Җаза лагерлири мәсилиси фирансийәдики түркләргә тәкрар тонуштурулди

Ихтиярий мухбиримиз әкрәм
2019-03-25
Елхәт
Пикир
Share
Принт
Д у қ фондиниң мудири абдуҗелил әмәт әпәнди фирансийәниң форбаһ шәһиридики түрк тәшкилатлири уюштурған паалийәттә җаза лагерлири мәсилисини аңлатмақта. 2019-Йили 23-март.
Д у қ фондиниң мудири абдуҗелил әмәт әпәнди фирансийәниң форбаһ шәһиридики түрк тәшкилатлири уюштурған паалийәттә җаза лагерлири мәсилисини аңлатмақта. 2019-Йили 23-март.
RFA/Ekrem

Дуня уйғур қурултийиниң вәкилләр өмики фирансийәниң форбаһ шәһиридики түрк тәшкилатлири уюштурған паалийәткә қатнишип, уйғур дияридики җаза лагерлири мәсилисини аңлатти.

Фирансийәдики түрк милләтчилириниң нопузлуқ тәшкилати болған «үлкү оҗақлири» тәшкилатиниң тәклипигә бинаән д у қ рәһбәрлири 23-март фирансийәниң форбаһ шәһиригә йетип берип, уйғур дияридики җаза лагерлири мәсилиси тоғрисида тәкрар мәлумат бериш пурситигә еришкән.

Д у қ рәһбәрлириниң билдүрүшичә, фирансийә явропа иттипақиға әза 28 дөләт ичидә әң демократик вә ғәрб қиммәт қаришиға садиқ дөләтләрниң бири болсиму, әмма хитай һакимийити уйғур диярида тәсис қилған җаза лагерлири вә униңға қамалған милйонларчә уйғур вә башқа милләт тутқунлириға қарита дөләт намида һазирға қәдәр кәскин ипадә билдүрмигән дөләтләрниң бири һесаблинидикән.

Фирансийәдики кишилик һоқуқ тәшкилатлири вә һәр саһә түрк тәшкилатлири д у қ билән һәмкарлишип бу вәзийәтни өзгәртиш, җаза лагерлири мәсилисини фирансийәдә күнтәртипкә кәлтүрүш үчүн ортақ һәрикәт қилиш мәқситидә түрлүк паалийәтләрни уюштурушқа башлиған. Алдинқи айда д у қ рәһбәрлири мәзкур тәшкилат уюштурған мәхсус җаза лагерлири тоғрисида доклат бериш йиғиниға қатнашқан иди.

Бу қетим «үлкү оҗақлири» тәшкилати форбаһ шәһиридә орунлаштурған паалийәтлириниң бир мәқситиму җаза лагерлири мәсилисини түрк җамаитигә техиму кәң тонуштуруштин ибарәт болуп, бу қетимқи паалийәткә 10 дин артуқ түрк тәшкилатлириниң рәһбәрлири вә вәкиллири қатнашқан икән. Паалийәттә д у қ фондиниң мудири абдуҗелил әмәт вә шиветсарийәдики сиясий актиплардин андели әпәндиләр җаза лагерлири тоғрисида доклатлар тәқдим қилған.

Абдуҗелил әмәт әпәндиниң билдүрүшичә, бу паалийәткә 100 әтрапида киши қатнашқан болуп, уларға уйғур дияриниң нөвәттики еғир вәзийити, болупму җаза лагерлири мәсилиси тәпсилий аңлитилған. Андели әпәнди йиғинда қилған сөзидә хитайниң җаза лагерлири арқилиқ уйғур миллитини диний етиқадидин, миллий мәдәнийитидин, өрп-адәтлиридин пүтүнләй айрип ташлаш үчүн қолидин кәлгән барлиқ васитиләргә мураҗиәт қиливатқанлиқини әтраплиқ изаһлап өткән.

Д у қ рәһбәрлириниң бәргән мәлуматлириға көрә, өткән йилниң ахирлиридин башлап явропадики һәр хил намларда атилип келиватқан түрк тәшкилатлири хитайниң уйғур диярида тәсис қилған җаза лагерлириға қарши өзлүкидин қозғилип намайишлар уюштурған вә һәр хил илмий йиғинларни орунлаштурған. Һазир явропадики түрк җамаитиниң уйғурлар мәсилисигә игә чиқиш, хитайға қарита ғәзәп-нәпрәтлирини ипадә қилиш һес-һаяҗанлири барғансери күчәймәктә икән. Бу йил 6-апрел вашингтонда өткүзүлидиған зор намайишқа мас һалда явропадики бир қисим дөләтләрдики түрк җамаитиниңму хитайға қарши намайишлири өткүзүлидикән.

Фирансийәниң форбаһ шәһиридә өткүзүлгән бу қетимқи йиғинда түрк тәшкилатлириниң рәһбәрлири д у қ билән бир мәйданда туруп хитайға қарши түрлүк паалийәтләрни ортақ тәшкилләш ирадилирини билдүрүшкән һәмдә д у қ ни һәрқачан маддий вә мәниви тәрәпләрдин қоллайдиғанлиқини ипадә қилишқан.

Пикирләр (0)
Share
Толуқ бәт