Bélgiyening biryussél we antwerpen sheherliridiki jaza lagérlirigha munasiwetlik pa'aliyetler netijilik ötküzülgen

Ixtiyariy muxbirimiz ekrem
2019-10-22
Élxet
Pikir
Share
Print
"Uyghur herikiti" teshkilatining re'isi roshen abbas xanim yighinda Uyghurlarning weziyitini tonushturmaqta. 2019-Yili öktebir, bélgiye.
"Uyghur herikiti" teshkilatining re'isi roshen abbas xanim yighinda Uyghurlarning weziyitini tonushturmaqta. 2019-Yili öktebir, bélgiye.
RFA/Ekrem

Bélgiye Uyghur jem'iyiti bilen "Uyghur herikiti" teshkilatining bélgiyede élip barghan pa'aliyetliri yaxshi tesir qozghighan.

9-Öktebirdin étibaren yawropadiki ikki heptilik pa'aliyitini bashlighan "Uyghur herikiti" teshkilatining re'isi roshen abbas xanim 18-öktebirde chéx jumhuriyitidiki 10 künlük pa'aliyetlirini ayaghlashturup bélgiye paytexti biryussélgha yétip kelgen.

Bélgiye Uyghur jem'iyitining re'isi yashar ependining bildürüshiche, mezkur jem'iyet Uyghur herikiti teshkilati bilen hemkarliship bélgiyening paytexti biryussél we antwerpen sheherliride oxshimighan mezmunda 4 künlük pa'aliyet teshkilligen.

Yashar ependining tilgha élishiche, 18-öktebir amérikaning bryusséldiki elchixanisida ötküzülgen jaza lagérliri toghrisida doklat bérish yighini nahayiti tesirlik bolghan. Aldinqi hepte amérikaning piragadiki elchixanisida doklat bergen roshen abbas xanim, biryussélda chaqirilghan bu yighinda yalghuz jaza lagérliri mesilisinila otturigha qoyup qalmastin, xitayning hazir gherb qimmet qarishigha jeng élan qilip, dunyaning herqaysi elliride 480 din artuq 'kungzi institutliri" ni qurup kommunistik idé'ologiyeni terghib qiliwatqanliqini, buning xitayning gherbke kéngiyish qara niyitining bashlan'ghuchi ikenlikini tekitligen hem gherb kishilirini oyghinishqa chaqirghan.

D u q ning amérikada turushluq bash teptishi abdulhekim idris ependimu 18-öktebirdin bashlap bryusséldiki pa'aliyetlerge qatnashqan bolup, u özige bekrek tesir qilghan pa'aliyetning bélgiyediki eng chong partiyelerdin biri bolghan "Yéngi flamin ittipaqi partiyesi" ning merkizide 19-öktebir ötküzülgen yighin we bu yighinda mezkur partiye bilen hemkarliship "Uyghur dostluq guruppisi" ni qurush mesilisining muzakirige qoyulghanliqi bolghanliqini tilgha aldi. U sözide, xitayning zulum siyasitige qarshi turush üchün "Uyghur dostluq guruppisi" ni dunyaning her yerliride köplep qurushning zörürlükini eskertti.

Bélgiye Uyghur jem'iyitining re'isi yashar ependimu "Yéngi flamin ittipaqi partiyesi" ning merkizide ötküzülgen yighinning köp ehmiyetlik bolghanliqini tekitlidi. Uning bildürüshiche, yighin'gha daxil bolghan parlamént ezaliri bundin kéyin bélgiye Uyghur jem'iyiti we Uyghur herikiti teshkilati bilen zich hemkarliship jaza lagérlirigha qarshi ortaq heriket qilishni xalaydighanliqini bildürgen.

Bélgiyening antwerpen shehiride yashaydighan Uyghur siyasiy aktipliridin ekperjanning bildürüshiche, bélgiye Uyghur jem'iyiti roshen abbas we abdulhekim idrislerni 20-öktebir küni antwerpen shehiride Uyghur jama'itige doklat bérishke teklip qilghan bolup, bu yighilishta nuqtiliq halda sherqiy türkistanning ötmüshi, bügüni we kelgüsige da'ir mesililer söhbet témisi bolghan.

Yashar ependining bayan qilishiche, yighinda d u q ning bash teptishi abdulhekim idris ependi biryussél bilen washin'gtondin ibaret dunyaning ikki siyasiy merkizide Uyghur milliy dewasini küchlendürüshning yolliri toghrisidiki teklip pikirlirini otturigha qoyup ötken.

Uyghur herikiti teshkilati we bélgiye Uyghur jem'iyiti xadimliri shu küni kechte yene merkizi gollandiye bolghan "Yawropa sherqiy türkistan ma'arip jem'iyiti" ni ziyaret qilghan.

Toluq bet