Jaza lagérliri mesilisi firansiyediki türklerge tekrar tonushturuldi

Ixtiyariy muxbirimiz ekrem
2019-03-25
Élxet
Pikir
Share
Print
D u q fondining mudiri abdujélil emet ependi firansiyening forbah shehiridiki türk teshkilatliri uyushturghan pa'aliyette jaza lagérliri mesilisini anglatmaqta. 2019-Yili 23-mart.
D u q fondining mudiri abdujélil emet ependi firansiyening forbah shehiridiki türk teshkilatliri uyushturghan pa'aliyette jaza lagérliri mesilisini anglatmaqta. 2019-Yili 23-mart.
RFA/Ekrem

Dunya Uyghur qurultiyining wekiller ömiki firansiyening forbah shehiridiki türk teshkilatliri uyushturghan pa'aliyetke qatniship, Uyghur diyaridiki jaza lagérliri mesilisini anglatti.

Firansiyediki türk milletchilirining nopuzluq teshkilati bolghan "Ülkü ojaqliri" teshkilatining teklipige bina'en d u q rehberliri 23-mart firansiyening forbah shehirige yétip bérip, Uyghur diyaridiki jaza lagérliri mesilisi toghrisida tekrar melumat bérish pursitige érishken.

D u q rehberlirining bildürüshiche, firansiye yawropa ittipaqigha eza 28 dölet ichide eng démokratik we gherb qimmet qarishigha sadiq döletlerning biri bolsimu, emma xitay hakimiyiti Uyghur diyarida tesis qilghan jaza lagérliri we uninggha qamalghan milyonlarche Uyghur we bashqa millet tutqunlirigha qarita dölet namida hazirgha qeder keskin ipade bildürmigen döletlerning biri hésablinidiken.

Firansiyediki kishilik hoquq teshkilatliri we her sahe türk teshkilatliri d u q bilen hemkarliship bu weziyetni özgertish, jaza lagérliri mesilisini firansiyede küntertipke keltürüsh üchün ortaq heriket qilish meqsitide türlük pa'aliyetlerni uyushturushqa bashlighan. Aldinqi ayda d u q rehberliri mezkur teshkilat uyushturghan mexsus jaza lagérliri toghrisida doklat bérish yighinigha qatnashqan idi.

Bu qétim "Ülkü ojaqliri" teshkilati forbah shehiride orunlashturghan pa'aliyetlirining bir meqsitimu jaza lagérliri mesilisini türk jama'itige téximu keng tonushturushtin ibaret bolup, bu qétimqi pa'aliyetke 10 din artuq türk teshkilatlirining rehberliri we wekilliri qatnashqan iken. Pa'aliyette d u q fondining mudiri abdujélil emet we shiwétsariyediki siyasiy aktiplardin andéli ependiler jaza lagérliri toghrisida doklatlar teqdim qilghan.

Abdujélil emet ependining bildürüshiche, bu pa'aliyetke 100 etrapida kishi qatnashqan bolup, ulargha Uyghur diyarining nöwettiki éghir weziyiti, bolupmu jaza lagérliri mesilisi tepsiliy anglitilghan. Andéli ependi yighinda qilghan sözide xitayning jaza lagérliri arqiliq Uyghur millitini diniy étiqadidin, milliy medeniyitidin, örp-adetliridin pütünley ayrip tashlash üchün qolidin kelgen barliq wasitilerge muraji'et qiliwatqanliqini etrapliq izahlap ötken.

D u q rehberlirining bergen melumatlirigha köre, ötken yilning axirliridin bashlap yawropadiki her xil namlarda atilip kéliwatqan türk teshkilatliri xitayning Uyghur diyarida tesis qilghan jaza lagérlirigha qarshi özlükidin qozghilip namayishlar uyushturghan we her xil ilmiy yighinlarni orunlashturghan. Hazir yawropadiki türk jama'itining Uyghurlar mesilisige ige chiqish, xitaygha qarita ghezep-nepretlirini ipade qilish hés-hayajanliri barghanséri kücheymekte iken. Bu yil 6-aprél washin'gtonda ötküzülidighan zor namayishqa mas halda yawropadiki bir qisim döletlerdiki türk jama'itiningmu xitaygha qarshi namayishliri ötküzülidiken.

Firansiyening forbah shehiride ötküzülgen bu qétimqi yighinda türk teshkilatlirining rehberliri d u q bilen bir meydanda turup xitaygha qarshi türlük pa'aliyetlerni ortaq teshkillesh iradilirini bildürüshken hemde d u q ni herqachan maddiy we meniwi tereplerdin qollaydighanliqini ipade qilishqan.

Toluq bet