Җәнвәдә ирқий қирғинчилиққа вә бейҗиң олимпик мусабиқисигә қарши намайиш елип берилди

Ихтиярий мухбиримиз әкрәм
2021-04-10
Share
Җәнвәдә ирқий қирғинчилиққа вә бейҗиң олимпик мусабиқисигә қарши намайиш елип берилди "уйғурлар үчүн җәнвә" намлиқ бирләшмә мунбәр хитайниң уйғурлар үстидин елип бериватқан ирқий қирғинчилиқ җинайәтлиригә һәмдә 2022-йиллиқ бейҗиң қишлиқ олимпик мусабиқисигә қарши бүгүн җәнвәдики б д т бинаси алдида бирләшмә намайишдин бир көрүнүш . 2021-Йили 9-апрел.
Social Media

9-Април җәнвәдин игилигән мәлуматлиримизға қариғанда, шиветсарийә, франсийә вә явропаниң бир қисим әллиридики кишилик һоқуқ тәшкилатлири уйғур тәшкилатлири билән бирлишип қуруп чиққан "уйғурлар үчүн җәнвә" намлиқ бирләшмә мунбәр хитайниң уйғурлар үстидин елип бериватқан ирқий қирғинчилиқ җинайәтлиригә һәмдә 2022-йиллиқ бейҗиң қишлиқ олимпик мусабиқисигә қарши бүгүн җәнвәдики б д т бинаси алдида бирләшмә намайиш елип барған.

Намайишни тәшкиллигән "уйғурлар үчүн җәнвә" намлиқ бирләшмә мунбәрдин кампах, хәлқара кәчүрүм тәшкилати қатарлиқ мәшһур хәлқаралиқ тәшкилатлар һәмдә уйғур тәшкилатлиридин явропа уйғур иниститути, шиветсарийәдики "уйғурларға адаләт" қатарлиқ тәшкилатларму орун алған икән.

Биз алди билән мәзкур намайишни тәшкилләшкә қатнашқан явропа уйғур иниститутиниң рәиси дилнур рәйһан ханимниң бу намайишниң орунлаштурулуши тоғрисидики қарашлирини игилидуқ. Йиллардин буян шиветсарийәдә актип паалийәт елип бериватқан шиветсарийә уйғур җәмийитиниң рәиси андили әпәндиму бу намайишқа узундин буян тәйярлиқ қилинғанлиқини тилға елип өтти.

Намайиш б д т бинаси алдида саәт 12:00 да башланған. 2 Саәт давамлашқан бу намайишта һәрқайси кишилик һоқуқ тәшкилатлириниң мәсуллири сөз қилип, хитайниң уйғурлар үстидин йүргүзүватқан инсанийәткә қарши җинайәтлирини вә ирқий қирғинчилиқлирини қаттиқ әйиблигән. Бундақ залим бир һакимийәт һөкүмранлиқ қиливатқан дөләтниң олимпик мусабиқиси өткүзүш салаһийити йоқлиқини илгири сүрүшкән.

Бу қетимқи намайишни тәшкиллигүчи тәшкилатлардин бири болған "уйғурларға адаләт" тәшкилатиниң рәиси абдушүкүр әпәнди бизгә намайишниң мәқсиди һәм нәқ мәйдан әһвали һәққидә мәлумат берип өтти. Намайиш мәйданидин зияритимизни қобул қилған шиветсарийәдики уйғур зиялийси һебибуллаһ әпәнди болса бу бирләшмә намайишниң наһайити тәсирлик өткүзүлгәнликини баян қилди.

Намайиш мәйданидин тартилған син көрүнүшлиригә асасланғанда, чәт әллик намайишчилар йүзлиригә ниқапларни тақап "ирқий қирғинчилиқ", "тәкрарланмайду, қайта йүзбәрди", "инсанийәткә қарши җинайәт", "кишилик һоқуқ дәпсәндичилики" дегәндәк түрлүк мәзмунлардики вевискиларни көтүрүп параттин өткән шәкилдә намайиш мәйданиға киргән. Уйғур намайишчилар ай-юлтузлуқ көкбайрақларни көтүрүп уларға маслашқан.

Бу қетимқи намайишқа д у қ ниң җәнвәдики вәкили кәрим шәриф әпәндиму қатнашқан болуп, у чәт әллик яшларни асас қилған бу бирләшмә намайишниң яхши өткәнликини тилға алди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт