Jaza lagérliri mesilisi gérmaniyening dortmund shehiride anglitildi

Ixtiyariy muxbirimiz ekrem
2019-04-01
Élxet
Pikir
Share
Print
Gérmaniyening dortmund shehiride "Yawropa türk islam birliki" ning 24-nöwetlik qurultiyi chaqirilghan Uyghur wekiller.
(Soldin onggha) turghunjan alawudun, abdujélil emet we ömer bék'ali ependiler. 2019-Yili 30-mart.
Gérmaniyening dortmund shehiride "Yawropa türk islam birliki" ning 24-nöwetlik qurultiyi chaqirilghan Uyghur wekiller. (Soldin onggha) turghunjan alawudun, abdujélil emet we ömer bék'ali ependiler. 2019-Yili 30-mart.
RFA/Ekrem

Ömer bék'ali jaza lagérliri mesilisini "Yawropa türk islam birliki" ning 24-nöwetlik qurultiyida anglatti.

30-Mart küni gérmaniyening dortmund shehiride "Yawropa türk islam birliki" ning 24-nöwetlik qurultiyi chaqirilghan. Dunya Uyghur qurultiyining rehberliri teklipke bina'en bu qurultaygha 4 kishilik bir hey'et bolup qatnashqan. Xitayning jaza lagérlirida yétip chiqqan qazaqistan puqrasi ömer bék'ali bu hey'etler qatarida yighin'gha ishtirak qilip, 500 din artuq yighin qatnashquchilirigha xitayning Uyghur diyarida tesis qilghan jaza lagérliri toghriliq melumat bergen.

Dortmund shehiridin ziyaritimizni qobul qilghan d u q diniy ishlar komitétining mudiri, "Sherqiy türkistan ölimalar birliki" ning mu'awin re'isi turghunjan alawudun ependining bildürüshiche, ömer bék'alining jaza lagérliri toghrisidiki bayanliri yighin ehlining küchlük diqqitini tartqan.

Ömer bék'ali bu heqte toxtalghanda Uyghur diyaridiki jaza lagérliri mesilisini bundin kéyin yawropa döletliride téximu keng tonutush üchün pütün küchi bilen tirishchanliq körsitidighanliqini tilgha aldi.

Bu yighin'gha Uyghur wekilliri qatarida hemrah bolghan gollandiyediki "Sherqiy türkistan ma'arip jem'iyiti" ning mes'ulliridin eysa qarihajimning eskertishiche, ömer bék'alining bayanliri yawropada köpligen tarmaq teshkilatliri we 10 minglarche ezasi bolghan "Yawropa türk islam birliki" ning bu qétimqi qurultiyigha qatnashqan türk jama'iti arisida küchlük tesir qozghighan. Bu yighin'gha ishtirak qilghan qurultay fondining mes'uli abdujélil emet ependining bayan qilishiche, ömer bék'alining sözliridin tesirlen'gen türk teshkilatlirining mes'ulliri "Sherqiy türkistan xelqini we sherqiy türkistan dewasini yalghuz qoymaydighanliqini" bildürgen.

Turghunjan alawudun ependining éytishiche, "Yawropa türk islam birliki" ning bu qétimqi qurultiyigha yawropadiki bashqa türk we islam teshkilatlirining mes'ullirimu qatnashqan.

D u q rehberlirining tekitlishiche, bu yil kirgendin buyan yawropadiki oxshimighan éqimlargha mensup bolghan türk teshkilatliri özlirining her xil yighinlirigha d u q rehberlirini teklip qilip, xitay hakimiyiti Uyghur diyarida tesis qilghan jaza lagérliri mesilisini türk jama'itige keng tonutushqa purset yaritip bermekte iken.

Xitayning jaza lagérlirida 7 aydin artuq yétip chiqqan ömer bék'ali bolsa 20-marttin buyan yawropadiki bir qisim döletlerde jaza lagérliri toghrisida guwahliq bérish pa'aliyetlirini qanat yaydurup kelmekte.

Toluq bet