Kanadadiki  féstiwalda “Uyghur rohi” namayan qilindi

Ixtiyariy muxbirimiz erkin tarim
2022.08.16
Share on WhatsApp
Share on WhatsApp
Sen'etchi Rida Ablimit Sen'etchi rida ablimit
Rida Ablimit teminligen

2019-Yili dunya miqyasida korona wirusi yamrashqa bashlighandin kéyin  yuqumining aldini élish yüzisidin nurghun döletler  jiddiy halet élan qilip, ammiwi pa'aliyetlerni chekligenidi.  Bu yaz nurghun döletlerdiki kolléktip  bayram pa'aliyetliri, her türlük féstiwallar qayta janlinishqa bashlidi.   14-Awghustta kanadaning montréyal shehiride ötküzülgen “Milletler dostluq féstiwali” gha Uyghurlarmu qatniship, milliy rohini namayan qilghan. 

10 Mingdin artuq  adem ishtirak qilghan  bu féstiwalda, bu nöwet Uyghurlarning milliy en'eniliri körsitilgen. Uyghur sen'etchi rida ablimit ependi,  shé'irini nurmemet érki yazghan, muzikisini tursun qadir ijat qilghan “Pexirlen dunyagha mexmut wetini”  dégen naxshini orunlap tamashibinlarning zor alqishigha érishken.

Igilishimizche mezkur féstiwal   kanadaning montréyal shehiride uzun yildin buyan her yili8- ayning otturilirida 1 kün dawam qilip kelmektiken. Bu köp xil medeniyetlerni tonushturush  féstiwaligha bu yil texminen 55 dölet we millet qatnashqan bolup, Uyghurlar bu féstiwalda milliy kiyimlirini kiyip qollirida kök bayraqni kötürgen halda parattin ötüp, naxsha orundap Uyghur milliy rohini namayan qilghan.

Bu heqte téléfon ziyaritimizni qobul qilghan rida ablimit ependi bu pa'aliyette Uyghur milliy rohining  namayan qilghanliqini bayan qilip mundaq dédi: “Bu féstiwalgha ishtirak qilghan kishilerning sani on mingdin ashidu. Bu 55 dölet  we millet qatnashqan zor bir féstiwal bolup, kündüzi hemme millet özlirining kiyim-kécheklirini kiyip, özlirining bayraqlirini asmanda lepilditip milletlerning rohini namayan qilghan boldi. Shularning ichide bizmu ay yultuzluq kök bayriqimizni lepilditip, sherqiy türkistanliqlargha wakaliten Uyghurlarning milliy rohini, jasaritini  namayan qilghan bolduq”.

Melum bolghinidek “Uyghur qirghinchiliqi” hazir dunyagha bilin'gen bolup, bundaq bir peytte bu féstiwalda Uyghurlarni körgen kishiler, ulargha hésdashliq qilghan.  Rida ablimit ependi bu heqte toxtilip mundaq dédi: “Féstiwalda nurghun milletler bizning <irqiy qirghinchiliqqa> uchrawatqan millet ikenlikimizni körüp, hésdashliq qildi, qollidi hemde bizge medet bérip alqishlirini yangratti. Biz parattin ötüp bolghandin kéyin, kechte men Uyghurlargha wakaliten kanada turuwatqan her millet ishtirak qilghan bu féstiwalda sehnige chiqip <pexirlen dunyagha mexmut wetini>  dégen naxshini orundidim. Bu naxsha arqiliq Uyghurlarning jasaritini, sunmas rohini, namayan qilghan boldum.  Men naxshini orunlawatqanda ikki qiz perzentimiz kök bayriqimizni lepilditip, xitayning irqiy qirghinchiliq arqiliq bizni tiz püktürelmeydighanliqini namayan qilghan boldi”.

Nopusi  köp millettin terkib tapqan kanadada  yazliri féstiwal we bayramlar köp  ötküzülidighan bolup, Uyghurlarni tonushturush üchün nahayiti köp pursetler bar iken. Kanada sherqiy türkistan jem'iyitining re'isi tuyghun abduweli ependi kanadadiki Uyghurlarning kéyinki yillarda bu xil pursetlerdin  yaxshi paydiliniwatqanliqini, Uyghur mesilisi xelq'aralashqan bügünki künde buningdin téximu yaxshi paydilinishi kéreklikini tekitlidi.

Rida ablimit ependining éytishiche bundin 4 yil burunqi mezkur féstiwalda xitaylar Uyghurche kiyim kiyip parattin ötüp, kanadadiki Uyghurlarning naraziliqigha uchrighan iken.   Bu heqte toxtaldi.

Rida ablimit 2001 yili sen'et mektepni muzika ilmi kespini püttürüp Uyghur aptonom rayonluq téléwiziye istansisi sen'et bölümining muzika- süret tehriri qatarliq xizmetlerni ishligen.  Mezkur idaride 2012 yilighiche ishlep, 2012 –yilidin bashlap chet'elde yashimaqta.

      

 

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.