Jenwede irqiy qirghinchiliqqa we béyjing olimpik musabiqisige qarshi namayish élip bérildi

Ixtiyariy muxbirimiz ekrem
2021-04-10
Share
Jenwede irqiy qirghinchiliqqa we béyjing olimpik musabiqisige qarshi namayish élip bérildi "Uyghurlar üchün jenwe" namliq birleshme munber xitayning Uyghurlar üstidin élip bériwatqan irqiy qirghinchiliq jinayetlirige hemde 2022-yilliq béyjing qishliq olimpik musabiqisige qarshi bügün jenwediki b d t binasi aldida birleshme namayishdin bir körünüsh . 2021-Yili 9-aprél.
Social Media

9-April jenwedin igiligen melumatlirimizgha qarighanda, shiwétsariye, fransiye we yawropaning bir qisim elliridiki kishilik hoquq teshkilatliri Uyghur teshkilatliri bilen birliship qurup chiqqan "Uyghurlar üchün jenwe" namliq birleshme munber xitayning Uyghurlar üstidin élip bériwatqan irqiy qirghinchiliq jinayetlirige hemde 2022-yilliq béyjing qishliq olimpik musabiqisige qarshi bügün jenwediki b d t binasi aldida birleshme namayish élip barghan.

Namayishni teshkilligen "Uyghurlar üchün jenwe" namliq birleshme munberdin kampax, xelq'ara kechürüm teshkilati qatarliq meshhur xelq'araliq teshkilatlar hemde Uyghur teshkilatliridin yawropa Uyghur inistituti, shiwétsariyediki "Uyghurlargha adalet" qatarliq teshkilatlarmu orun alghan iken.

Biz aldi bilen mezkur namayishni teshkilleshke qatnashqan yawropa Uyghur inistitutining re'isi dilnur reyhan xanimning bu namayishning orunlashturulushi toghrisidiki qarashlirini igiliduq. Yillardin buyan shiwétsariyede aktip pa'aliyet élip bériwatqan shiwétsariye Uyghur jem'iyitining re'isi andili ependimu bu namayishqa uzundin buyan teyyarliq qilin'ghanliqini tilgha élip ötti.

Namayish b d t binasi aldida sa'et 12:00 da bashlan'ghan. 2 Sa'et dawamlashqan bu namayishta herqaysi kishilik hoquq teshkilatlirining mes'ulliri söz qilip, xitayning Uyghurlar üstidin yürgüzüwatqan insaniyetke qarshi jinayetlirini we irqiy qirghinchiliqlirini qattiq eyibligen. Bundaq zalim bir hakimiyet hökümranliq qiliwatqan döletning olimpik musabiqisi ötküzüsh salahiyiti yoqliqini ilgiri sürüshken.

Bu qétimqi namayishni teshkilligüchi teshkilatlardin biri bolghan "Uyghurlargha adalet" teshkilatining re'isi abdushükür ependi bizge namayishning meqsidi hem neq meydan ehwali heqqide melumat bérip ötti. Namayish meydanidin ziyaritimizni qobul qilghan shiwétsariyediki Uyghur ziyaliysi hébibullah ependi bolsa bu birleshme namayishning nahayiti tesirlik ötküzülgenlikini bayan qildi.

Namayish meydanidin tartilghan sin körünüshlirige asaslan'ghanda, chet ellik namayishchilar yüzlirige niqaplarni taqap "Irqiy qirghinchiliq", "Tekrarlanmaydu, qayta yüzberdi", "Insaniyetke qarshi jinayet", "Kishilik hoquq depsendichiliki" dégendek türlük mezmunlardiki wéwiskilarni kötürüp parattin ötken shekilde namayish meydanigha kirgen. Uyghur namayishchilar ay-yultuzluq kökbayraqlarni kötürüp ulargha maslashqan.

Bu qétimqi namayishqa d u q ning jenwediki wekili kerim sherif ependimu qatnashqan bolup, u chet ellik yashlarni asas qilghan bu birleshme namayishning yaxshi ötkenlikini tilgha aldi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet