup, jemetidin jem'iy 44 kishi tutqun qilin'ghan. Alaqidar xadimlar ablet dawutning tutqundiki qérindashliri we uruq-tughqanliri heqqide melumat bérelmidi. Dawut abletning awstraliyede yashawatqan oghli ablehet dawut dadisining 4 qérindash ikenliki, ulardin taghisi azad almasning tutqunda ikenlikidin xewiri barliqi, qalghan ikki taghisining ehwalidin xewersizlikini éytti.

Ablehet yene qérindashliridin almas dawut, repqet dawut, dilmurat dawut, küy'oghli alimjan, newre tughqanliridin mutellip musa, létip musa we esqer ableylerningmu tutqunda ikenlikidin xewer tapqan.

Melum bolushiche, xitay da'iriliri yighiwélish lagérlirigha adem tutqunda uniwérsitétlar, tetqiqat, axbarat we neshriyat orunlirini asasi nishan qilghinidek yene jem'iyette iqtisadiy we ijtima'iy orni tiklen'gen nopuzluq a'ile we gholluq jemetlernimu nuqtiliq tutush obyékti qilip békitken. Ablehetning tonushturushidin melum bolushiche, inisi almas dawut ürümchide, newre tughqanliri mutellip musa we létip musalar bolsa dörbiljinde xelq'ara soda bilen shughullinip utuq qazan'ghan tijaretchilerdin iken.

Dörbiljin'ge qarita élip barghan téléfon ziyaretlirimiz dawamida alaqidar xadimlar dawut ablet jemetidikilerning asasen tutulup bolghanliqini inkar qilmighan bolsimu, emma ularning tutulush sewebi heqqide melumat bermidi.

Pa'aliyetchi ablehet dawut söhbitimiz dawamida bir taghisining 1980‏-yillarda xitaylar teripidin öltürülgenliki, bu chaghda dörbiljindiki Uyghur we qazaqlarning teng qozghilip namayish qilghanliqi we shu chaghda zor bir türküm kishilerning tutulup jazalan'ghanliqini eslep ötti. U dörbiljinde zilzile peyda qilghan we xitay köchmenlirini chöchütken ene shu weqening bu qétim uning jemetidin 44 kishining tutulushigha seweb bolghanliq éhtimaliqinimu otturigha qoydi.

Toluq bet